इब्री 8

8 ¹ याचा मुद्दा हा: आपल्याला असा प्रमुख याजक आहे, जो स्वर्गात परमश्रेष्ठाच्या सिंहासनाच्या उजवीकडे बसला. ² जे पवित्रस्थान व खरा निवासमंडप पित्याने उभारला, मनुष्याने नव्हे, त्यांचा तो सेवक आहे. ³ प्रत्येक प्रमुख याजक दाने व यज्ञ अर्पण करण्यासाठी नेमला जातो; म्हणून याच्याकडेही अर्पण करण्यासारखे काहीतरी असले पाहिजे. ⁴ जर तो पृथ्वीवर असता, तर तो याजकही झाला नसता, कारण नियमशास्त्राप्रमाणे दाने अर्पण करणारे दुसरे आहेत.

⁵ ते स्वर्गीय गोष्टींची नक्कल व छाया यांची सेवा करतात, जसे मोशेला निवासमंडप पूर्ण करण्याच्या वेळी सावध केले गेले: तो म्हणाला, “पाहा, डोंगरावर तुला दाखवलेल्या नमुन्याप्रमाणे सर्व काही कर.”

⁶ पण आता येशूला याहून श्रेष्ठ सेवा प्राप्त झाली आहे, कारण ज्या कराराचा तो मध्यस्थ आहे तो अधिक चांगला असून, अधिक चांगल्या अभिवचनांवर स्थापित आहे. ⁷ कारण जर तो पहिला करार निर्दोष असता, तर दुसऱ्याची गरजच पडली नसती.

⁸ कारण त्यांच्यात दोष पाहून तो म्हणतो: पाहा, असे दिवस येत आहेत, असे पिता म्हणतो, जेव्हा मी इस्राएलाच्या घराण्याशी व यहूदाच्या घराण्याशी नवा करार करीन. ⁹ तो करार असा नाही जो मी त्यांच्या पूर्वजांशी केला ज्या दिवशी मी त्यांचा हात धरला त्यांना मिसर देशातून बाहेर आणण्यासाठी. कारण ते माझ्या करारात टिकून राहिले नाहीत, आणि म्हणून मी त्यांच्याकडे दुर्लक्ष केले, असे पिता म्हणतो ¹⁰ कारण मी असा करार करीन इस्राएलाच्या घराण्याशी त्या दिवसांनंतर, असे पिता म्हणतो मी माझे नियम त्यांच्या मनात घालीन आणि त्यांच्या हृदयांवर लिहीन, आणि मी त्यांचा पिता होईन, आणि ते माझी मुले होतील. ¹¹ आणि यापुढे कोणीही आपल्या शेजाऱ्याला व कोणीही आपल्या भावाला शिकवणार नाही, की, “ओळखा आमच्या पित्याला,” कारण लहानांपासून थोरांपर्यंत ते सर्व मला ओळखतील. ¹² कारण मी त्यांच्या अपराधांविषयी दयाळू होईन, आणि त्यांच्या पापांची यापुढे आठवण करणार नाही.”

¹³ नव्या कराराविषयी बोलताना त्याने पहिला करार जुना ठरवला आहे. आणि जे जुने व जर्जर होत जाते ते आपल्या अंताच्या जवळ येत असते.