Ubanmu Bai Ƙi Isra'ila Ba

Ashe Ubanmu ya yar da Isra'ila? Bulus ya amsa da kansa, da mutum dubu bakwai na Iliya, da itacen zaitun da aka ɗaura masa reshe, wanda yake gargaɗi masu bi na al'ummai kada su yi taƙama. Taurarewar ta wani sashe ce, ta ɗan lokaci kuma; ba a janye baiwa da kiran ba. Ya ƙare da sujada, ba da bayani ba.

Babi na 11.

To, ina tambaya, Ubanmu ya ƙi mutanensa ne? Sam! Ni ma ba'isra'ile ne, daga zuriyar Ibrahim, kabilar Binyamin. Ubanmu bai ƙi mutanensa ba, waɗanda ya rigya sani. Ko ba ku san abin da Nassi ya faɗa game da Iliya ba, yadda ya kai ƙarar Isra'ila ga Ubanmu? “Ya Uba, sun kashe annabawanka, sun rushe bagadanka; ni kaɗai na rage, suna kuma neman raina.”

Amsar Allah kuwa ita ce, “Na bar wa kaina mutum dubu bakwai waɗanda ba su durƙusa wa Ba'al ba.” ^a

Haka ma a wannan lokaci akwai raguwa, waɗanda aka zaɓa ta wurin alheri. Amma in ta wurin alheri ne, to, ba ta wurin ayyuka ba ke nan; in ba haka ba, alheri ba zai ƙara zama alheri ba.

To, me ke nan? Isra'ila ba su sami abin da suke nema ba; amma zaɓaɓɓun sun samu, sauran kuwa aka taurara zukatansu. Kamar yadda yake a rubuce cewa, “Ubanmu ya ba su ruhun kasala, idanu da ba sa gani da kunnuwa da ba sa ji, har wa yau.”

Dawuda kuma ya ce, “Bari teburinsu yă zama tarko, da mugun tarko, da dutsen sa tuntuɓe, da kuma sakamako gare su. Bari idanunsu su duhunta don kada su gani, ka kuma tanƙware bayansu har abada.”

To, ina tambaya, sun yi tuntuɓe ne don su fāɗi ƙaƙaf? Sam! Sai dai ta wurin kuskurensu ne ceto ya zo ga Al'ummai, domin a sa Isra'ila su yi kishi. In zunubinsu ya azurta duniya, kuskurensu kuma ya azurta Al'ummai, balle fa cikarsu gaba ɗaya!

Ina gaya muku wannan, ku Al'ummai. Da yake ni manzo ne ga Al'ummai, ina girmama hidimata, da fatan ko ta yaya in sa mutanena su yi kishi, in kuma ceci waɗansu daga cikinsu. In ƙin da aka yi musu ya kawo sulhun duniya, me karɓarsu za tă kawo in ba rai daga matattu ba? In nunan fari mai tsarki ne, to, dukan kullin ma mai tsarki ne; in saiwa mai tsarki ce, to, rassan ma masu tsarki ne. In an kakkarya waɗansu rassa, kai kuma, reshen zaitun na jeji, aka aura ka a cikinsu, kana kuma tarayya cikin saiwar zaitun mai albarka, kada ka yi taƙama a kan rassan. In kuwa ka yi, ba kai ne kake riƙe saiwa ba, saiwa ce take riƙe ka. To, za ka ce, “An kakkarya rassa ne domin a aura ni a ciki.” Gaskiya ne. An kakkarya su saboda rashin bangaskiya ne; kai kuwa kana tsaye ta wurin bangaskiya. Kada ka yi girman kai, sai dai ka ji tsoro. Gama in Ubanmu bai ƙyale rassan asali ba, ba zai ƙyale kai ma ba. Saboda haka ka dubi nagarta da tsananin Ubanmu. Tsanani ga waɗanda suka fāɗi, nagarta kuwa gare ka, in dai ka ci gaba cikin nagartarsa; in ba haka ba, za a sare kai ma. In su ma ba su dawwama cikin rashin bangaskiya ba, za a aura su a ciki, gama Ubanmu yana da iko yă sāke aura su a ciki. In an sare ka daga itaciyar zaitun ta jeji ta asali, aka kuma aura ka, ba bisa ɗabi'a ba, cikin itaciyar zaitun mai kyau, balle fa rassan asali, za a sāke aura su cikin itaciyar zaitunsu!

Dukan Isra'ila Za su Sami Ceto

'Yan'uwa, ba na so ku kasance da jahilci game da wannan asiri, domin kada ku zama masu hikima a ganin kanku. Taurin zuciya ya sami Isra'ila a bangare, sai lokacin da cikakken yawan Al'ummai zai shiga.

Ta haka kuwa dukan Isra'ila za su sami ceto, kamar yadda yake a rubuce cewa, “Mai ceto zai zo daga Sihiyona, yă kuma kawar da mugunta daga Yakubu, ^b wannan kuwa shi ne alkawarina da su, sa'ad da na ɗauke zunubansu.”

Game da bishara, su abokan gāba ne saboda ku; amma game da zaɓe, su ƙaunatattu ne saboda kakanninsu. Gama kyautai da kiran Ubanmu ba a iya sokewa. Gama kamar yadda a dā ku kuka yi wa Ubanmu rashin biyayya, amma yanzu kuka sami jinƙai ta wurin rashin biyayyarsu, haka su ma yanzu suka yi rashin biyayya, domin ta wurin jinƙan da aka nuna muku, su ma yanzu su sami jinƙai. Gama Ubanmu ya kulle kowa a cikin rashin biyayya, domin yă nuna wa kowa jinƙai.

Kai, zurfin arziki da hikima da sanin Ubanmu! Yadda hukunce-hukuncensa ba a bincikewa, yadda kuma hanyoyinsa ba a bibiya! “Gama wane ne ya san tunanin Ubanmu, ko kuwa wane ne ya zama mashawarcinsa? Ko wane ne ya ba shi wani abu, har sai an sāka masa?” Gama daga gare shi, ta wurinsa, zuwa gare shi ne dukan abubuwa suke. A gare shi ɗaukaka tă tabbata har abada. Amin.