1 நாளாகமம் 18

18 ¹இதற்குப் பின்பு, தாவீது பெலிஸ்தரை முறியடித்து, அவர்களைக் கீழ்ப்படுத்தி, பெலிஸ்தரின் கையிலிருந்து காத் பட்டணத்தையும் அதைச் சார்ந்த கிராமங்களையும் பிடித்துக்கொண்டான். ²அவன் மோவாபையும் முறியடித்தான்; மோவாபியர் தாவீதுக்குக் கீழ்ப்பட்டவர்களாகி அவனுக்குக் கப்பம் செலுத்தினார்கள்.

³தாவீது தன் ஆதிக்கத்தை ஐப்பிராத்து நதிவரை பரப்பப் போகையில், சோபாவின் ராஜாவாகிய ஆதாதேசரை ஆமாத்துவரை முறியடித்தான். ⁴தாவீது அவனிடமிருந்து 1,000 இரதங்களையும், 7,000 குதிரைவீரர்களையும், 20,000 காலாட்படை வீரர்களையும் பிடித்துக்கொண்டான். நூறு இரதங்களுக்குப் போதுமானவற்றை வைத்துக்கொண்டு, மற்ற எல்லா இரதக் குதிரைகளின் குதிக்காலின் நரம்புகளையும் அறுத்துப்போட்டான். ⁵தமஸ்குவின் சீரியர் சோபாவின் ராஜாவாகிய ஆதாதேசருக்கு உதவிசெய்ய வந்தபோது, தாவீது சீரியரில் 22,000 பேரை வெட்டிப்போட்டான். ⁶தாவீது தமஸ்குவின் சீரியாவில் தாணையங்களை வைத்தான்; சீரியர் அவனுக்கு ஊழியக்காரராகி கப்பம் செலுத்தினார்கள். தாவீது போன இடமெங்கும் எங்கள் பிதா அவனுக்கு வெற்றியைத் தந்தார். ⁷ஆதாதேசரின் அதிகாரிகள் அணிந்திருந்த பொன் கேடயங்களை தாவீது எடுத்து எருசலேமுக்குக் கொண்டுவந்தான். ⁸ஆதாதேசரின் பட்டணங்களாகிய திபியாத்திலும் கூனிலுமிருந்து தாவீது மிகுதியான வெண்கலத்தை எடுத்துக்கொண்டான்; அதைக்கொண்டு சாலொமோன் வெண்கலக் கடல்தொட்டியையும், தூண்களையும், வெண்கலப் பாத்திரங்களையும் செய்தான்.

⁹தாவீது சோபாவின் ராஜாவாகிய ஆதாதேசரின் சேனையனைத்தையும் முறியடித்ததை ஆமாத்தின் ராஜாவாகிய தோயூ கேள்விப்பட்டபோது, ¹⁰தோயூவோடு அநேகமுறை யுத்தம்பண்ணியிருந்த ஆதாதேசரை எதிர்த்துப் போராடி முறியடித்ததற்காக, தாவீது ராஜாவை வாழ்த்தி ஆசீர்வதிக்கும்படி அவன் தன் குமாரனாகிய அத்தோராமை அனுப்பினான். அத்தோராம் பொன், வெள்ளி, வெண்கலத்தினாலான எல்லாவித பொருட்களையும் கொண்டுவந்தான். ¹¹தாவீது ராஜா இவைகளை, ஏதோம், மோவாப், அம்மோனியர், பெலிஸ்தர், அமலேக்கு ஆகிய எல்லா ஜாதிகளிடமிருந்தும் தான் எடுத்திருந்த வெள்ளியோடும் பொன்னோடுங்கூட எங்கள் பிதாவுக்குப் பிரதிஷ்டைபண்ணினான்.

¹²செருயாவின் குமாரனாகிய அபிசாய் உப்புப் பள்ளத்தாக்கில் ஏதோமியரில் 18,000 பேரை வெட்டிப்போட்டான். ¹³தாவீது ஏதோமில் தாணையங்களை வைத்தான்; ஏதோமியர் அனைவரும் அவனுக்குக் கீழ்ப்பட்டவர்களாகினார்கள்; தாவீது போன இடமெங்கும் எங்கள் பிதா அவனுக்கு வெற்றியைத் தந்தார்.

தாவீது நியாயத்தோடும் நீதியோடும் ஆளுகை செய்கிறான்

¹⁴இப்படியாக தாவீது இஸ்ரவேல் அனைத்தையும் ஆண்டு, தன் ஜனங்கள் அனைவருக்கும் நியாயமும் நீதியும் செலுத்தினான். ¹⁵செருயாவின் குமாரனாகிய யோவாப் சேனைக்குத் தலைவனாயிருந்தான்; அகிலூதின் குமாரனாகிய யோசபாத் மந்திரியாயிருந்தான்; ¹⁶அகிதூபின் குமாரனாகிய சாதோக்கும், அபியத்தாரின் குமாரனாகிய அகிமெலேக்கும் ஆசாரியராயிருந்தார்கள்; சவுசா சம்பிரதியாயிருந்தான்; ¹⁷யோய்தாவின் குமாரனாகிய பெனாயா கிரேத்தியர்மேலும் பிலேத்தியர்மேலும் அதிகாரியாயிருந்தான்; தாவீதின் குமாரர் ராஜாவின் பக்கத்தில் பிரதான அதிகாரிகளாயிருந்தார்கள். ^a a v17 கிரேத்தியரும் பிலேத்தியரும் தாவீதின் சிறந்த ராஜாங்க மெய்க்காவல் படைப்பிரிவுகளாயிருந்தார்கள்; இவர்கள் தொழில்முறையான அந்நிய தேசத்து வீரர்களாயிருந்திருக்கலாம்.