Jeremiah 13

13 ¹Ithumwui Avāna ili hithāda hānga: "Vālu, nakhalattawui vang khamanaka shānneira̱ akha lokhuilu, chi nawui kashānli neikhuilu, kha chi tara̱li masingza̱ngasakalu."

²Chieina ithumwui Avāna hānghai thāda, ina shānneira̱ chi lokhui, kala chi iwui kashānli neikhui.

³Chieina ithumwui Avāwui tui china kakhaneshida ili rāhānga:

⁴"Nawui lokhui, nawui kashānli khalei shānneira̱ chi khuiphunglaga, ngakarthuida Euphratesli vālu, kala chi lunghengtungli ngathumhaolu."

⁵Chieina ithumwui Avāna ili kaso thāda, ina vāda Euphratesli chi ngathumhaowa.

⁶Atam kachungkha okthuihaiwui thili, ithumwui Avāna ili hānga, "Ngakarthuida Euphratesli vālu, kala ina apam chili ngathum khavai hānghai shānneira̱ chi khuiphunglu."

⁷Chieina ina Euphratesli vāda, shānneira̱ chi chuida sokhui, ina ngathumhai apam eina chi khuiphungthui. Kha chi kānhaida, khikha makānkhanā ngasāhaowa.

⁸Chieina ithumwui Avāwui tui china ili rāhānga:

⁹"Ithumwui Avāna hithāda hānga: Chithāda ina Judahwui langkaso kala Jerusalemwui langkaso kahakva chi sāshimānra. ¹⁰Makaphā mibing, iwui tui manganāsangbing, khalattawui ngakaishitingting kahai ning shurbing, khangatei varebing shurda athumli otram ngatha̱da khorum khavai kasābing hi, khikha makānkhanā shānneira̱ hi thāda ngasāra. ¹¹Shānneira̱ mi akhawui kashānli shai thāda, chithāda athum iwui mibing, iwui ming, iwui masot, kala iwui tekhamatei ngasā khavai, ina Israelnaobing saikora kala Judahnaobing saikorali iwuili shaisangngasaka, da ithumwui Avāna hānga; kha athumna manganāsangmana.

Ham Kachida Bichar eina Pemhaira

¹²"Chieina athumli hānglu: Israelwui Avāna hithāda hānga: Ham kachida drakhāra̱na pemra. Athumna ngahānkāra, 'Ham kachida drakhāra̱na pemra kaji ithumna matheimala?' ¹³Chieina athumli hānglu: Ithumwui Avāna hithāda hānga: Ina ngalei hili khalei mi saikorali, Davidwui wungpamkhongli pamkasā awungabing, pāngmonbing, marānbing, kala Jerusalemli khalei saikorali khamarip eina chipemngasakra. ¹⁴Ina avā ngarā eina naongarā ngarumda athumli akha akhawui pongli ngaphithaitāra, da ithumwui Avāna hānga. Athumli sāshimānda ina lukhamashan khavai, mayang khavai, phaningkhami khavai maleimara."

Tangkhamang Kharāranglakha Nganālu

¹⁵Nganālu, kala nganātitkhuilu; langkaso masaalu, kaja ithumwui Avāna hānghaira. ¹⁶Nathumwui Avāli tekhamatei ngasaklu, a tangkhamang chihoranglakha eina tangda, nathumwui phei tangmangting kahai kaphungbingli ngaphokranglakha eina tangda; nathumna kahor chihānra, kha ana chili tangmangting kahaili onngasakra, kala tangkhamang serhaora. ¹⁷Kha kalikha nathumna manganāsangakha, ina nathumwui langkasowui vang ngathumda chapra; iwui mikna soso chapta, chāra̱ kong thāda longra, kaja ithumwui Avāwui yao ashangva̱ chi tukvā kahaina. ¹⁸Awungali kala awungva̱ masāli hānglu: Nathum khalatta malungnimlu kala pamzanglu, kaja nawui tekhamatei kuihon nawui kuiwui eina tātunghaira. ¹⁹Negebwui keinungbing shunghaira, chi shokhavai khipākha maleimana. Judah saikora raithā kahaida khuikhavāhaira, khuiungchaohaira. ²⁰Namik reilaka atungshongwui eina kharābing chi yanglu. Nali mikahai yao ashangva̱, nawui khamathā yao ashangva̱ chi kali leikhala? ²¹Ithumwui Avāna nakhalattana tamchithei kahai nawui khangachonbing chi nawui tungli khamunga sāngasak tharan, nana khi hāngrakhala? Sha̱naona naokhara̱ kachot thāda, kachot nawuitungli rāra maningmala? ²²Kala nana nakhalatta, "Khisāda hi otbing iwuitungli shokkahaikhala?" da ngahānakha, chi nawui khayonkhamāngwui khareiwui vang eina nawui kashan raimihaira, kala na ngarāhaira. ²³Ethiopianaona awui phasā chanshapra̱khala, lah kuirāngna awui chukkhara̱? Chithākha makaphā sākhavai tamchithei kahai nala kaphā sāshapra. ^a a v23 Cush hi Egyptwui azingshong khalei ngalei sai, Nile kongwui kajushongli, ara atamwui Sudan eina Ethiopia ramshongli.

²⁴Ina nali siwukwui masina phanthui kahai lanji thāda yaovāserra. ²⁵Hi ina nali ngarakkhami kahai nawui yar china, da ithumwui Avāna hānga, khikhalajila nana ili malaihaira, kala khanguili shitsanga. ²⁶"Chiwui vang ina khalattana nawui kashan chi nawui namaiwui khalei lānkāmira, kala nawui khayākhamalā theihaora. ²⁷Nawui phokaphā saikora, nawui khamathang-khamarangwui khon, nawui kakhayak makathei khayor otsak, kaphungli kala khamashā apamli nawui ningkakachai otsak ina theihaira. Kakhanang nawui ngasāranu, O Jerusalem! Karankha eina tangda na thara ngasakrakhala?"