Romu 10

10 ¹Ẹ̀yin ará, ìfẹ́ ọkàn mi àti àdúrà mi sí Baba wa fún Israẹli ni fún ìgbàlà wọn. ²Mo jẹ́rìí nípa wọn pé: wọ́n ní ìtara fún Baba wa, ṣùgbọ́n kì í ṣe gẹ́gẹ́ bí ìmọ̀. ³Nítorí àìmọ̀ òdodo Baba wa, tí wọ́n sì ń wá ọ̀nà láti fi ìdí tiwọn múlẹ̀, wọn kò tẹríba fún òdodo Baba wa. ⁴Nítorí Kristi ni góńgó òfin, kí gbogbo àwọn tí ó bá gbàgbọ́ lè gba òdodo.

⁵Nítorí Mose kọ̀wé nípa òdodo tí ó dá lórí òfin pé: “Ẹni tí ó bá ṣe nǹkan wọ̀nyí yóò wà láàyè nípasẹ̀ wọn.”

⁶Ṣùgbọ́n òdodo tí ó dá lórí ìgbàgbọ́ wí pé: “Má ṣe wí nínú ọkàn rẹ pé, ‘Ta ni yóò gòkè lọ sí ọ̀run?’” (èyí ni, láti mú Kristi sọ̀kalẹ̀). ⁷“tàbí ‘Ta ni yóò sọ̀kalẹ̀ lọ sí ọ̀gbun?’” (èyí ni, láti gbé Kristi dìde kúrò nínú òkú). ⁸Ṣùgbọ́n kí ni ó wí? “Ọ̀rọ̀ náà wà nítòsí rẹ, ní ẹnu rẹ àti nínú ọkàn rẹ”—èyí ni ọ̀rọ̀ ìgbàgbọ́ tí àwa ń wàásù: ⁹Bí ìwọ bá fi ẹnu rẹ jẹ́wọ́ pé Jesu ni Olúwa, tí ìwọ sì gbàgbọ́ nínú ọkàn rẹ pé Baba wa jí i dìde kúrò nínú òkú, a ó gbà ọ́ là. ¹⁰Nítorí ọkàn ni a fi ń gbàgbọ́ tí a sì di olódodo lọ́dọ̀ Baba wa, ẹnu ni a sì fi ń jẹ́wọ́ tí a sì rí ìgbàlà gbà. ¹¹Nítorí Ìwé Mímọ́ wí pé, “Ẹnikẹ́ni tí ó bá gbà á gbọ́ ojú kì yóò tì í.” ¹²Kò sí ìyàtọ̀ láàrin Júù àti Gíríìkì: Olúwa kan náà ni Olúwa gbogbo ènìyàn, ó sì jẹ́ ọ̀làwọ́ sí gbogbo àwọn tí ń ké pè é. ¹³Nítorí “ẹnikẹ́ni tí ó bá ké pe orúkọ Olúwa wa Jesu ni a ó gbà là.” ^a a v13 Paulu mú ìlérí náà pé “ẹnikẹ́ni tí ó bá ké pe orúkọ Olúwa ni a ó gbà là,” ó sì fi í kan Jesu — láti ké pe Olúwa ni láti ké pè é.

¹⁴Ǹjẹ́ báwo ni wọ́n ṣe lè ké pe ẹni tí wọn kò gbàgbọ́? Báwo ni wọ́n ṣe lè gba ẹni tí wọn kò gbọ́ nípa rẹ̀ gbọ́? Báwo ni wọ́n ṣe lè gbọ́ láìsí ẹni tí ó ń wàásù? ¹⁵Báwo ni wọ́n ṣe lè wàásù rẹ̀ bí kò bá ṣe pé a rán wọn? Gẹ́gẹ́ bí a ti kọ̀wé rẹ̀ pé: “Báwo ni ẹsẹ̀ àwọn tí ń mú ìhìnrere wá ti lẹ́wà tó!”

¹⁶Ṣùgbọ́n kì í ṣe gbogbo wọn ni ó ṣe ìgbọràn sí ìhìnrere, nítorí Isaiah wí pé, “Baba wa, ta ni ó gba ìhìn wa gbọ́?” ¹⁷Nítorí náà, ìgbàgbọ́ wá láti inú gbígbọ́, gbígbọ́ sì wá nípasẹ̀ ọ̀rọ̀ nípa Kristi. ¹⁸Ṣùgbọ́n mo béèrè pé: ṣé wọn kò gbọ́ ni? Bẹ́ẹ̀ ni, wọ́n gbọ́: “Ìró wọn jáde lọ sí gbogbo ayé, ọ̀rọ̀ wọn sì dé òpin ayé.”

¹⁹Ṣùgbọ́n mo béèrè pé, ṣé Israẹli kò mọ̀ ni? Ní àkọ́kọ́ Mose wí pé: “Èmi yóò mú yín jowú nípasẹ̀ àwọn tí kì í ṣe orílẹ̀-èdè, èmi yóò sì mú yín bínú nípasẹ̀ orílẹ̀-èdè tí kò ní òye.”

²⁰Isaiah ní ìgboyà láti wí pé, “Àwọn tí kò wá mi ni ó rí mi; mo fi ara hàn sí àwọn tí kò béèrè mi.”

²¹Ṣùgbọ́n nípa Israẹli ó wí pé, “Ní gbogbo ọjọ́ ni mo na ọwọ́ mi síta sí àwọn ènìyàn aṣọ̀tẹ̀, tí ń ṣe agídí.”