Romnao 11

11 ¹Chieina ina ngahāna: ithumwui Avāna awui mibingli mamayāhairala? Maningphutmana! Ila Abrahamwui ara̱-azā, Benjamin shangwui Israelnao akhana. ²Ithumwui Avāna ana rida theikahai awui mibingli mamayāmana. Lah kathara lairikli Elijahwui pongli khi hāngkhala, ana Israelli ngakaida ithumwui Avāli kathada ngakaokhala kaji nathum matheimalā? ³"Avā, athumna nawui marānbingli shaothatserhaowa, nawui hanphutbing sākhaira; imāng taikahaina, kala athumna imanglā khuithui khavai ngarānda lei."

⁴Varena ngahānka: "Baalli khuktida makhorumlak kaje mi thingshini iwui vang ina haisara." ^a a v4 Baal chi Canaannaobingwui reimei meoma̱na, Elijahwui atamli Israel hupta kachungkhana khorumhaowa.

⁵Chithada sāda aruihon atamli, lukhamashan mangā eina nganingshing kahai shākkahai leili. ⁶Kha lukhamashan mangā eina jiakha, ot kasāna maningluimana; chi maningakha lukhamashan chi lukhamashan maningluimana.

⁷Chithākha khi hāngra? Israelna yaothui kahai chi masamphangmana; kha nganingshingbingna samphanga, kha kaje shākkahaia ning makanghaowa. ⁸Hithada kapihaida lei: "Ithumwui Avāna aja zimiksho eina tangda athumli ningmakashok manglā, matheila mik kala mashāmi khanā mihaira."

⁹Kala Davidna hānga, "Athumwui zātkhān chi khalen, mankhavai khalen, phei ngaphok, kala athumwui vang shongrān ngasāranu. ¹⁰Athumwui mik tangmangmihaida matheiranu, kala athum kashān nganukkapopchingranu."

¹¹Chieina ina ngahāna: athum phei ngaphokta mashoda hortāphalungrala? Maningphutmana! Kha Israelli mikpai ngasak khavai, athumwui khangaphokwui vang eina Gentilebingli huikhami rāhaira. ¹²Athumwui morei china okathuili kashānga ngasakakha, kala athumwui khangaphokna Gentilebingli kashānga ngasakakha, athumwui kāshungchao khangazangna kayākha mataida hakmahāra!

¹³Nathum Gentilebingli ina hi hānga: I Gentilebingwui paokazata sākhavai vang eina, iwui otram khangatha̱ ina khayāshiya, ¹⁴ilila iwui mibingli mikpai ngasakpai khavai, kala athum kaikhali huimira khavai kaji iwui kachihānna. ¹⁵Athumli mamayākhami china okathuili ngashimmi jiakha, athumli khuisangkhami china kathiwui eina kharing chi maningsi khi rāra? ¹⁶Matheikhare chi katharaakha, khamuitang katharana; angayung chi katharaakha, aphāngbingla katharana. ¹⁷Aphāng kaikha sātek kahaiakha, kala na, ramwui oliverong aton, athumwui ngachaili ngarum ngasakhaida, oliverongwui kashānga angayungli sharukhaiakha, ¹⁸Aphāngbing chiwuitungli malangsolu. Nathumna chithāda saakha, nathumna angayungli mangachonmana; angayungna nathumli ngachonmi. ¹⁹Chithāda nathumna hāngra, "Aphāngbing chi ili khangarum ngasak khavai chuitup tāhaowa." ²⁰Mashunga. Athum mashitkasangwui vang chuitup tāhaowa; nathum shitkasang eina nganinga. Langkaso masaalu, kha ngacheelu. ²¹Kaja ithumwui Avāna akachanga aphāngbing chi masheikhautthuakha, nathumlila masheikhautmara. ²²Chiwui vang eina ithumwui Avāwui lukhamashan kala sākashe chi yanglu: pitāhaobingli sākashe, kala nathum chili leichingakha nathumli lukhamashan chitheira; chi maningakha nathumla katattāhaora. ²³Kala athumna mashitkasang eina maleichingakha, athumla khangarum ngasakra; kaja ithumwui Avāna athumli latluida khangarum sā ngasakshapa. ²⁴Kaja nathum khangachā eina ramwui oliverongwui eina katathaida, khangachāli ngakaida sākhamathā oliverongli khangarum ngasakhaiakha, langmeikharda akachanga aphāngbing chi kachichāwui oliverongli latluida kayākha mataida khangarum ngasakrakhala!

Israel Saikora Huikhuira

²⁵Ivānaobing, ngathum kahai hili nathum matheila lei chi ina makhangaina, chithākha nathum khalattawui mikyan eina thangmei masaalu: Gentilebingwui mashing kākashunga mazangranglakha eina tangda Israel kaikha mararshaphaira.

²⁶Chithāda Israel saikora huikhuira, hithada kapihaida lei: "Kankhame chi Zion eina rāra kala Jacobwui eina makaphā khuithuira, ^b b v26 Zion eina rā Kankhame chi Jishuna—ithumwui Avāna Isaiah mangā eina ngashit kahai kankhame, awui mibingli morei eina ngareithui ngasakme chi. ²⁷kala ina athumwui morei khuithui tharan, hi athum eina iwui tuingashit ngasāra."

²⁸Paokaphāwui pongli, athum nathumwui vang yangkashe ngasāda lei; kapangkakhui mangā eina, avāva̱ ngarāwui vang leikashe ngasāda lei. ²⁹Kaja ithumwui Avāna awui lemmet kala kaho chi latluida makhuithuimara. ³⁰Kaja atam akhali nathum ithumwui Avāwui kahāng makhanganāthu thada, kha ara athumwui kahāng makhanganā mangā eina lukhamashan samphanghaira, ³¹chithāda athumla ara kahāng makhanganāhaira, chithākha nathumna samphanga lukhamashan mangā eina, athumla ara lukhamashan samphangra. ³²Kaja ithumwui Avāna mi saikorali kahāng makhanganāwui phātopli khalapmihaira, chiya saikorali lukhamashan sā khavaina.

³³O, ithumwui Avāwui kashānga, thangkhamei kala theikakhui kayākha thukkhala! Awui bichar kayākha maphākhuirarmana kala awui shongfa kayākha matheikhuirarmana! ³⁴"Kaja khipāna ithumwui Avāwui ning theihaira, lah khipāna awui ngakuime sāhaira? ³⁵Lah ali runmira khavai, khipāna ali lemmet mihairakhala?" ³⁶Kaja ot saikora hi awui eina, kala awui mangā eina, kala awui vangna. Ali mashimānda tekmateichingranu. Amen.