Heberu 8

8 ¹Kókó ọ̀rọ̀ yìí ni pé: àwa ní irú àlùfáà àgbà bẹ́ẹ̀, ẹni tí ó jókòó ní ọwọ́ ọ̀tún ìtẹ́ Ọláńlá ní ọ̀run. ²Òjíṣẹ́ àwọn ibi mímọ́ àti àgọ́ òtítọ́ náà, tí Baba gbé kalẹ̀, kì í ṣe ènìyàn. ³A yan gbogbo àlùfáà àgbà láti rú ẹ̀bùn àti ẹbọ; nítorí náà, èyí pẹ̀lú gbọ́dọ̀ ní ohun kan láti rú. ⁴Bí ó bá wà lórí ilẹ̀ ayé, kì bá tilẹ̀ jẹ́ àlùfáà, nítorí àwọn mìíràn ń rú àwọn ẹ̀bùn náà lábẹ́ òfin.

⁵Wọ́n ń sin àdàkọ àti òjìji àwọn ohun ọ̀run, gẹ́gẹ́ bí a ti kìlọ̀ fún Mose nígbà tí ó fẹ́ parí àgọ́ náà pé: “Wò ó,” ni ó wí, “ṣe ohun gbogbo gẹ́gẹ́ bí àpẹẹrẹ tí a fi hàn ọ́ lórí òkè.”

⁶Ṣùgbọ́n nísinsìnyí, Jesu ti rí iṣẹ́-òjíṣẹ́ tí ó ga jù gbà, nítorí májẹ̀mú tí ó ń ṣe alárinà rẹ̀ sàn jù, tí a gbékalẹ̀ lórí àwọn ìlérí tí ó dára jù. ⁷Nítorí bí májẹ̀mú àkọ́kọ́ náà bá jẹ́ aláìlábùkù, kì bá tí sí àìní fún èkejì.

⁸Nítorí tí ó rí àbùkù lọ́wọ́ wọn, ó wí pé: “Wò ó, àwọn ọjọ́ náà ń bọ̀, ni Baba wa wí, nígbà tí èmi yóò dá májẹ̀mú tuntun pẹ̀lú ilé Israẹli àti pẹ̀lú ilé Juda. ⁹Kì í ṣe gẹ́gẹ́ bí májẹ̀mú tí mo dá pẹ̀lú àwọn baba wọn ní ọjọ́ tí mo fi ọwọ́ mú wọn láti mú wọn jáde kúrò ní ilẹ̀ Egipti. Nítorí tí wọn kò dúró nínú májẹ̀mú mi, nítorí náà èmi kò sì náání wọn, ni Baba wa wí. ¹⁰Nítorí èyí ni májẹ̀mú tí èmi yóò dá pẹ̀lú ilé Israẹli lẹ́yìn àwọn ọjọ́ náà, ni Baba wa wí: èmi yóò fi òfin mi sínú èrò wọn, èmi yóò sì kọ wọ́n sí ọkàn wọn, èmi yóò sì jẹ́ Baba wọn, àwọn yóò sì jẹ́ ọmọ mi. ¹¹Kò sì ní síi tí olúkúlùkù yóò fi kọ́ aládùúgbò rẹ̀, àti olúkúlùkù arákùnrin rẹ̀, wí pé, ‘Mọ Baba wa,’ nítorí gbogbo wọn yóò mọ̀ mí, láti orí ẹni tí ó kéré jù nínú wọn dé orí ẹni tí ó tóbi jù. ¹²Nítorí èmi yóò ṣàánú sí àṣìṣe wọn, èmi kì yóò sì rántí ẹ̀ṣẹ̀ wọn mọ́.”

¹³Nípa pípe májẹ̀mú náà ní tuntun, ó ti sọ ti àkọ́kọ́ di èyí tí ó ti pẹ́. Ohun tí ó ti pẹ́ tí ó sì ń gbó ti súnmọ́ píparẹ́.