Isaiah 47

47 ¹"Babylonwui kachingva̱ naongalāva̱, tunglu, chifali pamlu; Chaldeawui naongalāva̱, wungpamkhong makhalei ngaleitungli pamlu. Nali nganuizon eina ngahuiri da maholuimara.

²"Shingkhur khuilaga mathir runglu; nawui mairār lānlu, nawui phahon katuma raitāhailu, naphei khamahong sālu, kongbing eina vālu. ³Nawui khayā lānmihaora, kala nawui maikashi theihaora. Ina athut khuira, kala khipākha mili mashivāmmara."

⁴Ithumwui Ngatangkhame, saikorawui Avā kaho, Israelwui Kathara, ithumwui Avā china.

⁵Kasaikha ja̱ pamlu, kala tangkhamangli vālu, Babylonwui naongalāva̱; kaja nali wungrambingwui awungva̱ da maholuimara. ⁶Ina inaongarābingli malungvātlakhaowa; iwui shimlui sākhamānghaowa kala athumli nawui pāngli haimihaowa. Nana athumli malumashanmana; khararnaomang eina tangda kharit ritlak haimihaowa. ⁷Nana hānga, "Ina katang makhavai awungva̱ leira"; chiwui vang nana saikora hi ningli maphaningluimana kala china kathada mavaikhala jikahaina chi maphaningungmana.

⁸Ara chieina, hi nganālu, ringkaphāli leikashe, ningtāphup eina kapam, awui ningli hāngkahai, "Ilaka, kala ili hailaga khangatei maleimana; ina ra̱meinao thāda mapamluimara, lah nao kashimān matheiluimara." ⁹Kha saikora khanini hi hunkhawui alungli, zimiksho akhali nawui vang ngasāra: nao kashimān kala ra̱khamei. Nawui leivā kathem kachungkha leilala, kala nawui khanongwui pangshap hakmahā leilala, athum nawui vang tākam eina ngasāra.

¹⁰Nana nakhalattawui makaphāli shitsanga; nana hānga, 'Khipākhana ili matheimana.' Nawui thangkhamei kala theikakhuila nali minamhaira, chiwui vang nana phaninga, 'Imāng ilaka, kala ili hailaga khangatei maleimana.' ¹¹Chiwui vang chotkachāng nawui vang ngasāra, china nana leivā eina kathada thahaisikhala matheimara; kalākashi nawui vang ngaphokhaira, china nana thahai mangasakshapmara; nana matheiranglakha eina, kashimān kashuirak nawui vang ngasāra.

¹²Chieina, nawui khanong kala nawui leivā kathem kachungkha, nawui nganuilakhawui eina thuida ot kasava̱ chi eina majuklu. Nana ungshunglapai; nana khangachee sāhailapai. ¹³Nawui hāngkachithei kachungkhana nali chotchāng ngasakhaira. Kazingram ngashān kasābing, sirābingli yangkai kasābing, kachāng kadhar kachida nawui vang khi ngasāra jikahaina chi marān kasābing, athum ngakarthuida nali huimiranu. ¹⁴Yanglu, athum lanji kathāna; meina athumli chuitāra. Meiwonwui pangshap eina athumna khalatta huikhui mangasakmara. Hi khalum sākhavai meithā maningmana, awui pheili pamkhavai mei maningmana. ¹⁵Hi chi, nawui nganuilakhawui eina thuida ngasoda ot kasā kala leih kasā athumna nawui vang hikathāna. Kachichā khalattawui shongli pākthuihaira; nali huikhame khipākha maleimana.