Ithumwui Avāna Davidli Khavā Kachida Yuingasaka
Maiyā kahai pao kachungkha — Philistine, Moab, Zobah, Aram, Edom — shaibing rāchinga, kala Davidna masāmara kaji khorumshimwui vang bronze ngarānsanghaowa. Kakhani ngasāk kaji tui chiya: ana kazatpam kachida Ishavāna maiyā ngasaka, kala ana mashun eina munga.
18 1Hiwui thili Davidna Philistinenaobingli yuihaida athumli azingli leingasaka, kala Philistinenaobingwui pāngli eina Gath kala chiwui kha̱bing khui. 2Ana Moabli yuihaowa, kala Moabnaobing Davidwui rao sāhaida shai chigata.
3Euphrates Kong tāshungda awui pangshap onkhavai khavā atamli, Davidna Zobahwui awunga Hadadezerli Hamath tāshungda yuihaowa. 4Kala Davidna awui eina siguigari thingkha, sigui katong mi thingshini, kala raimi thingmaga̱ khui; kala siguigari shākhawui vangmang taihaida, Davidna khangatei siguigari horsang saikorawui pheili sātekmiserhaowa. 5Kala Damascuswui eina Syrianaobingna Zobahwui awunga Hadadezerli ngachon khavai kharā tharan Davidna Syrianaobing thingmaga̱da khani sāthathaowa. 6Davidna Aram-Damascusli raimi chipama; Aramnaobingla Davidwui rao sathuihaida shai chigata. Kala ithumwui Avāna Davidli ana khavā apam kachida yuingasaka. 7Kala Davidna Hadadezerwui raobingna phungkahai sināwui chāngveibing chi khuida Jerusalemli khuiunghaowa. 8Kala Awunga Davidna Hadadezerwui keinung Tibhath kala Cunwui eina pithrai kachungkha khui; chi eina Solomonna pithraiwui ra̱khong, pākra̱bing, kala pithraiwui khorkhong sākhui.
9Zobahwui awunga Hadadezerwui raimi saikorali Davidna yuihaira da Hamathwui awunga Touna kashā tharan, 10Davidna Hadadezerli rai ngararda yuihairawui vang, ana awui naomayara Hadoramli Awunga Davidli angarokta somi khavai chihoi; Hadadezerna Touli ra̱ra̱ rai ngararsai. Kala Hadoramna sinā, lupā kala pithraiwui otbing ayāyāva̱ khuivai. 11Awunga Davidna yur saikora, kaja Edom, Moab, Ammonnaobing, Philistine kala Amalekwui eina kakhui sinā kala lupā saikora, hibing chi ithumwui Avāli dharkat sāhaowa.
12Zeruiahwui naomayara Abishaina Machi Tampākli Edomnaobing thingtharāda chishat sāthata. 13Davidna Edomli raimi chipama, kala Edomnaobing saikora Davidwui rao sāhaowa. Kala ithumwui Avāna Davidli ana khavā apam kachida yuingasaka.
Davidna Mashun kala Khamashung Khangarong eina Munga
14Chithāda Davidna Israel saikorawuitungli mungda, awui mi saikorali mashun eina kala khamashung khangarong eina nganaomi. 15Zeruiahwui naomayara Joabna raimibingwui akhavā sai; kala Ahiludwui naomayara Jehoshaphatna kapime sai; 16Ahitubwui naomayara Zadok kala Abiatharwui naomayara Ahimelech anina pāngmon sai; kala Shavshana thuilinga sai; 17Jehoiadawui naomayara Benaiahna Cherethnaobing kala Pelethnaobingwui akhavā sai; kala Davidwui naongarābingla awungawui khareiya otvabing sāsera. a a v17 Cherethnaobing eina Pelethnaobing hi Davidwui awungali yangkhavai kapinga raimi kazip sai; athum chi athai lamwui rai theikhami shipaibing khavai leira.
