ኢሳይያስ 47 FHB Father's Heart Bible™

47 ¹“ውረዲ፥ ኣብ ሓመድ ተቐመጢ፥ ኦ ድንግል ጓል ባቢሎን፤ ዙፋን ኣብ ዘይብሉ ምድሪ ተቐመጢ፥ ኦ ጓል ከለዳውያን። ድሕሪ ሕዚ ርህርህትን ልምልምትን ኢሎም ኣይክፅውዑኺን እዮም።

²“መጥሓን ወሲድኪ ሓርጭ ጥሓኒ፤ ጉልባብኪ ኣልግሲ፥ ክዳንኪ ቀንጢጢ፥ ኣእጋርኪ ቅለዒ፥ ሩባታት ተሳገሪ። ³ሕፍረትኪ ክቕላዕ እዩ፥ ነውርኺ ከዓ ክረአ እዩ። ፍትሒ ከምፅእ እየ፥ ንሓደ እኳ ኣይናሕስየሉን እየ።”

⁴ተበጃዊና፦ ኣቦ ሰራዊት ሰማይ ስሙ እዩ፤ ቅዱስ እስራኤል፥ ኣቦና እዩ።

⁵ስቕ ኢልኪ ተቐመጢ፥ ናብ ፀልማት ድማ እተዊ፥ ኦ ጓል ባቢሎናውያን፤ ድሕሪ ሕዚ ንግስቲ መንግስታት ተባሂልኪ ኣይክትፅውዒን ኢኺ እሞ። ⁶ኣብ ደቀይ ተቖጣዕኹ፤ ንርስተይ ኣርኪሰ ናብ ኢድኪ ድማ ኣሕሊፈ ሃብክዎም። ንስኺ ምሕረት ኣይገበርክሎምን፤ ኣብ ልዕሊ ሽማግለታት እኳ ኣዝዩ ኸቢድ ኣርዑት ኣንበርኪ። ⁷ንስኺ፥ “ንዘለኣለም ንግስቲ ክኸውን እየ” በልኪ፤ ስለዙይ ነዝ ነገራት እዚኣቶም ኣብ ልብኺ ኣየንበርክዮን፥ መወዳእታኡ ከመይ ከም ዝኸውን ድማ ኣይዘከርክን።

⁸እምበኣር፥ ሕዚ እዙይ ስምዒ፥ ኦ ተድላ እተፍቅሪ፥ ብህድኣት እትቕመጢ፥ ብልባ፥ “ኣነ እየ፥ ብዘይ ካባይ ድማ ካልእ የለን፤ ከም መበለት ኮይነ ኸቶ ኣይክቕመጥን እየ፥ ምጥፋእ ደቀይ ድማ ኣይፈልጥን እየ” እትብል። ⁹እዘን ክልቲአን ነገራት እዚኣተን ግና ብሓንቲ ቕፅበት፥ ብሓንቲ መዓልቲ ክመፅኣኺ እየን፦ ምጥፋእ ደቅን መበለትነትን። ብዙሕ ጥንቈላኺን ዓብዪ ሓይሊ ድግምትኺን እንተሃለወ፥ ምሉእ ብምሉእ ክመፅኣኺ እየን።

¹⁰ብእከይኪ ተኣመንኪ፤ “ዝርእየኒ የለን” በልኪ። ጥበብኪን ፍልጠትኪን ኣስሓታኺ፥ ስለዙይ፥ “ኣነ በይነይ እየ፥ ብዘይ ካባይ ድማ ካልእ የለን” ሓሰብኪ። ¹¹ስለዙይ ከተርሕቕዮ ዘይትፈልጢ መዓት ናባኺ ክመፅእ እዩ፤ ክትከላኸልዮ ዘይትኽእሊ ሓደጋ ከዓ ናባኺ ክወድቕ እዩ፤ ዕንወት ድማ ብዘይ ትፈልጥዮ ብድንገት ናባኺ ክመፅእ እዩ።

¹²እምበኣር፥ ብድግምትኺን ብብዙሕ ጥንቈላኺን፥ በቲ ኻብ ንእስነትኺ ጀሚርኪ ዝሰራሕክዮ ቀፅሊ። ምናልባሽ ትዕወቲ ትኾኒ፤ ምናልባሽ ራዕዲ ተምፅኢ ትኾኒ። ¹³ብብዝሒ ምኽርታትኪ ደኺምኪ ኢኺ። እቶም ሰማያት ዝዕቅኑ፥ ንኸዋኽብቲ ዝጥምቱ፥ ኣብ ነፍሲ ወከፍ ወርሒ ዝመፅኣኪ ዝንብዩ፥ ይተስኡ እሞ የድሕኑኺ። ¹⁴እንሆ፥ ከም ሓሰር እዮም፤ ሓዊ የንድዶም። ካብ ሓይሊ ሃልሃልታ ንነፍሶም ከድሕኑ ኣይኽእሉን። እዚኣቶም ዝሰሓኑሉ ፍሕሚ ኣይኮኑን፥ ኣብ ጥቓኡ ዝቕመጡ ሓዊ ድማ ኣይኮኑን። ¹⁵ንኣኺ ከምዙይ እዮም እዚኣቶም፤ እቶም ካብ ንእስነትኺ ጀሚርኪ ዝሰራሕክሎምን ዝተነገድክሎምን። ነፍሲ ወከፍ ናብ መንገዱ ይኸይድ፤ ዘድሕነኪ ሓደ እኳ የለን።