Seneibü Thükkabou Ungshedbou, Setan Kibü
Ngüh che thüka ho khükuda: seneibü thükkabou ungshedbouei setkei. Haoei ikjai kübü kho shongha aying, lausikei maimaitham saopobü lemshang neichem ki, hoba haoei jen kibü theyolanyobü kho Jeremiaei thebülanbü kho ki, ngühkhüm maangpon ka hoba maangkou ka dobü yoa, shabü nyibou makhetko akibü yoa, hoba müt pendouei seneibü Bou ngeabü yoa.
8 1Habü ngüh yaangbou kho ho ki: Senei ho tegübü thükkabou ungshedbou che ki, aoei khuthüka Thükenbou Mühghaü setshang mae aenei setkei. 2Haoei saopobü jungto hoba ngühmai lemshang neichem khangenbou ki, kho lemshang kho müteibü aying, lausikei Bouei dangkei. 3Thükkabou ungshedbou pendou kho jongsak hoba lembü lemla shanga phokubü ki; kheijinei hobouei kei lemlabü denche ong kijan. 4Hao kaodaka kialonga, hao ungshedbou ongkei akilabü, aishanga Ngühkhüm phanga atei jongsak lemda.
5Haoen khuthükbü peisilei le hoba yemkao khangenda. Kho tegü Mosaei lemshang neichem yela nangjinei, hao to tang khittibei, “Chühashi,” haoei laukei, “nyi la shongha lenbü noksa phatko pendou kümjan.”
6Lausikei touje Jisuei khangenbü khaibou hapenkei, aishanga haoei jen kibü theyolanyobü kho maibou ki, kho thekubü maibü thüka sengan phokubü ki. 7Aishanga ho shaangbü theyolanyobü to shedbü akilonga, nyiboubü che khamla akilabü.
8Aishanga haoen to shedbü hapjinei, haoei lauda, “Chühashi, chalou louada, dogo seneibü Bouei lauda, ngei Israel chemdang hoba Jihuda chemdang to theyolanyobü haanbü che kümlabü. 9Ngei haoeneibü pisibousi shuong yoa kümbü theyolanyobü tegüje ayinglabü, kho ngei haoen ik lapan Ijep kaodak ka leiyenbü chaloua ki. Aishanga haoenei ngeibü theyolanyobüa ajoukei, hibü ngeikei haoen to maangshikko akitei, dogo seneibü Bouei lauda. 10Aishanga ho khübü chalou danan phaia Israelbü chung yoa ngei kümlabü theyolanyobü kho ho ki, dogo seneibü Bouei lauda. Ngei ngeibü ngühkhüm haoeneibü songa jinkulabü hoba kho haoeneibü maangpona dolabü, hoba ngo haoeneibü Bou yinglabü, hoba haoen ngeibü mütli yinglabü. 11Hobaje touje mütpem wekoei jembü lepbou hoba jembü jaisina to alenlabü, ‘Seneibü Bou kho ngeashi,’ dogo lenko; aishanga haoen pendouei ngo ngelabü, hanbou sühkoa yaangbou thon sühko. 12Aishanga ngei haoeneibü shedbü to onou lenlabü, hoba haoeneibü shabü touje adamenlabü.”
13Theyolanyobü haanbü che abou lauko, haoei shaangbü kho khangyobü kümtikei. Khangyobü hoba baushi sinbü kho maula nyangko kia.
