Kemütha Poba

Kemethae 'nace pünulü' meve phu, mu cejü hio tüce Kemethae Jihova kemecu mu seyi kemola thüma sheri ngo—Jihova za lü kha po, ha Po za khatho po. Vele pü be mha metülü ngo: chobazo pü mhakha kekro metü pü be celü vori.

Kezhü 1.

Hiko David nu, Jerusalemlü küchothe keba Kemetha jüko zo. ^a “Kebaceri vava,” zi Kemetha poti, “kebaceri vava! Mha metü kebacerizo.”

Thüma pü nace pünulü kümüzhe de mhatho thi metü celü dipü meve ngoyi veta? Nuhü pü taprata, mu nuhü kekre vori, vele cejü süo kechothe basü tayo. Nace thosü, mu nace mülü va, mu pü dipüce thosü süo lüce sala vori keto zü rephü tayo. Tükhra pü mekhroco khra vo die, mesoco la vata; kezü kezü pü ta, pü chode lü mütütata sala vori tayo. Jü rela metü jükezho lü rela, vele jükezho süo kechothe chu mo; jü rela süko uvori sheli lüce sala vo die, kekre rela tayo. Thino metü nyü kethozo, thüma pü poyi hoketala; mhü pü peo lü megu mo, uni ri keso lü chu mo. Kebapü süo, süo kebato süo bizo, mu mhatho thipü süo, süo mhatho thito süo bizo; nace pünulü mha kesa nothi bamo. Thüma pü mhapühri tie de poyi süo ba veta, “Hihe, hio kesazo”? Süo ha therace kebapü ketholü hilü va bazo. Therace kebapü rekra pü bamo, mu hü vorito kekreko, puko sameji vorito kekro rekra sayi hozo.

Solomon Jü Kephu

I, Kemetha, Jerusalemlü Israel yolü küchothe batazo. I a melü prü die, tüyo pünulü mhatho thipü metü mhase celü phu de jüyi ketola thehe thita—hio Jihovae thüma nuko metsuyi ketola khapü mha hesheherü zo. I nace pünulü mhatho thipü metü zowe, mu hihe—süo metü kebaceri zo, tükhra samüdzi keta bizo. Mha kerevi pü kemezi tayi hozo, mu mha tsomopü süo keri yi hozo. I atho azüce po die, “Hihe, I küdi süta mu a hü kebapü Jerusalem yolü küba metü ceri mhase kekro prarita; a melü mhase mu mhashe kekro peba zo.” I mhase mu kemelo mu künyo seyi ketola a melü prüta; hio zori tükhra samüdzi keta bizo zi I seyita. Kekrelamori mhase kekrolü su kekro vori, mu mhashe kekro lize, lüzhie kekro bazo.