Waebrania 8

8 ¹Jambo kuu la haya ni hili: tunaye kuhani mkuu wa namna hiyo, aliyeketi mkono wa kuume wa kiti cha enzi cha Aliye Mkuu mbinguni. ²Mtumishi wa mahali patakatifu na wa hema ya kweli, iliyowekwa na Baba, si mwanadamu. ³Kila kuhani mkuu huwekwa ili atoe matoleo na dhabihu; kwa hiyo yampasa huyu naye awe na kitu cha kutoa. ⁴Kama angekuwa duniani, hangekuwa kuhani hata kidogo, kwa kuwa wako wengine watoao matoleo kwa mujibu wa sheria.

⁵Wao hutumikia nakala na kivuli cha mambo ya mbinguni, kama Musa alivyoonywa alipokuwa karibu kuikamilisha hema: "Angalia," akasema, "utengeneze kila kitu kwa mfano ule ulioonyeshwa mlimani."

⁶Lakini sasa Yesu amepata huduma iliyo bora zaidi, kwa kuwa agano analosimamia ni bora zaidi, lililowekwa juu ya ahadi zilizo bora zaidi. ⁷Kwa maana kama lile agano la kwanza lisingekuwa na kasoro, kusingekuwa na haja ya la pili.

⁸Kwa maana akiwaona kuwa na hatia, asema: "Tazama, siku zinakuja, asema Baba yetu, nitakapofanya agano jipya na nyumba ya Israeli na nyumba ya Yuda. ⁹Si kama lile agano nililolifanya na baba zao siku ile nilipowashika mkono ili kuwatoa katika nchi ya Misri. Kwa maana hawakudumu katika agano langu, nami nikawapuuza, asema Baba yetu. ¹⁰Kwa maana hili ndilo agano nitakalolifanya na nyumba ya Israeli baada ya siku zile, asema Baba yetu nitaweka sheria zangu ndani ya akili zao na kuziandika mioyoni mwao, nami nitakuwa Baba yao, nao watakuwa watoto wangu. ¹¹Wala hakuna atakayemfundisha tena jirani yake, na kila mmoja ndugu yake, akisema, "Mjue Baba yetu," kwa maana wote watanijua, tangu aliye mdogo kwao hata aliye mkubwa. ¹²Kwa maana nitakuwa na huruma kwa maovu yao, wala sitazikumbuka dhambi zao tena."

¹³Kwa kunena juu ya agano jipya, amelifanya lile la kwanza kuwa la kikale. Nalo lililo la kikale na kuchakaa liko karibu kutoweka.