Moi laga Nam pora Mata

Amikhan laga Pitri loha nisena tan koi kene mata ekta manuh khan ke koi, Tai sob kotha agete koi dise, titia taikhan kitia bhi taikhan laga murti khan ke naam dibo na paribo. Tai taikhan ke dukh te sapha korise, aru taikhan pabole thaka shanti nimite dukh kore. Tobi bhi kotha to eitu ase: Babylon chari dibi, Tai taikhan ke mukti dise koi kene koi thakibi.

Adhyay 48.

Jacob laga ghor, eitu huni bi; tumikhan kun Israel laga nam pora mata hoise aru kun Judah laga bongso pora ahhise; tumikhan kun amar Pitri laga nam pora kosom kha aru amar Pitri ke mata—kintu hosa te nohoi aru dharmikota te bhi nohoi. Kilemane tarkhan nijor ke pobitro sheher laga manuh koi aru amar Pitri uporte bhoroi kore—sorgo laga sena khan laga Pitri Tar laga nam ase.

“Age laga kotha khan Moi bhut age te koi disele; eitu khan Moi laga mukh pora ulaise, aru Moi eitu janai dise. Titia achanak Moi kaam korise, aru eitu khan hosa hoi jaise. Kilemane tumi kiman mon tan ase eitu Moi jani thakise—tumi laga gola laga sira loha nisena tan, tumi laga kopal pitol nisena tan ase.’ Eitu khan Moi bhut age te tumi ke koi disele; eitu khan huwa age te Moi tumi ke janai disele, titia tumi kitia bhi kobo na paribo, ‘Moi laga murti pora eitu khan korise; Moi laga khundi bona murti aru Moi laga dhala murti pora hukum dise.’” Tumi eitu hunise; etiya sob eitu sabi. Tumi eitu namanibo? Etiya pora Moi tumi ke notun kotha khan kobo, tumi kitia bhi na jana lukai thaka kotha khan.’ Eitu khan etiya bona hoise, age te nohoi; aji laga age te tumi eitu khan kitia bhi huna nai, titia tumi kobo na pare, ‘Moi eitu khan age pora jani thakise.’ Tumi kitia bhi huna nai, kitia bhi jana nai; bhut age te tumi laga kan khula nai. Kilemane tumi kiman thogai pora kaam koribo eitu Moi jani thakise— jonom pora tumi ke bidrohi koi kene mati ahhise. Moi laga nijor nam nimite Moi laga khong rukhai rakhe; Moi laga stuti nimite Moi tumi uporte eitu rukhai rakhe, titia Moi tumi ke kati naphelabo. Sabi, Moi tumi ke sapha korise, kintu chandi nisena nohoi; dukh laga bhatti te Moi tumi ke porikhya korise. Moi laga nijor nimite, Moi laga nijor nimite, Moi kaam kore— kilemane Moi laga nam kele ninda hobo lage? Moi laga mahima Moi dusra ke nadibo.

Moi he Prothom aru Ses Ase

“Moi ke huni bi, Jacob, aru Israel, kun ke Moi matise: Moi he ase; Moi Prothom ase, aru Moi Ses ase. Moi laga nijor hath pora prithibi laga mojbuti rakhise, aru Moi laga dyna hath pora akash khan ke phailaise; jitia Moi eitu khan ke mate, eitu khan eke logote khara hoi.”

Tumikhan sob eke logote joma hoi bi, aru huni bi: tarkhan majote kun eitu khan koi dise? Moi morom kora jon pora Babylon birodhe Moi laga itcha purah koribo, aru tar laga hath Babylon manuh khan birodhe thakibo. ^a

Moi, Moi nijor, koise; hoi, Moi tar ke matise. Moi tar ke anise, aru tar laga rasta te tar kaam bhal hobo.

Moi usorte ahhi bi, eitu huni bi: shuru pora Moi lukai kene kowa nai; eitu huwa homoi pora, Moi ta te thakise. Aru etiya Mohan Pitri pora Moi ke pathaise— aru Tar laga Atma. ^b

Amar Pitri pora eneka koi ase—tumi laga Mukti-korta, Israel laga Pobitro Jon: Moi tumi laga Pitri ase, kun tumi laga bhal nimite tumi ke sikhai, kun tumi ke jabole laga rasta te loi jai. “Jodi khali tumi Moi laga hukum khan ke mani thakisile! Titia tumi laga shanti nodi nisena boi jabole thakise, aru tumi laga dharmikota somundro laga dheu nisena. Tumi laga bacha khan balu nisena hobole thakise, aru tumi laga nijor bongso eitu laga guti nisena; tarkhan laga nam kitia bhi kati nadibo na Moi laga usor pora khotom nahobo.”

Babylon pora ulai jabi! Babylon manuh khan pora polai jabi! Khushi laga awaj pora eitu koi dibi, prochar koribi; prithibi laga ses tak eitu pathai dibi. Kobi, ‘Amar Pitri pora Tar noukar Jacob ke mukti dise!’ Jitia tarkhan ke balu-mati laga jagah khan pora loi jaise titia tarkhan pyaas lagise nai; pathor pora tarkhan nimite pani bohai dise. Pathor ke phatai dise, aru pani ulai ahhise.

“Shanti nai,” amar Pitri koi ase, “biya manuh khan nimite.”