Otamiz Dovudga har bir gʻalabani ato etadi

Zabtlar xulosasi — filistlar, Moab, Zoba, Oram, Edom — oqib kelayotgan oʻlpon va Dovud qurmaydigan maʼbad uchun yigʻib qoʻyilgan bronza bilan. Ikki marta takrorlanadigan muhim gap: Otamiz unga qayerga bormasin gʻalaba berdi, u esa adolat bilan hukmronlik qildi.

18-bob.

Shundan soʻng Dovud filistlarni magʻlub etib, ularni boʻysundirdi va filistlar qoʻlidan Gat shahri bilan uning qishloqlarini tortib oldi. U Moabni ham magʻlub etdi. Moabliklar Dovudga boʻysunib, unga xiroj toʻlab turdilar.

Dovud oʻz hukmini Furot daryosigacha kengaytirmoqchi boʻlib, Xomatgacha boʻlgan hududda Zoba shohi Hadadezerni magʻlub etdi. Dovud undan 1 000 ta jang aravasi, 7 000 chavandoz va 20 000 piyoda askarni asir oldi. U yuzta jang aravasiga yetarli otni saqlab qolib, qolgan barcha arava otlarining oyoq paylarini kesib tashladi. Damashqlik oromiylar Zoba shohi Hadadezerga yordamga kelganda, Dovud 22 000 oromiyni qirib tashladi. Dovud Damashq Oromida qoʻriqchi qoʻshinlar joylashtirdi. Oromiylar unga boʻysunib, xiroj toʻlab turdilar. Dovud qayerga borsa, Otamiz unga gʻalaba ato etardi. Dovud Hadadezer amaldorlari koʻtarib yurgan oltin qalqonlarni olib, Quddusga keltirdi. Dovud Hadadezerning shaharlari — Tibxat bilan Kundan juda koʻp bronza oldi. Sulaymon oʻsha bronzadan bronza Dengizni, ustunlarni va bronza idishlarni yasadi.

Xomat shohi Tou Dovud Zoba shohi Hadadezerning butun qoʻshinini magʻlub etganini eshitganda, u oʻz oʻgʻli Hadoramni Dovud podshohning oldiga yubordi. Hadoram Dovudni Hadadezer bilan jang qilib, uni magʻlub etgani uchun qutlab, unga baraka tiladi, chunki Hadadezer Tou bilan tez-tez urushib turardi. Hadoram har xil oltin, kumush va bronza buyumlarni olib keldi. Dovud podshoh bu buyumlarni oʻzi barcha xalqlardan — Edom, Moab, ammoniylar, filistlar va Amolekdan olgan kumush bilan oltin qatori Otamizga bagʻishladi.

Zeruya oʻgʻli Abishay Tuz vodiysida 18 000 edomlikni qirib tashladi. Dovud Edomda qoʻriqchi qoʻshinlar joylashtirdi. Barcha edomliklar unga boʻysundilar. Dovud qayerga borsa, Otamiz unga gʻalaba ato etardi.

Dovud adolat va solihlik bilan hukmronlik qiladi

Shunday qilib, Dovud butun Isroil ustidan hukmronlik qildi va butun xalqiga adolat bilan solihlik asosida hukm yuritdi. Zeruya oʻgʻli Yoab qoʻshinga sarkardalik qilardi. Ohilud oʻgʻli Yohushafat solnomachi edi. Ohituv oʻgʻli Zodoq bilan Evyatar oʻgʻli Oximalek ruhoniylar edi. Shavsha kotib edi. Yohuyodo oʻgʻli Benayo keretlar bilan peletlarga boshchilik qilardi. Dovudning oʻgʻillari esa podshohning yonida yuqori lavozimli amaldorlar boʻlib xizmat qilardilar. ^a