Jeremaya 14 FHB Father's Heart Bible™

14 ¹Nke a bụ okwu Nna anyị nke bịakwutere Jeremaya banyere oké ọkọchị ahụ: ²Juda na-eru ụjụ, ọnụ ụzọ ama ya tọgbọrọ nʼefu; ndị ya nọdụrụ ala nʼiru ụjụ, mkpu akwa sikwa na Jerusalem na-arịgo elu.

³“Ndị a ma ama na-eziga ndị ohu ha ka ha chọta mmiri; ha na-aga nʼolulu mmiri ma ha ahụghị mmiri ọbụla. Ha ji ite ha dị oghe na-alọghachi; ihere na-eme ha, a wedakwara ha nʼala, ha na-ekpuchi isi ha. ⁴Nʼihi na ala gbawara agbawa, ebe ọ bụ na mmiri ezobeghị nʼala ahụ, ihere na-eme ndị ọrụ ubi; ha na-ekpuchi isi ha. ⁵Ọbụladị nne ele nọ nʼọhịa na-ahapụ nwa ele ọ ka mụrụ ọhụrụ nʼihi na ahịhịa adịghị. ⁶Ịnyịnya ọhịa na-eguzo nʼelu ugwu gba ọtọ; ha na-ekupụ ume ike ike dịka nkịta ọhịa; anya ha na-ada mba nʼihi na ahịhịa adịghị. ⁷‘Ọ bụ ezie na mmehie anyị na-agba ama megide anyị, mee ihe, Nna anyị, nʼihi aha gị; nʼihi na anyị esitela nʼebe ị nọ gbahapụ ugboro ugboro—anyị emehiela megide gị. ⁸Olileanya Izrel, Onye Nzọpụta Izrel nʼoge nsogbu, gịnị mere i ji dịrị ka ọbịa nʼala ahụ, dịka onye njem nke na-akwụsị maka naanị otu abalị? ⁹Gịnị mere i ji dịrị ka onye ihe tụrụ nʼanya na mberede, dịka dike nʼagha nke na-enweghị ike ịzọpụta? Ma gị, Nna anyị, nọ nʼetiti anyị, a na-akpọkwa anyị aha gị; ahapụla anyị!’

¹⁰“Nke a bụ ihe Nna anyị kwuru banyere ndị a: ‘Ha hụrụ ịwagharị nʼanya nke ukwuu; ha ejideghị ụkwụ ha. Ya mere, enweghị m mmasị nʼebe ha nọ; ugbu a, aga m echeta ikpe ọmụma ha ma taa mmehie ha ahụhụ.’”

¹¹“Mgbe ahụ, Nna anyị gwara m, sị, ‘Ekpela ekpere maka ọdịmma ndị a. ¹²Mgbe ha buru ọnụ, agaghị m anụ mkpu akwa ha; mgbe ha na-achụ àjà nsure ọkụ na onyinye mkpụrụ ọka, agaghị m anabata ha. Aga m eji mma agha na ụnwụ na ọrịa na-efe efe kwụsị ha.’”

Ndị amụma na-agha ụgha nʼaha Nna anyị

¹³Mgbe ahụ, asịrị m, “Ewoo, Nna anyị, Onye na-achị ihe niile, lee—ndị amụma na-agwa ha, sị, ‘Unu agaghị eche mma agha ihu, ụnwụ agaghịkwa abịakwasị unu, kama m ga-enye unu udo na-adịgide nʼebe a.’”

¹⁴Mgbe ahụ, Nna anyị gwara m, sị, “Ndị amụma na-ebu amụma ụgha nʼaha m. Ezipụghị m ha, enyeghị m ha iwu, agwaghịkwa m ha okwu. Ha na-ebu amụma nye unu ọhụụ ụgha, ịgba afa na-abaghị uru, na aghụghọ nke obi nke aka ha. ¹⁵Nke a bụ ihe Nna anyị kwuru banyere ndị amụma ahụ na-ebu amụma nʼaha m, ọ bụ ezie na ezipụghị m ha, bụ ndị na-asị, ‘Mma agha maọbụ ụnwụ agaghị emetụ ala a aka’: Ọ bụ mma agha na ụnwụ ka ndị amụma ahụ ga-eji nwụọ. ¹⁶Ndị ahụ ha na-ebu amụma nye ha ka a ga-atụpụ nʼokporo ámá Jerusalem site nʼụnwụ na mma agha, ọ dịghịkwa onye ga-eli ha—ha onwe ha, ndị nwunye ha, ụmụ ha ndị ikom, na ụmụ ha ndị inyom. Aga m awụkwasị ha ajọ omume nke aka ha.

¹⁷Gwa ha ihe a: ‘Ka anya m na-asọ anya mmiri ehihie na abalị, nke na-adịghị akwụsị, nʼihi na ada na-amaghị nwoke nke ndị m ka e tiwara etiwa site nʼoke mmerụ, ọnya nke a na-apụghị ịgwọ agwọ. ^a a v17 Nʼebe a, Nna anyị na-enye Jeremaya okwu ndị bu anya mmiri nke aka ya—iru ụjụ nke Nna maka ụmụ e merụrụ ahụ nke a na-apụghị ịgwọ agwọ, onye na-ebere ha akwa ehihie na abalị.

¹⁸Ọ bụrụ na m pụọ gaa nʼọhịa, lee ndị e ji mma agha gbuo tọgbọ nʼebe ahụ; ọ bụrụ na m banye nʼobodo, lee mbibi nke ụnwụ dị nʼebe ahụ. Nʼihi na ma onye amụma ma onye nchụàjà na-arụ ọrụ ha nʼala ha na-amaghịdị.’”

¹⁹Ị jụkwaala Juda kpamkpam? Obi gị ọ na-asọ Zayọn oyi? Gịnị mere i ji tigbuo anyị nke mere na ọgwụgwọ adịghị nye anyị? Anyị lere anya udo, ma ọ dịghị ihe ọma bịara; anyị tụrụ anya oge ọgwụgwọ, ma kama ya, ọ bụ oke egwu dị. ²⁰Anyị na-ekweta ajọ omume anyị, Nna anyị, na ikpe ọmụma nke ndị nna anyị ochie; anyị emehiela megide gị. ²¹Nʼihi aha gị, eledala anyị anya; emenyela ocheeze gị dị ebube ihere. Cheta ọgbụgba ndụ gị na anyị gbara, emebila ya. ²²Enwere arụsị efu ọbụla nke mba niile nke pụrụ iweta mmiri ozuzo? Mbara eluigwe nʼonwe ya ọ pụrụ izite mmiri ozuzo? Ọ bụghị gị, Nna anyị? Anyị na-atụkwasị gị olileanya anyị, nʼihi na ọ bụ gị na-eme ihe ndị a niile.