Babylon laga Chokri, Nichete Ahhibi
Babylon ke koi, tai laga singhason pora namibi, noukar laga jata loi kene dhula te bohibi. Amikhan laga Pitri Israel ke saja dibole tai ke kaam te lagaise, kintu tai bura manuh khan ke bhi daya dikhai nai, aru kunbi nadikhe koi kene nijor mon te koise. Tai laga jotishi khan nara nisena joli jai; kunbi tai ke nabachai.
47 1“Nichete ahhi kene, dhuli te bohibi, Babylon laga kumari chokri; khali mati te bohibi, singhason nai, Chaldea manuh khan laga chokri. Tarkhan pora tumi ke aru komal aru norom koi kene nakobo.
2“Pisa-pathor loi kene atta pisibi; tumar mukh-dhaka kapor khuli bi, tumar chola khuli bi, theng ulanga kori bi, nodi khan paar hoi bi. 3Tumar ulanga tu khula hobo, aru tumar sorom tu dikhibo. Moi niyai anibo, aru Moi kun ke bhi nachari bo.”
4Amar Mukti-data—sorgo laga sena khan laga Pitri tu Tar laga nam ase— Israel laga Pobitro Jon, amar Pitri.
5Chup-chap bohibi, aru andhar te jabi, Babylon manuh khan laga chokri; kilemane tumi ke aru rajyo khan laga rani koi kene nakobo. 6Moi laga bacha khan logot te Moi khong korise; Moi laga uttoradhikar ke letera kori kene tarkhan ke tumar hath te di dise. Tumi tarkhan ke doya dikhua nai; bura manuh khan uporte bhi tumi bisi bhari joal rakhise. 7Tumi koise, “Moi hodai nimite rani hobo”—etu karone tumi eitu kotha khan ke mon te rakha nai, aru etu kineka khotom hobo etu bhi bhabona kora nai.
8Etiya, eitu huni bi, tumi moja-anond bhal pua, bhoy nathaki kene bohi thaka, jun tar mon te koi, “Moi ase, aru moi pora bahar te aru kun bhi nai; Moi kitia bhi bidhowa hoi kene nabohibo aru bacha harua laga dukh bhi najanibo.” 9Kintu eitu duita jinis ek palok te tumar uporte ahhibo, ek din te he: bacha harua aru bidhowa hua. Eitu khan puro maap te tumar uporte ahhibo, tumar bisi jadu-kaam aru tumar mantra laga dangor sakti thakile bhi.
10Tumi nijor paap te biswas korise; tumi koise, ‘Kun bhi moi ke nadikhe.’ Tumar buddhi aru gyaan pora tumi ke thogai dise, etu karone tumi bhabise, ‘Moi ekla he ase, aru moi pora bahar te aru kun bhi nai.’ 11Etu karone bipod tumar uporte ahhibo, jun ke tumi jadu pora door koribo najanibo; anorth tumar uporte giri bo, jun ke tumi rukhabo naparibo; nash achanak tumar uporte ahhibo, tumi najana age te.
12Etu karone, tumar mantra khan aru tumar bisi jadu-kaam logot te jun ke tumi jawan somoi pora mehnot kori ahhise, lagi thakibi. Hoi to tumi safol hobo; hoi to tumi bhoy lagai dibo. 13Tumar bisi salah khan pora tumi thaki jaise. Tarkhan uthi kene tumi ke bachabo dibi—jun khan akas ke jorip kore, jun khan tara khan ke sai, jun khan notun chand ahhile tumar uporte ki ahhibo etu age te koi. 14Sabi, tarkhan suka khor nisina ase; jui pora tarkhan ke puri dibo. Tarkhan nijor ke jui-lau laga sakti pora bachabo naparibo. Eitu khan gorom hobole angra nohoi, usorte bohi bole jui bhi nohoi. 15Eitu he tarkhan tumar nimite ase—jun khan logot te tumi jawan somoi pora kaam aru byapar kori ahhise. Sob manuh nijor rasta te polai jai; tumi ke bachabole kun bhi nai.