Babilon Nouyangshou, Louyanashi
Babilon to laukei: Chobasetshang ka louyanan thamngu ka setashi, khangenbü laang leian wen ngünashi. Seneibü Bouei Israel to khauangan ka ikei kukei, lausikei nyi mütaodangbü shuong to ongkei onou alenkei, hoba aoei ngo achühko dogo kaibü maanga laukei. Kaibü peisilei shuong ae youho tegü lonlabü; aoei ongkei no akhümenlabü.
47 1“Louyanashi, thamngu ka setashi, Babilon saosüngbü nouyangshou; Choba setshang akiko kaoa setashi, Khaldibü nouyangshou. Touje haoenei no to netthembü hoba inyaibü dogo alaulabü.
2“Ngünbü laang leian wen ngünashi; kaibü neikhu hangletashi, kaibü neisimei sungenashi, kaibü you naketlangtishi, shumang danjung hauashi. 3Kaibü mütkong üanglabü, hoba kaibü himou haplabü. Ngei phok lamlabü, hoba ngei aoeikei asenetlabü.”
4Seneibü Püetbü—khuthük lakjaibü dan Bou haoeibü nyen ki— Israel Saopobü, seneibü Bou.
5Atüangko setashi, hoba nakthüha haushi, Babilonbü nouyangshou; aishanga touje no to sangle pendou Chobasao dogo alaulabü. 6Ngo kü chilang to khauangkei; ngei kü phetphan leilutikei hoba haoen kaibü ika kukei. Nyi haoen to onou alenkei; nyi baushi shuong thüka on atshaibü yaang künkukei. 7Nyi laukei, “Ngo ponpen Chobasao kilabü”— kheijinei nyi hibü peisilei shanga adamen, ayingsi kho aiei thonlabü adamen.
8Hibü, ho ditashi, no olinbü sanoubü, püetangetan setbü, aoei jembü maanga lauda, “Ngo kia, hoba ngo to limbo ao aki; ngo ladangkei latnyu tegü asetlabü ayingsi shou mautibü angelabü.” 9Lausikei hibü peisilei penyi longche ongkei no thükto loulabü, chalou che ka: shou mautibü hoba latnyu kibü. Haoen weko no thükto loulabü, kaibü seibü yaübü juong hoba kaibü khopjikseibü hau yaang kümasikei.
10Nyi kaibü amaibü to mailembei; nyi laukei, “Aoeikei ngo ahapda.” Kaibü songsihon hoba hapbüngebü kho no ayingbü lam to leian haukei, kheijinei nyi dambei, “Ngo mütpem kia, hoba ngo to limbo ao aki.” 11Khoei thushed no thükto loulabü, kho nyi seian apla ngela akilabü; amaibü no thükto loulabü, kho nyi thaktila athüklabü; leiluan kibü no thükto mangde loulabü, nyi kho ngela kijinei.
12Hibü, kaibü khopjikseibü hoba kaibü seibü yaübü juong, kaibü nashoudangka thama no kümbü yoa loteiashi. Aingenyu nyi haükulabü; aingenyu nyi hatbümokbü kümlabü. 13Kaibü songsido juongei no semthetkei. Haoen pian no khümenshima— aoyou müh takan chühbü, khanshoulitshou to chühbü, litnyu haanbü lajuche ka no thükto ai loulabü tetenkubü shuong. 14Chühashi, haoen youho tegü ki; wanei haoen lonan aplabü. Haoen haoen lolo khümenla wanlong hau ka athüklabü. Hibü kham sepbo shanga wankak aying, junga setla shanga wan aying. 15Hibü haoen no shanga ki—kaibü nashoudangka thama no yoa kümbü hoba khümbo kubü shuong. Lajuche jembü aeto satlabü; no khümenbü aoeikei aki.
