Marmarin Zuciyar Bulus domin Isra'ila

Mutanen Bulus suna da himma ta gaske ga Ubanmu amma an karkatar da ita ga abin da bai dace ba: kafa adalcin kansu maimakon nasa. Madadin yana kusa, a baki da kuma zuciya, a buɗe ga duk wanda ya yi kira. Wannan kuwa ya tayar da matsala ta zahiri — babu wanda yake ji ba tare da an aiki wani ba.

Babi na 10.

'Yan'uwa, marmarin zuciyata da addu'ata ga Ubanmu domin Isra'ila shi ne su sami ceto. Ina ba da shaida game da su cewa suna da himma ga Ubanmu, amma ba bisa sani ba. Da yake ba su san adalcin Ubanmu ba, suna kuma neman kafa nasu, ba su mika kai ga adalcin Ubanmu ba. Gama Almasihu shi ne manufar shari'a, saboda haka duk wanda ya gaskata zai sami adalci.

Gama Musa ya rubuta game da adalcin da ya dogara ga shari'a, “Mutumin da ya aikata waɗannan abubuwa zai rayu ta wurinsu.”

Amma adalcin da yake ta wurin bangaskiya ya ce, “Kada ka ce a zuciyarka, ‘Wa zai hau zuwa Sama?’ ” (wato domin a sauko da Almasihu). “ko ‘Wa zai gangara zuwa lahira?’ ” (wato domin a tā da Almasihu daga matattu). Amma me ya ce? “Maganar tana kusa da kai, a bakinka da kuma a zuciyarka” — wato maganar bangaskiyar da muke shelawa. Idan ka furta da bakinka cewa Yesu Ubangiji ne, ka kuma gaskata a zuciyarka cewa Ubanmu ya tā da shi daga matattu, za a cece ka. Gama da zuciya mutum yake gaskatawa ya kuma zama mai adalci a gaban Ubanmu, da baki kuma yake furtawa a kuma cece shi. Gama Nassi ya ce, “Duk wanda ya gaskata da shi ba zai sha kunya ba.” Babu bambanci tsakanin Bayahude da Baheleni, gama Ubangiji ɗaya ne Ubangijin kowa, mai yawan alheri ga duk masu kiran sa. Gama “duk wanda ya kira bisa sunan Ubangijinmu Yesu za a cece shi.” ^a

To, yaya za su yi kira ga wanda ba su gaskata da shi ba? Yaya kuma za su gaskata da wanda ba su taɓa jinsa ba? Yaya kuma za su ji in babu mai yin wa'azi? Yaya kuma za su yi shelarsa in ba a aike su ba? Kamar yadda aka rubuta, “Ina misalin kyan ƙafafun masu kawo bishara!”

Amma ba duka ba ne suka yi biyayya ga bishara, gama Ishaya ya ce, “Ya Ubanmu, wa ya gaskata saƙonmu?” Saboda haka bangaskiya takan zo ne ta wurin ji, ji kuma na zuwa ta wurin maganar Almasihu. Amma ina tambaya, ashe ba su ji ba? I, sun ji mana, “Muryarsu ta fita zuwa dukan duniya, kalmominsu kuma zuwa iyakar duniya.”

Amma ina tambaya, ashe Isra'ila ba su sani ba? Da farko Musa ya ce, “Zan sa ku yi kishi ga waɗanda ba al'umma ba, in sa ku yi fushi ta wurin al'ummar da ba ta da fahimi.”

Ishaya kuwa da ƙarfin hali ya ce, “Waɗanda ba su neme ni ba su ne suka same ni; na bayyana ga waɗanda ba su tambaye ni ba.”

Amma game da Isra'ila ya ce, “Dukan yini na miƙa hannuwana ga mutanen da suke masu rashin biyayya da taurin kai.”