Jeremiah 14

14 ¹Kazing kakāngwui pongli Jeremiahli rākahai ithumwui Avāwui tui chi hina: ²Judahna chapngachai, kala awui ngaveibing kha̱mi maleila ngachakyānghaira; awui mibingna ngaleitungli sifada pama, kala Jerusalemwui eina khavao chuimei ngasaka.

³"Khangambingna awui raobingli tara̱wui vang chihovai; athum ra̱khongli vāda tara̱ masamphangmana. Athumwui hambing khamasai eina unglui; athum khayak ngasakta pa̱ngapāmihaira, kala athumna akui farorhaira. ⁴Ngaleili kazing maro maleimana, kala ngaleina sākhayanghaiwui vang lui khavābingna khayak ngasaka; athumna akui farorhaira. ⁵Luili khalei chaonala awui pharādhadhar chaonao chili horhaira, kaja khawo maleimana. ⁶Kharar gadhābingna kaphung ngachaktingli nganinga; athum ramfa thāda masiwui vang honpama; athumwui mikla māmāchahaira kaja khawo maleimana. ⁷'O ithumwui Avā, ithumwui moreibing china ithumli makhamayā hānglala, nawui mingwui vang eina sālu; kaja ithumna nawui eina kachi-kachi ngalanhaowa; ithumna nali morei sāhaira. ⁸Israelwui kachihān, kasak kharā tharan Israelwui Huikhame, na kathada ngaleili kha̱mi akha thāda, ngayā kasaikha ngasāmkhui ramkazata akha thāda leikhala? ⁹Na kathada kashuirak eina matakhak kahai mi akha thāda, makashok kahai raimi akha thāda leikhala? Chithālala na, ithumwui Avā, ithumwui alungli leilaka, kala ithumli nawui mingna hoya; ithumli mahorhaialu!'

¹⁰"Ithumwui Avāna mi hibingwui pongli hithāda hānga: 'Athumna thuihaizatli khamathān eina leishihaowa; athumna aphei mangarinmana. Chiwui vang ina athumli ningyāng maungmana; ara ina athumwui khayonkhamāng phaningungra, kala athumwui moreibing chili tandi mira.'

¹¹"Chieina ithumwui Avāna ili hānga, 'Mi hibingwui khamathāwui vang seihā masālu. ¹²Athumna khum tharan, ina athumwui khavao mashāmara; athumna rikkatā kachigat kala athei-arai kachigat chigat tharan, ina athumli maphāmara. Ina athumli raighai, chāmrei, kala kazātkashi eina sāthengmira.'"

Ithumwui Avāwui Ming Eina Kakapik Kasā Marānbing

¹³Chieina ina hānga, "Ah, Proho Avā, yanglu, marānbingna athumli hānga, 'Nathumli raighai maramara, kala chāmrei nathumli maramara, kha ina hipamli nathumli katang makhavai chingrihai michingra.'"

¹⁴Chieina ithumwui Avāna ili hānga, "Marānbingna iwui ming singlaga kakapik marānmi. Ina athumli kachiho maningmana, kaso maningmana, lah athumli hāng maningmana. Athumna nathumli kakapik khamahā, arema khanong, kala athumwui khalatta ningwui kakapik marānmi. ¹⁵Ina athumli machiholala iwui ming singlaga marān kasā, 'Raighai lah chāmreina ngalei hili masāza̱mara' da kahāng marānbingwui pongli ithumwui Avāna hithāda hānga: raighai kala chāmrei eina marānbing chi thihaora. ¹⁶Athumna marānmi kahai mibing chi chāmrei kala raighai eina Jerusalemwui chānreili horsangmihaora, athum, athumwui preiva̱bing, naomayarabing, kala naongalāva̱bingli chifa khavai khipākha maleimara. Ina athumwui khalatta makaphā chi athumtungli heirora.

¹⁷Athumli hi hānghaolu: 'Imikna ngayā kala zimik chāra̱ kong thāda longtāranu, mathāhaila, kaja iwui mibingwui kachingva̱ naongalāva̱ chi kharita kashao eina, marai kapaia khamā eina sākhayanghaira. ^a a v17 Hipamli ithumwui Avāna Jeremiahli akhalatta chāra̱ singkahai tuibing michinga — raikhavai maleimana khamā kalei naobingwui vang Avā akhawui wukkakhanang, athumwui vang ngayā kala zimik chapngachāda.

¹⁸Ina luili shoklakha, raighai eina sāthat kahaibing chili pitāhaira; keinung chili kazanglakha, chili chāmreina sākazama. Kaja marānla, pāngmonla tangda makathei ramli athumwui leih sāzata.'"

¹⁹Nana Judahli katonga khalanhaira? Nawui ning Zionli thenghaira? Khisāda nana ithumli hortahaida ithumwui vang raikhami maleikhala? Chingri kahai ithumna phai, kha khamathā akhala maleimana; raikhavai khamā atam ithumna phai, kha khangacheemāng chi ithumli samphanga. ²⁰O ithumwui Avā, ithumna ithumwui makaphā makhayā kala ishāvā ngarāwui khayonkhamāngla hāngphatli; ithumna nali morei sāhaira. ²¹Namingwui vang eina ithumli maningkachaialu; nawui tekhamatei wungpamkhong makhayak ngasakalu. Ithumli sākahai nawui tuingashit chi phaningunglu, kala chi makaila mayonlu. ²²Yurbingwui aremawui meoma̱bing chiwui eina akhana kazing romishaprala? Kazingram khalattana zingrot rotāmishaprala? Nava maningmala, O ithumwui Avā? Ithumna nawuili chihāna, kaja ot saikora hi nana sai.