Hebrews 8

8 ¹Di point of all dis one be say: we get such kind high priest, wey sidon for di right hand of di throne of di Majesty for heaven. ²Im be minister of di holy places and di true tabernacle, wey our Papa set up, no be man. ³Dem dey appoint every high priest to offer gift and sacrifice; so dis one too must get something wey e go offer. ⁴If e for dey for earth, e no for even be priest sef, since other people dey offer di gift under di law.

⁵Dem dey serve copy and shadow of di things wey dey heaven, as our Papa warn Moses wen e wan finish di tabernacle: "See," e talk, "make everything follow di pattern wey dem show you for di mountain."

⁶But now Jesus don get ministry wey pass, since di Covenant wey e dey stand for between be better one, wey dem build on top better promises. ⁷Because if dat first Covenant no bin get fault, dem for no need second one.

⁸Because as e find fault wit dem, e talk say: "Look, di days dey come, na our Papa dey talk, wen I go make new Covenant wit di house of Israel and wit di house of Judah. ⁹E no go be like di Covenant wey I make wit dia fathers for di day wey I hold dem for hand lead dem comot from di land of Egypt. Because dem no remain inside my Covenant, so I turn my face from dem, na our Papa dey talk. ¹⁰Because dis na di Covenant wey I go make wit di house of Israel afta dose days, na our Papa dey talk: I go put my laws inside dia mind and write dem for dia heart, and I go be dia Papa, and dem go be my children. ¹¹And person no go teach im neighbor again, and person no go teach im brother again, dey talk say, "Know our Papa," because dem all go know me, from di smallest one among dem reach di greatest. ¹²Because I go show mercy for dia wrongdoing, and I no go remember dia sins again."

¹³As e dey talk about new Covenant, e don make di first one old. And di thing wey don old dey age dey near im end.