Papa nou Bay David Chak Viktwa

Yon rezime viktwa yo — Filisten, Moab, Soba, Aram, Edon — ak taks k ap antre epi bwonz yo sere pou yon tanp David p ap bati. Liy ki konte a parèt de fwa: Papa nou te ba l viktwa tout kote l te ale, epi li te gouvène ak jistis.

Chapit 18.

Apre sa, David bat moun Filisti yo, li donte yo, li pran lavil Gat ak ti bouk ki toupre l yo nan men moun Filisti yo. Li bat moun Moab yo tou, moun Moab yo vin sèvitè David, yo t'ap peye l taks.

David bat Adadezè, wa peyi Zoba a, jouk nan Amat, lè li t'al tabli pouvwa li bò larivyè Lefrat la. David pran nan men l mil cha lagè, sèt mil kavalye, ak ven mil sòlda apye. Li koupe jarèt tout chwal cha yo, men li kite ase pou san cha lagè. Lè moun Aram ki soti lavil Damas yo vin pote sekou bay Adadezè, wa peyi Zoba a, David touye venndemil moun Aram. David mete kazèn sòlda nan peyi Aram bò Damas; moun Aram yo vin sèvitè li, yo t'ap peye l taks. Papa nou te fè David genyen tout kote li pase. David pran gwo plak pwotèj an lò chèf lame Adadezè yo te gen nan men yo, li pote yo lavil Jerizalèm. Nan lavil Tibat ak lavil Koun, de lavil ki te pou Adadezè, David pran yon gwo kantite kwiv. Se avè l Salomon fè gwo basen kwiv la, poto yo, ak veso an kwiv yo.

Lè Toou, wa peyi Amat la, tande David te bat tout lame Adadezè, wa peyi Zoba a, li voye Adoram, pitit gason l lan, al jwenn wa David pou di l bonjou epi pou felisite l dèske li te goumen ak Adadezè, li te bat li, paske Adadezè te fè lagè anpil fwa ak Toou. Adoram pote tout kalite bagay an lò, an ajan, ak an kwiv. Wa David mete tout bagay sa yo apa pou Papa nou, ansanm ak ajan ak lò li te pran nan men tout nasyon yo: moun Edon, moun Moab, moun Amon, moun Filisti, ak moun Amalèk.

Abichay, pitit gason Sewouya a, touye dizwit mil moun Edon nan Fon Sèl la. David mete kazèn sòlda nan peyi Edon; tout moun Edon yo vin sèvitè li, Papa nou te fè l genyen tout kote li pase.

David Gouvènen Ak Jistis ak Dwati

Se konsa David t'ap gouvènen tout pèp Izrayèl la, li t'ap rann jistis ak dwati pou tout pèp li a. Joab, pitit gason Sewouya a, te chèf lame a; Jozafa, pitit gason Ayiloud la, te reskonsab achiv yo; Zadòk, pitit gason Ayitoub la, ak Akimelèk, pitit gason Abyata a, te prèt; Chavcha te sekretè; Benaja, pitit gason Jeojada a, te chèf keretyen yo ak peletyen yo; pitit gason David yo te gwo chèf bò kote wa a. ^a