ਇਬਰਾਨੀਆਂ 8

8 ¹ਇਸ ਗੱਲ ਦਾ ਸਾਰ ਇਹ ਹੈ: ਸਾਡੇ ਕੋਲ ਅਜਿਹਾ ਪ੍ਰਧਾਨ ਜਾਜਕ ਹੈ, ਜੋ ਸੁਰਗ ਵਿੱਚ ਮਹਾਨਤਾ ਦੇ ਸਿੰਘਾਸਣ ਦੇ ਸੱਜੇ ਪਾਸੇ ਬਿਰਾਜਮਾਨ ਹੋਇਆ। ²ਉਹ ਪਵਿੱਤਰ ਸਥਾਨਾਂ ਦਾ ਅਤੇ ਉਸ ਸੱਚੇ ਡੇਹਰੇ ਦਾ ਸੇਵਕ ਹੈ, ਜਿਹੜਾ ਪਿਤਾ ਨੇ ਖੜ੍ਹਾ ਕੀਤਾ, ਨਾ ਕਿ ਮਨੁੱਖ ਨੇ। ³ਹਰੇਕ ਪ੍ਰਧਾਨ ਜਾਜਕ ਦਾਨ ਅਤੇ ਬਲੀਦਾਨ ਚੜ੍ਹਾਉਣ ਲਈ ਨਿਯੁਕਤ ਕੀਤਾ ਜਾਂਦਾ ਹੈ; ਇਸ ਲਈ ਇਸ ਦੇ ਕੋਲ ਵੀ ਕੁਝ ਚੜ੍ਹਾਉਣ ਲਈ ਹੋਣਾ ਜ਼ਰੂਰੀ ਹੈ। ⁴ਜੇ ਉਹ ਧਰਤੀ ਉੱਤੇ ਹੁੰਦਾ, ਤਾਂ ਉਹ ਜਾਜਕ ਵੀ ਨਾ ਹੁੰਦਾ, ਕਿਉਂਕਿ ਹੋਰ ਲੋਕ ਸ਼ਰੀਅਤ ਦੇ ਅਨੁਸਾਰ ਦਾਨ ਚੜ੍ਹਾਉਂਦੇ ਹਨ।

⁵ਉਹ ਸੁਰਗੀ ਵਸਤਾਂ ਦੇ ਨਮੂਨੇ ਅਤੇ ਪਰਛਾਵੇਂ ਦੀ ਸੇਵਾ ਕਰਦੇ ਹਨ, ਜਿਵੇਂ ਮੂਸਾ ਨੂੰ ਚੇਤਾਵਨੀ ਦਿੱਤੀ ਗਈ ਸੀ ਜਦੋਂ ਉਹ ਡੇਹਰਾ ਪੂਰਾ ਕਰਨ ਵਾਲਾ ਸੀ: ਉਸ ਨੇ ਆਖਿਆ, “ਵੇਖ, ਸਭ ਕੁਝ ਉਸ ਨਮੂਨੇ ਦੇ ਅਨੁਸਾਰ ਬਣਾ ਜੋ ਤੈਨੂੰ ਪਹਾੜ ਉੱਤੇ ਵਿਖਾਇਆ ਗਿਆ ਸੀ।”

⁶ਪਰ ਹੁਣ ਯਿਸੂ ਨੇ ਇੱਕ ਵਧੇਰੇ ਉੱਤਮ ਸੇਵਕਾਈ ਪ੍ਰਾਪਤ ਕੀਤੀ ਹੈ, ਕਿਉਂਕਿ ਜਿਸ ਨੇਮ ਦਾ ਉਹ ਵਿਚੋਲਾ ਹੈ ਉਹ ਵਧੇਰੇ ਚੰਗਾ ਹੈ, ਜੋ ਵਧੇਰੇ ਚੰਗੇ ਵਾਅਦਿਆਂ ਉੱਤੇ ਕਾਇਮ ਕੀਤਾ ਗਿਆ ਹੈ। ⁷ਕਿਉਂਕਿ ਜੇ ਉਹ ਪਹਿਲਾ ਨੇਮ ਨਿਰਦੋਸ਼ ਹੁੰਦਾ, ਤਾਂ ਦੂਜੇ ਦੀ ਲੋੜ ਨਾ ਹੁੰਦੀ।

