اوتورموش باش کاهئنئمئز
بونو بئر جومله داشیییر: بئزئم باش کاهئنئمئز اوتوروب. خئدمت اتدئیی شی بئر صورت دیئل، حقئقی موقدّس مکاندیر، و واسئطه‌چئسی اولدوغو عهد، اِرِمیانین وعده ورئیی عهددئر — احکام ذهئنلره و اورَکلره یازیلیب، گوناهلار آرتیق خاطیرلانمیر، و هر کس آتامیزی تانیر.
8 1بوتون بو سؤزلرئن ماهئیّتی بودور: بئزده بله بئر باش کاهئن وار کی، گؤیده عظمتلی اولانین تختئنئن صاغیندا اوتوردو. 2او، موقدّس یرلرئن و حقئقی خیمه‌نئن خئدمتکاریدیر کی، اونو ائنسان دیئل، آتا قوروب. 3هر باش کاهئن هدئیّه‌لر و قوربانلار تقدئم اتمک اوچون تعیئن اولونور؛ اونا گؤره بونون دا تقدئم اتمه‌یه بئر شیی اولمالی‌دیر. 4اگر او یرده اولسایدی، حتّا کاهئن ده اولمازدی، چونکی شرئعته گؤره هدئیّه‌لری تقدئم ادنلر وار.
5اونلار سماوی شیلرئن صورتئنه و کؤلگه‌سئنه خئدمت ادئرلر، نجه کی، موسا خیمه‌نی قورتارماق اوزره اولاندا خبردار اولوندو؛ اونا ددی: «باخ، هر شیی داغدا سنه گؤرسدئلن نومونه‌یه موطابئق دوزَلت.»
6آمّا ائندی عئسا داها اوستون بئر خئدمته نایئل اولوب، چونکی اونون واسئطه‌سی اولدوغو عهد داها یاخشیدیر و داها یاخشی وعده‌لری اوستونده برقرار اولوب. 7چونکی اگر اوّل‌کی عهد عیبسئز اولسایدی، داها ائکئنجی بئر عهده احتئیاج قالمازدی.
8چونکی اونلاردا تقصئر تاپیب، دیئر: «باخ، او گونلر گلئر، آتامیز بویورور، نه واخت کی، من ائسرایئل نسلی و یهودا نسلی ائله تزه بئر عهد باغلایاجاغام. 9آتالاری ائله باغلادیغیم عهد کئمی دیئل، او گون کی، اونلاری الئندن توتوب مئصئر تورپاغیندان چیخارتدیم. چونکی اونلار منئم عهدئمه باغلی قالمادیلار، اونا گؤره ده اونلارا اعتئنا اتمه‌دئم، آتامیز بویورور. 10چونکی او گونلردن سونرا ائسرایئل نسلی ائله باغلایاجاغیم عهد بودور، آتامیز بویورور: قانونلاریمی اونلارین ذهنلرئنه قویاجاغام و اونلاری اورَکلرئنه یازاجاغام، من ده اونلارین آتاسی اولاجاغام، اونلار دا منئم اؤولادلاریم اولاجاقلار. 11و داها هر کس اؤز قونشوسونا و هر کس اؤز قارداشینا ”آتامیزی تانی“ دیئب اؤیرتمیه‌جک، چونکی لاپ کئچئیئندن لاپ بؤیوینه قدر اونلارین هامیسی منی تانییاجاق. 12چونکی من اونلارین حاقسیزلیقلارینا رحم اده‌جه‌یم و گوناهلارینی بئر داها یادیما سالمایاجاغام.»
13تزه بئر عهد حاقّیندا دانیشیب، بئرئنجئسئنی کؤهنه اتدی. کؤهنه‌لن و قوجالان شی ده آرادان گتمه‌یه یاخیندیر.
