Ibriniyawa 8 FHB Father's Heart Bible™

8 ¹Ma'anar wannan kuwa ita ce: muna da irin wannan babban firist, wanda ya zauna a hannun dama na kursiyin Maɗaukaki a Sama. ²shi mai hidimar wuri mai tsarki ne da kuma tabanakul na gaskiya, wanda Uba ya kafa, ba mutum ba. ³Ana naɗa kowane babban firist domin yă miƙa baye-baye da hadayu; saboda haka dole ne wannan ma yă kasance da abin da zai miƙa. ⁴Da a ce yana a duniya ne, dă ba zai ma zama firist ba, tun da waɗansu suna miƙa baye-baye bisa ga shari'a.

⁵Suna hidima ne ga kwaikwayo da inuwar abubuwan Sama, kamar yadda aka gargaɗi Musa sa'ad da yake gab da kammala tabanakul, “Ka duba,” ya ce, “ka yi kome bisa ga tsarin da aka nuna maka a kan dutsen.”

⁶Amma yanzu dai Yesu ya sami hidima mafificiya, domin alkawarin da yake matsakanci a kansa ya fi kyau, wanda aka kafa a kan alkawura masu kyau fiye da na dā. ⁷Gama da a ce alkawarin nan na farko ba shi da aibi, dă ba a bukatar wani na biyu ba.

⁸Gama da ya sami laifinsu, ya ce, “Ga shi, kwanaki suna zuwa, in ji Ubanmu, sa'ad da zan yi sabon alkawari da gidan Isra'ila da kuma gidan Yahuza. ⁹Ba kamar alkawarin da na yi da kakanninsu ba a ranar da na kama hannunsu domin in fitar da su daga ƙasar Masar. Gama ba su tsaya cikin alkawarina ba, saboda haka na ƙyale su, in ji Ubanmu. ¹⁰Gama ga alkawarin da zan yi da gidan Isra'ila bayan waɗannan kwanaki, in ji Ubanmu, zan sa dokokina a cikin tunaninsu, in kuma rubuta su a cikin zukatansu, zan zama Ubansu, su kuma za su zama 'ya'yana. ¹¹Ba kuwa kowa zai ƙara koya wa maƙwabcinsa ko ɗan'uwansa ba, yana cewa, ‘Ka san Ubanmu,’ gama dukansu za su san ni, daga mafi ƙanƙanta a cikinsu har zuwa mafi girma. ¹²Gama zan nuna jinƙai ga laifofinsu, ba kuwa zan ƙara tuna da zunubansu ba.”

¹³Da ya yi maganar sabon alkawari, sai ya mai da na farkon tsoho. Abin da ya tsufa yake kuma daɗa tsufa kuwa yana gab da shuɗewa.