ኤርምያስ 13

13 ¹አባታችን እንዲህ አለኝ፤ “ሂድ፣ የተልባ እግር ዝናር ለራስህ ግዛ፤ በወገብህም ላይ አድርገው፤ ውሃ ግን አይንካው።”

²አባታችን እንደ ተናገረም ዝናሩን ገዛሁ፤ በወገቤም ላይ አደረግሁት።

³ከዚያም የአባታችን ቃል ለሁለተኛ ጊዜ ወደ እኔ መጣ፤

⁴“የገዛኸውን ዝናር፣ በወገብህ ላይ ያለውን ውሰድ፤ ተነሥተህ ወደ ኤፍራጥስ ሂድ፤ በዓለቱም ንቃቃት ውስጥ ደብቀው።”

⁵አባታችን እንዳዘዘኝም ሄጄ በኤፍራጥስ አጠገብ ደበቅሁት።

⁶ከብዙ ቀናት በኋላ አባታችን እንዲህ አለኝ፤ “ተነሥተህ ወደ ኤፍራጥስ ሂድ፤ በዚያ እንድትደብቀው የነገርሁህን ዝናር አምጣ።”

⁷ወደ ኤፍራጥስም ሄጄ ዝናሩን ቈፍሬ አወጣሁ፤ ከደበቅሁበትም ቦታ ወሰድሁት። ነገር ግን ተበላሽቶ ለምንም የማይጠቅም ሆኖ ነበር።

⁸ከዚያም የአባታችን ቃል ወደ እኔ መጣ፤

⁹“አባታችን እንዲህ ይላል፤ እንዲሁ የይሁዳን ኵራትና የኢየሩሳሌምን ታላቅ ኵራት አበላሻለሁ።” ¹⁰ቃሌን ለመስማት እምቢ ያለው፣ የልቡን ግትርነት የተከተለው፣ ሊያገለግላቸውና ሊሰግድላቸው ሌሎች አማልክትን የተከተለው ይህ ክፉ ሕዝብ፣ ለምንም እንደማይጠቅመው እንደዚህ ዝናር ይሆናል። ¹¹ዝናር በሰው ወገብ ላይ እንደሚጣበቅ፣ እንዲሁ እስራኤልን ሁሉና ይሁዳን ሁሉ ከእኔ ጋር አጣበቅሁ፤ ይላል አባታችን፤ ሕዝቤ፣ ዝናዬ፣ ምስጋናዬና ክብሬ እንዲሆኑ ነበር፤ እነርሱ ግን አልሰሙም።

እያንዳንዱ ማሰሮ በፍርድ ተሞላ

¹²“ስለዚህ እንዲህ ብለህ ንገራቸው፤ የእስራኤል አብ እንዲህ ይላል፤ እያንዳንዱ ማሰሮ የወይን ጠጅ ይሞላል። እነርሱም፣ ‘እያንዳንዱ ማሰሮ የወይን ጠጅ እንደሚሞላ አናውቅምን?’ ብለው ይመልሳሉ። ¹³ከዚያም እንዲህ ብለህ ንገራቸው፤ አባታችን እንዲህ ይላል፤ በዚህ ምድር የሚኖሩትን ሁሉ፣ በዳዊት ዙፋን ላይ የሚቀመጡትን ነገሥታት፣ ካህናቱን፣ ነቢያቱንና በኢየሩሳሌም የሚኖሩትን ሁሉ በስካር ልሞላቸው ነው። ¹⁴እርስ በርሳቸውም እጋጫቸዋለሁ፤ አባቶችንና ልጆችን እኩል፤ ይላል አባታችን። ከማጥፋታቸው ርኅራኄ፣ ይቅርታ ወይም ምሕረት አያግደኝም።”

ጨለማ ከመውረዱ በፊት ስሙ

¹⁵ስሙ፣ አድምጡም፤ አትታበዩ፤ አባታችን ተናግሯልና። ¹⁶ጨለማ ከማምጣቱ በፊት ለአባታችሁ ክብር ስጡ፤ እግሮቻችሁ በሚጨልሙት ተራሮች ላይ ከመሰናከላቸው በፊት፤ ብርሃንን ትጠብቃላችሁ፤ እርሱ ግን ወደ ጥቅጥቅ ጨለማ ይለውጠዋል፤ ፍጹም ጨለማም ያደርገዋል። ¹⁷ባትሰሙ ግን ስለ ትዕቢታችሁ በስውር አለቅሳለሁ፤ ዓይኖቼ መራራ ልቅሶ ያለቅሳሉ፤ በእንባም ይፈሳሉ፤ የአባታችን መንጋ ተማርኳልና። ¹⁸ለንጉሡና ለእቴጌይቱ እንዲህ በል፤ ራሳችሁን ዝቅ አድርጉ፤ ተቀመጡም፤ የክብራችሁ ዘውድ ከራሳችሁ ወድቋልና። ¹⁹የኔጌቭ ከተሞች ተዘግተዋል፤ የሚከፍታቸውም የለም። ይሁዳ ሁሉ ወደ ምርኮ ተወስዷል፤ ፈጽሞ ተማርኳል። ²⁰ዐይንሽን ቀና አድርገሽ ከሰሜን የሚመጡትን ተመልከቺ። የተሰጠሽ መንጋ፣ ያ ውቡ መንጋሽ የት አለ? ²¹ራስሽ ወዳጆችሽ እንዲሆኑ ያሠለጠንሻቸውን አባታችን በላይሽ ገዥዎች አድርጎ ሲሾም ምን ትያለሽ? ምጥ እንደ ያዛት ሴት ሥቃይ አይይዝሽምን? ²²በልብሽም፣ “ይህ ነገር ለምን ደረሰብኝ?” ብትዪ፣ ቀሚስሽ የተገፈፈውና አንቺ የተዋረድሽው ስለ በደልሽ ብዛት ነው። ²³ኢትዮጵያዊ ቈዳውን፣ ወይስ ነብር ዝንጕርጕርነቱን ሊለውጥ ይችላልን? እንግዲያስ ክፉ ለማድረግ የለመዳችሁ እናንተም መልካም ማድረግ ትችላላችሁ። ^a a v23 ኩሽ ከግብፅ በስተደቡብ፣ በላይኛው ዓባይ ዳር የነበረ፣ በአሁኑ ዘመን ሱዳንና ኢትዮጵያ ባሉበት አካባቢ የሚገኝ ምድር ነበር።

²⁴የምድረ በዳ ነፋስ እንደሚያበረው ገለባ እበትንሻለሁ። ²⁵ዕጣሽ ይህ ነው፤ ረስተሽኛልና በሐሰትም ታምነሻልና የለካሁልሽ ድርሻ ይህ ነው፤ ይላል አባታችን። ²⁶“ስለዚህ እኔ ራሴ ቀሚስሽን በፊትሽ ላይ እገልጣለሁ፤ ኀፍረትሽም ይታያል። ²⁷ምንዝርናሽን፣ የፍትወትሽን ጩኸት፣ ነውረኛ ዝሙትሽን በኰረብቶችና በሜዳ ላይ የፈጸምሻቸውን አስጸያፊ ሥራዎችሽ አይቻለሁ። ኢየሩሳሌም ሆይ፣ ወዮልሽ! እስከ መቼ ድረስ ነው የማትነጺው?”