⁸ਕਿਉਂਕਿ ਉਨ੍ਹਾਂ ਵਿੱਚ ਦੋਸ਼ ਪਾ ਕੇ ਉਹ ਆਖਦਾ ਹੈ: “ਵੇਖੋ, ਉਹ ਦਿਨ ਆ ਰਹੇ ਹਨ, ਸਾਡਾ ਪਿਤਾ ਆਖਦਾ ਹੈ, ਜਦੋਂ ਮੈਂ ਇਸਰਾਏਲ ਦੇ ਘਰਾਣੇ ਨਾਲ ਅਤੇ ਯਹੂਦਾਹ ਦੇ ਘਰਾਣੇ ਨਾਲ ਇੱਕ ਨਵਾਂ ਨੇਮ ਬੰਨ੍ਹਾਂਗਾ। ⁹ਇਹ ਉਸ ਨੇਮ ਵਰਗਾ ਨਹੀਂ ਜੋ ਮੈਂ ਉਨ੍ਹਾਂ ਦੇ ਪਿਉ-ਦਾਦਿਆਂ ਨਾਲ ਬੰਨ੍ਹਿਆ ਸੀ ਉਸ ਦਿਨ ਜਦੋਂ ਮੈਂ ਉਨ੍ਹਾਂ ਦਾ ਹੱਥ ਫੜ ਕੇ ਉਨ੍ਹਾਂ ਨੂੰ ਮਿਸਰ ਦੇਸ ਵਿੱਚੋਂ ਕੱਢ ਲਿਆਇਆ। ਕਿਉਂਕਿ ਉਹ ਮੇਰੇ ਨੇਮ ਵਿੱਚ ਕਾਇਮ ਨਾ ਰਹੇ, ਅਤੇ ਇਸ ਲਈ ਮੈਂ ਉਨ੍ਹਾਂ ਵੱਲ ਧਿਆਨ ਨਾ ਦਿੱਤਾ, ਸਾਡਾ ਪਿਤਾ ਆਖਦਾ ਹੈ। ¹⁰ਕਿਉਂਕਿ ਇਹ ਉਹ ਨੇਮ ਹੈ ਜੋ ਮੈਂ ਉਨ੍ਹਾਂ ਦਿਨਾਂ ਤੋਂ ਬਾਅਦ ਇਸਰਾਏਲ ਦੇ ਘਰਾਣੇ ਨਾਲ ਬੰਨ੍ਹਾਂਗਾ, ਸਾਡਾ ਪਿਤਾ ਆਖਦਾ ਹੈ ਮੈਂ ਆਪਣੀਆਂ ਸ਼ਰੀਅਤਾਂ ਉਨ੍ਹਾਂ ਦੇ ਮਨਾਂ ਵਿੱਚ ਪਾਵਾਂਗਾ ਅਤੇ ਉਨ੍ਹਾਂ ਦੇ ਦਿਲਾਂ ਉੱਤੇ ਲਿਖਾਂਗਾ, ਅਤੇ ਮੈਂ ਉਨ੍ਹਾਂ ਦਾ ਪਿਤਾ ਹੋਵਾਂਗਾ, ਅਤੇ ਉਹ ਮੇਰੇ ਬੱਚੇ ਹੋਣਗੇ। ¹¹ਅਤੇ ਹੁਣ ਕੋਈ ਵੀ ਆਪਣੇ ਗੁਆਂਢੀ ਨੂੰ ਅਤੇ ਕੋਈ ਵੀ ਆਪਣੇ ਭਰਾ ਨੂੰ ਇਹ ਆਖ ਕੇ ਨਹੀਂ ਸਿਖਾਵੇਗਾ, “ਸਾਡੇ ਪਿਤਾ ਨੂੰ ਜਾਣ,” ਕਿਉਂਕਿ ਉਹ ਸਾਰੇ ਮੈਨੂੰ ਜਾਣਨਗੇ, ਉਨ੍ਹਾਂ ਵਿੱਚੋਂ ਸਭ ਤੋਂ ਛੋਟੇ ਤੋਂ ਲੈ ਕੇ ਸਭ ਤੋਂ ਵੱਡੇ ਤੱਕ। ¹²ਕਿਉਂਕਿ ਮੈਂ ਉਨ੍ਹਾਂ ਦੀ ਬਦੀ ਉੱਤੇ ਦਯਾ ਕਰਾਂਗਾ, ਅਤੇ ਉਨ੍ਹਾਂ ਦੇ ਪਾਪ ਫੇਰ ਕਦੇ ਯਾਦ ਨਾ ਕਰਾਂਗਾ।”

¹³ਨਵੇਂ ਨੇਮ ਦੀ ਗੱਲ ਕਰ ਕੇ ਉਸ ਨੇ ਪਹਿਲੇ ਨੂੰ ਪੁਰਾਣਾ ਠਹਿਰਾ ਦਿੱਤਾ ਹੈ। ਅਤੇ ਜੋ ਪੁਰਾਣਾ ਅਤੇ ਬੁੱਢਾ ਹੁੰਦਾ ਜਾ ਰਿਹਾ ਹੈ ਉਹ ਆਪਣੇ ਅੰਤ ਦੇ ਨੇੜੇ ਹੈ।