عبرانیوں 8

8 ¹اِس بات کا خلاصہ یہ ہے: ہمارے پاس ایسا سردار کاہن ہے، جو آسمان پر عظمت والے کے تخت کے دہنے ہاتھ جا بیٹھا۔ ²جو مُقدّس مقاموں اور اُس سچّے خیمے کا خادم ہے، جسے باپ نے کھڑا کیا، نہ کہ انسان نے۔ ³ہر سردار کاہن ہدیے اور قربانیاں چڑھانے کے لیے مقرر کیا جاتا ہے؛ پس لازم ہے کہ اِس کے پاس بھی چڑھانے کو کچھ ہو۔ ⁴اگر وہ زمین پر ہوتا تو کاہن ہی نہ ہوتا، کیونکہ شریعت کے مطابق ہدیے چڑھانے والے پہلے سے موجود ہیں۔

⁵وہ آسمانی چیزوں کے نمونے اور سائے کی خدمت کرتے ہیں، جیسا کہ موسیٰ کو خبردار کیا گیا جب وہ خیمہ مکمل کرنے کو تھا: ”دیکھ،“ اُس نے کہا، ”سب کچھ اُسی نمونے کے مطابق بنانا جو تجھے پہاڑ پر دکھایا گیا۔“

⁶لیکن اب یسوع نے ایک برتر خدمت حاصل کی ہے، کیونکہ جس عہد کا وہ درمیانی ہے وہ بہتر ہے، اور بہتر وعدوں پر قائم کیا گیا ہے۔ ⁷کیونکہ اگر وہ پہلا عہد بے عیب ہوتا، تو دوسرے کی ضرورت نہ ہوتی۔

⁸کیونکہ اُن میں عیب پا کر وہ فرماتا ہے: ”دیکھو، وہ دن آ رہے ہیں، ہمارا باپ فرماتا ہے، جب میں اِسرائیل کے گھرانے اور یہوداہ کے گھرانے کے ساتھ ایک نیا عہد باندھوں گا۔ ⁹اُس عہد کی مانند نہیں جو میں نے اُن کے باپ دادا کے ساتھ اُس دن باندھا تھا جب میں نے اُن کا ہاتھ پکڑ کر اُنہیں مصر کی سرزمین سے نکال لیا۔ کیونکہ وہ میرے عہد میں قائم نہ رہے، اِس لیے میں نے اُن سے چشم پوشی کی، ہمارا باپ فرماتا ہے۔ ¹⁰کیونکہ اُن دنوں کے بعد جو عہد میں اِسرائیل کے گھرانے کے ساتھ باندھوں گا وہ یہ ہے، ہمارا باپ فرماتا ہے میں اپنی شریعتیں اُن کے ذہنوں میں ڈالوں گا اور اُن کے دلوں پر لکھوں گا، اور میں اُن کا باپ ہوں گا، اور وہ میرے فرزند ہوں گے۔ ¹¹اور اِس کے بعد نہ کوئی اپنے پڑوسی کو، نہ کوئی اپنے بھائی کو یہ کہہ کر تعلیم دے گا، ”ہمارے باپ کو پہچانو،“ کیونکہ چھوٹے سے لے کر بڑے تک وہ سب مجھے جان لیں گے۔ ¹²کیونکہ میں اُن کی خطاؤں پر رحم کروں گا، اور اُن کے گناہوں کو پھر کبھی یاد نہ کروں گا۔“

¹³نئے عہد کا ذکر کر کے اُس نے پہلے کو پرانا کر دیا ہے۔ اور جو پرانا اور بوسیدہ ہوتا جا رہا ہے وہ مٹنے کے قریب ہے۔