زمونږ مشر کاهن، ناست
یوه جمله ټوله خبره راټولوي: زموږ لوی کاهن کېناست. هغه چې څه ته خدمت کوي نقل نه دی، بلکې اصلي مقدس ځای دی، او هغه لوظ چې هغه یې منځګړی دی هماغه دی چې یرمیاه یې ژمنه کړې وه: قوانین پر ذهنونو او زړونو لیکل شوي، ګناهونه نور نه یادېږي، او هر څوک زموږ پلار پېژني.
8 1د دې خبرې اصل مطلب دا دے چې زمونږ داسې يو مشر کاهن شته چې په آسمان کښې د عظمت د تخت ښى لاس ته ناست دے. 2هغه د مقدس ځايونو او د هغې حقيقى خېمې خادِم دے چې د اِنسان نه بلکې د پلار په وسيله جوړه شوې ده. 3هر مشر کاهن د دې دپاره مقرر کيږى چې نذرانې او قربانۍ وړاندې کړى، نو دې ته هم لازم دى چې د وړاندې کولو دپاره څۀ ولرى. 4کۀ هغه په زمکه باندې وَے، نو هغه به کاهن هم نۀ وو، ځکه چې نور خلق د شريعت مطابق نذرانې وړاندې کوى.
5دوئ د آسمانى شيانو د نقل او سيورى خدمت کوى، لکه څنګه چې موسىٰ ته هغه وخت خبردارے ورکړے شو چې کله هغه د خېمې بشپړولو ته نزدې وو: ”وګوره،“ هغۀ وفرمائيل، ”هر څيز د هغه نمونې مطابق جوړ کړه چې تا ته په غر باندې وښودلے شو.“
6خو اوس عيسىٰ يو غوره خدمت حاصل کړے دے، ځکه چې هغه لوظ چې هغه يې منځګړے دے غوره دے، او په غوره وعدو باندې قائم شوے دے. 7ځکه چې کۀ هغه اول لوظ بېعيبه وَے، نو د دوېم لوظ اړتيا به نۀ وه.
8ځکه چې هغۀ په هغوئ کښې عيب وموندلو، نو فرمائى، ”وګوره، هغه ورځې راروانې دى، زمونږ پلار فرمائى، چې زۀ به د اِسرائيل د کور او د يهوداه د کور سره يو نوے لوظ وکړم. 9دا به د هغه لوظ په شان نۀ وى چې ما د هغوئ د پلارانو سره په هغه ورځ وکړو کله چې ما هغوئ په لاس ونيول چې د مصر د مُلک نه يې بهر راوباسم. ځکه چې هغوئ زما په لوظ کښې قائم پاتې نۀ شول، نو ما هغوئ پرېښودل، زمونږ پلار فرمائى. 10ځکه چې د هغو ورځو نه پس زۀ به د اِسرائيل د کور سره دا لوظ وکړم، زمونږ پلار فرمائى: زۀ به خپل شريعت د هغوئ په ذهنونو کښې کېږدم او د هغوئ په زړونو باندې به يې وليکم، او زۀ به د هغوئ پلار شم، او هغوئ به زما بچى شى. 11او بيا به هيڅوک خپل ګاونډى او خپل ورور ته تعليم ورنۀ کړى چې، ”زمونږ پلار وپېژنه،“ ځکه چې د کوچنى نه تر مشر پورې به هغوئ ټول ما وپېژنى. 12ځکه چې زۀ به د هغوئ د بدکارۍ نه درګذر وکړم، او د هغوئ ګناهونه به بيا هيچرې نۀ يادوم.“
13د نوى لوظ د ذِکر کولو سره، هغۀ اول لوظ زوړ کړو. او هغه څۀ چې زوړ او کهنه شى، هغه د له منځه تلو ته نزدې دے.
