Ani om Takolu, Badung Ongnu
Chong khatchana ha ding pon rwe: ani om Ngam lian takolu ga hung ongta rwe. Maanna chwanlaang tonu ga bakatha make atiyeda bataknu Bathiangnu Riak gaye, khatle Maanna thwei bi ongnu chonghen ga Jeremiah na karen thang damnu haba gaye, chongtan bing ga lungning khatle lung sung bi hiak thangluga, noh bing ga lat lan han baninglaye, khatle mi pumna ani Pa ding theilune.
Ani Pa na chongkhak hei bing bi kabia nge 5, 8–12
8 1Hei bing nga ani rinnu om bataknu ga heiye: tambaan la Ngam lian kataknu om takung riak om kut inchang la ongta damnu hadannu Takolu khat ani khou amme. 2Misa na make atiyeda Pa na kathang swak thangnu bazenu pwan in khatle Bathiang Kataknu Riak om chwanlaang mi gaye. 3Takolu bing mi khat khat leithwan khatle rikhaang pot kat lang hap thang nge; atibriakpina hei Takolu le kat ding pot khat bathaang amme. 4Maan talei ram la ong damnu dabe, Maan rikhaang pot tonu le tolaye, balangbe chongtan nung suiga katei nunna leithwan bing ding kat ongme.
5Banina tambaan thinu om bahak le bakatha ding chwanlaang to ongme. Moses na pwan in som thang lang nai hungnu kaan bi bakhou rin thang ngaaknu danga, Maanna rinne, “Phaang ngo, rammwan la nangkhou pi mu thangnu chaang nung suiga pot bing nga to thang ngo.”
6Atiyeda atun Jisu na sa inkunu chwanlaang lousu rwe, balangbe Maan thwei bi ongnu chonghen ga sa inkunu gaye, hagaba sa inkunu chongren bing lu chung bi kathang swak thangnu gaye. 7Balangbe haba kamanu chonghen ga koi maaknu ong damnu dabe, kaninu lang bathaang amlaye.
8Balangbe Maanna bani khou koi zongsuga rinne, “Phaang ngo, lumik bing hunglu rwe diga ani Pa na rinne, habei ga Eina Israel in le khatle Judah in le chonghen kathan tolune. 9Eina bani pu pa rwan ding Egypt talei ram pina pi lwang thang lang bakut nung lou ngaaknu lumik pi bani le tonu chonghen danga make. Balangbe bani nun Achonghen bi am dam make, atibriakpina Eina bani ding ngaak thang dam make, diga ani Pa na rinne. 10Balangbe haba lumik bing nung la Eina Israel in le tolune chonghen ga heiye diga ani Pa na rinne, Eina Aom chongtan bing bani lungning bi thanglune khatle bani sung bi hiak thangne, atiga Eina bani om Pa tolune, atiga bani Ating sa rwan tolune. 11Atiga pakhat khatna baom innai lounai ding, khatle pakhat khatna bau banao ding, ‘ani Pa ding theiyo,’ diga bachu thang dam laye, balangbe bani mi bing zana Ei ding thei thanglune, bani lak pi kasinnu bina kaliannu tangga. 12Balangbe Eina bani om ririak se maknu chwan bing ding phaangkriang theilune, khatle bani noh bing ding Eina baningsu dam laye.”
13Chonghen kathan diga rinnu bina, Maanna kamanu chonghen ga chang thang rwe. Atiga kachang khatle kasei ongnu pot ga baloi nai hunglu rwe.