Mbuta-nganga wetu Wuzakadini
Ndinga yimosi yisi nata dyawu: mbuta-nganga wetu wázakala. Kina kisi sadila kikalaku kifwani, kaasi sombolu dya kyedika; amana bulunda buna kenina mukhundingisi, bwenina bulunda buna Yelemiya kázimbula, yi mitsiku myasonama muna ngangu yi muna mbundu, masumu makábanzwaku hika, amana boosu bakazaya Tata wetu.
Tata wetu kisi zonza mu mavese 5, 8–12
8 1Dyadi dyenina dyambu dya mfunu mu mamana tuzimbudini: betu twenina yi mbuta-nganga wa phila yina, wuna wázakala kuna koku dya kitata dya kiti kya luyalu kya Kineni, muna mazilu. 2Yandi kenina musadi wa bizika byahedila yi wa sombolu ya kyedika, yina Tata káhanga, kaasi keku mutu. 3Mbuta-nganga wosu, bawu bisi sikununa mu kutambika bimenga yi makabu kwena Nzambi; buna yandi phi kafweti kala yi kima kya kutambika. 4Yuka ni yandi kakala ha tsi, kalendaku kala ho nganga-Nzambi, mukuma bakwawu bisi tambika makabu bwosu milombini mitsiku.
5Bawu bisi sadila kifwani yi kininga kya bima bya mazilu, bwosu bakebisa Moyize tangwa kakala bela-bela yi kumanisa sombolu: «Tala,» wázimbula, «hanga byosu bwosu mbandu yina basongila ngeyi ku mongu.»
6Kaasi buthwena Yesu wábonga kisalu kina kiluti kitoku, mukuma bulunda buna kenina mukhundingisi buluti kitoku, bwazayakana ha bilangi bina biluti kitoku. 7Mukuma, yuka ni bulunda bwa theti bwana bwakala konda kifu, buna kwakalaku yi mupfunu wa bulunda bwa zodi.
8Mukuma, buna kámona kifu mwena bawu, wisi zimbula: «Tala, bilumbu bisi kwisa,» kazimbudini Tata wetu, «tangwa dina yikayíta bulunda bwa pha yi nzu ya Kiseledi yi nzu ya Yuta. 9Bwisiku fwanana yi bulunda buna yáyita yi bakhaka bawu muna kilumbu kina yábasimba ku koku kikuma kya kubalubula mu tsi ya Ngiphiti. Mukuma kábanangaku mu bulunda bwama, buna yábayambula,» kazimbudini Tata wetu. 10«Mukuma, bwawu bwenina bulunda buna yikayíta yi nzu ya Kiseledi ku manima ma bilumbu byabina,» kazimbudini Tata wetu, «yikasía mitsiku myama muna mabanza ma bawu, amana yikasónika myawu muna mbundu ya bawu, amana yikála Tata wawu, amana bawu bakála bana bama. 11Amana ka kosu mutu ku kalonga hika mukwandi, holo phangi wandi, mu kuzimbula: “Zaya Tata wetu,” mukuma bawu boosu bakánzaya, tukidila kwena baleki ba bawu tii kwena bambuta. 12Mukuma yikabafwíla khenda mu kukonda kwa masonga kwawu, amana yikayúbukaku hika masumu ma bawu.»
13Mu kuzimbula bulunda bwa pha, wátula bwa theti bwa nunu. Amana kina kyenina kya nunu amana kyeti nunuka, kyenina bela-bela yi kumana.
