Isaiah 47

47 ¹“Sọ̀kalẹ̀, jókòó nínú ekuru, wúńdíá ọmọbìnrin Babeli; jókòó lórí ilẹ̀ gbọrọ, láìní ìtẹ́, ọmọbìnrin àwọn ará Kaldea. Wọn kì yóò pè ọ́ ní ẹni pẹ̀lẹ́ àti ẹlẹ́gẹ́ mọ́.

²“Mú ọlọ, kí o sì lọ ìyẹ̀fun; bọ́ ìbòjú rẹ, tú aṣọ ìgúnwà rẹ sílẹ̀, ṣí itan rẹ sílẹ̀, kí o sì rìn kọjá àwọn odò. ³A ó tú ìhòòhò rẹ síta, ìtìjú rẹ yóò sì hàn. Èmi yóò gbẹ̀san, Èmi kì yóò sì dá ẹnikẹ́ni sí.”

⁴Olùràpadà wa—Baba àwọn ọmọ ogun ọ̀run ni orúkọ rẹ̀— Ẹni Mímọ́ Israẹli, Baba wa.

⁵Jókòó ní ìdákẹ́rọ́rọ́, kí o sì wọ inú òkùnkùn lọ, ọmọbìnrin àwọn ará Babeli; nítorí wọn kì yóò pè ọ́ ní ayaba àwọn ìjọba mọ́. ⁶Mo bínú sí àwọn ọmọ mi; mo ba ogún mi jẹ́, mo sì fi wọ́n lé ọ lọ́wọ́. Ìwọ kò ṣàánú fún wọn rárá; ìwọ gbé àjàgà tí ó wúwo gidigidi lé àní àwọn àgbàlagbà pàápàá. ⁷Ìwọ wí pé, “Èmi yóò jẹ́ ayaba títí láé”—nítorí náà ìwọ kò fi nǹkan wọ̀nyí sọ́kàn, bẹ́ẹ̀ ni ìwọ kò rántí bí yóò ti parí sí.

⁸Nítorí náà nísinsìnyí, gbọ́ èyí, ìwọ olùfẹ́ ìgbádùn tí ó jókòó ní àìléwu, tí ó wí nínú ọkàn rẹ̀ pé, “Èmi ni, kò sì sí ẹnìkejì mi; Èmi kì yóò jókòó bí opó láéláé, bẹ́ẹ̀ ni Èmi kì yóò sì mọ ìsọ̀fọ̀ ọmọ.” ⁹Ṣùgbọ́n àwọn nǹkan méjèèjì wọ̀nyí yóò dé bá ọ lójijì, ní ọjọ́ kan ṣoṣo: ìsọ̀fọ̀ ọmọ àti dídi opó. Wọn yóò dé bá ọ ní ẹ̀kúnrẹ́rẹ́, láìka ọ̀pọ̀lọpọ̀ oṣó rẹ sí àti agbára ńlá àfọ̀ṣẹ rẹ.

¹⁰Ìwọ gbẹ́kẹ̀lé ìwà búburú ara rẹ; ìwọ wí pé, ‘Kò sí ẹni tí ó rí mi.’ Ọgbọ́n àti ìmọ̀ rẹ ti mú ọ ṣìnà, bẹ́ẹ̀ ni ìwọ rò pé, ‘Èmi nìkan ni, kò sí ẹnìkejì mi.’ ¹¹Nítorí náà àjálù yóò dé bá ọ, tí ìwọ kì yóò mọ bí a ṣe ń fi idán lé e kúrò; ìyọnu yóò ṣubú lù ọ́, tí ìwọ kì yóò lè dènà rẹ̀; ìparun yóò dé bá ọ lójijì, kí ìwọ tó mọ̀.

¹²Nítorí náà, máa bá àfọ̀ṣẹ rẹ lọ àti ọ̀pọ̀lọpọ̀ oṣó rẹ tí ìwọ ti ń ṣe làti ìgbà èwe rẹ. Bóyá ìwọ yóò ṣe àṣeyọrí; bóyá ìwọ yóò mú ẹ̀rù bà ni. ¹³Ọ̀pọ̀lọpọ̀ ìmọ̀ràn rẹ ti rẹ̀ ọ́. Jẹ́ kí wọ́n dìde kí wọ́n sì gbà ọ́ là—àwọn tí ń ya àwòrán ojú ọ̀run, àwọn tí ń wo ìràwọ̀, àwọn tí ń sọ àsọtẹ́lẹ̀ ohun tí yóò dé bá ọ ní oṣù tuntun kọ̀ọ̀kan. ¹⁴Wò ó, wọ́n dàbí ìyàngbò; iná jó wọn run. Wọn kò lè gba ara wọn là kúrò lọ́wọ́ agbára ọwọ́ iná. Ìwọ̀nyí kì í ṣe ẹyín iná láti yáná, kì í ṣe iná láti jókòó lẹ́gbẹ̀ẹ́ rẹ̀. ¹⁵Èyí ni ohun tí wọ́n jẹ́ sí ọ—àwọn tí ìwọ ti bá ṣiṣẹ́ àti ṣòwò làti ìgbà èwe rẹ. Olúkúlùkù wọn ṣáko lọ sí ọ̀nà tirẹ̀; kò sí ẹni tí yóò gbà ọ́ là.