ኤርሚያስ 13 FHB Father's Heart Bible™

13 ¹ኣቦና ከምዙይ በለኒ፦ “ኪድ፥ ዕጣቕ ተፍ ንባዕልኻ ዓድግ፥ ኣብ ሕቘኻ ኸዓ ተዓጠቐ፤ ግና ማይ ኣይተንክኣዮ።”

²ከምቲ ኣቦና ዝበሎ ድማ ነቲ ዕጣቕ ዓደግክዎ፥ ኣብ ሕቘይ ከዓ ተዓጠቕክዎ።

³ሽዑ ቃል ኣቦና ኻልኣይ ጊዜ ናባይ መፀ፦

⁴“ነቲ ዝዓደግካዮ ዕጣቕ፥ ነቲ ኣብ ሕቘኻ ዘሎ፥ ውሰድ፥ ተሲእካ ናብ ኤፍራጥስ ኪድ፥ ኣብ ዝተሰንጠቐ ኰዅሒ ኸዓ ሕብኣዮ።”

⁵ከምቲ ኣቦና ዝኣዘዘኒ ድማ ከይደ ኣብ ጥቓ ኤፍራጥስ ሓባእክዎ።

⁶ድሕሪ ብዙሕ መዓልቲ ኣቦና “ተሲእካ ናብ ኤፍራጥስ ኪድ፥ ነቲ ኣብኡ ኽትሓብኦ ዝበልኩኻ ዕጣቕ ከዓ ኣምፅኣዮ” በለኒ።

⁷ናብ ኤፍራጥስ ከዓ ከይደ ነቲ ዕጣቕ ዂዒተ ኻብቲ ዝሓባእክዎ ቦታ ወሰድክዎ። ግና በሊሹ፥ ንምንም ዘይጠቕም ኮይኑ ነበረ።

⁸ሽዑ ቃል ኣቦና ናባይ መፀ፦

⁹“ኣቦና ከምዙይ ይብል ኣሎ፦ ከምዙይ ገይረ ንትዕቢት ይሁዳን ነቲ ዓብዪ ትዕቢት ኢየሩሳሌምን ከበላሹ እየ። ¹⁰እዝ ክፉእ ህዝቢ እዙይ፥ ቃለይ ምስማዕ ዝኣበየ፥ ብትሪ ልቡ ዝኸይድ፥ ከገልግሎምን ክሰግደሎምን ኢሉ ንኻልኦት ኣማልኽቲ ዝስዕብ፥ ከምዝ ዕጣቕ እዙይ ንምንም ዘይጠቕም ክኸውን እዩ። ¹¹ከምቲ ዕጣቕ ኣብ ሕቘ ሰብኣይ ዝለግብ፥ ከምኡ ንብዘሎ እስራኤልን ንብዘሎ ይሁዳን፥ ህዝበይ፥ ዝና፥ ውዳሰን ክብርን ክኾኑኒ፥ ምሳይ ኣልገብክዎም፥ ይብል ኣቦና፤ ግና ኣይሰምዑን።

ኵሉ ዕትሮ ብፍርዲ ይምላእ

¹²“ስለዙይ ከምዙይ በሎም፦ ኣቦ እስራኤል ከምዙይ ይብል ኣሎ፦ ኵሉ ዕትሮ ወይኒ ክመልእ እዩ። ንሳቶም ድማ ‘ኵሉ ዕትሮ ወይኒ ከም ዝመልአ ደኣዶ ኣይንፈልጥን?’ ኢሎም ክምልሱ እዮም። ¹³ሽዑ ከምዙይ በሎም፦ ኣቦና ከምዙይ ይብል ኣሎ፦ ንኵሎም ኣብዛ ምድሪ እዚኣ ዝነብሩ፥ ነቶም ኣብ ዙፋን ዳዊት ዝቕመጡ ነገስታት፥ ነቶም ካህናት፥ ነቶም ነቢያት፥ ንኵሎም ኣብ ኢየሩሳሌም ዝነብሩ ኸዓ ብስኽራን ክመልኦም እየ። ¹⁴ንስንሳቶም ከዓ ኸሃርሞም እየ፥ ንወለድን ንውሉድን ብሓባር፥ ይብል ኣቦና። ራህራሀ ኾነ ናሕሲ ኾነ ምሕረት፥ ካብ ምጥፋኦም ኣይክልክለንን እዩ።”

ፀልማት ቅድሚ ምውራዱ ስምዑ

¹⁵ስምዑ ኣቕልቡን፤ ኣይትዕበዩ፥ ኣቦና ተዛሪቡ እዩ እሞ። ¹⁶ፀልማት ከየምፅአ ከሎ፥ ኣእጋርኩም ኣብቲ ዝፀልምት ኣኽራን ከይዕንቀፋ ከለዋ፥ ንኣቦኹም ክብሪ ሃብዎ፤ ብርሃን ክትፅበዩ ኢኹም፥ ንሱ ግና ናብ ጣቓ ክልውጦ፥ ፅዑቕ ፀልማትን ክገብሮ እዩ። ¹⁷እንተ ዘይሰማዕኹም ግና፥ ብሰንኪ ትዕቢትኩም ብስዉር ክበኽይ እየ፤ መጓሰ ኣቦና ተማሪኹ እዩ እሞ፥ ኣዒንተይ መሪር ብኽያት ክበኽያ፥ ንብዓትውን ከፍስሳ እየን። ¹⁸ንንጉስን ንእኖ ንጉስን ከምዙይ በሎም፦ ርእስኹም ኣዋርዱ፥ ተቐመጡ፥ እቲ ኽቡር ኣኽሊልኩም ካብ ርእስኹም ወዲቑ እዩ እሞ። ¹⁹ከተማታት ደቡብ ተዓፅየን፥ ዝኸፍተንውን የለን። ብዘሎ ይሁዳ ተማሪኹ፥ ብምሉኡ ተማሪኹ ተወሲዱ። ²⁰ኣዒንትኺ ቛሕ ኣቢልኪ ርኢ፥ ነቶም ካብ ሰሜን ዝመፁ ዘለዉ። እቲ ዝተውሃበኪ መጓሰ፥ እቲ ፅቡቕ መጓሰኺ ኣበይ ኣሎ? ²¹ኣቦና ነቶም ባዕልኺ ፈተውትኺ ክኾኑ ዘላመድክዮም፥ ኣብ ልዕሌኺ መራሕቲ ኽኾኑ እንተ ሸመሎም፥ እንታይ ክትብሊ ኢኺ? ከምታ እትወልድ ሰበይቲ ሕማም ሕርሲ ኣይሕዘክንዶ? ²²ብልብኺ ኸዓ “እዝ ነገር እዙይ ስለ ምንታይ ኣጋጠመኒ?” እንተ ኢልኪ፥ ብሰንኪ ዕቤት ኣበሳኺ ቀሚሽኺ ተቐንጢጡ፥ ንስኺውን ተነዊርኪ ኢኺ። ²³ኢትዮጵያዊ ቈርበቱ ክልውጥዶ ይኽእል፥ ነብሪ ኸ ዝንጕርጕሩ? ሽዑ ንስኺውን ሰናይ ክትገብሪ ምኸኣልኪ ኔርኪ፥ ንስኺ ክፉእ ክትገብሪ ዝለመድኪ። ^a a v23 ኩሽ እታ ኣብ ደቡብ ግብፂ፥ ኣብ ላዕለዋይ ኒል ዝነበረት ምድሪ፥ ኣብቲ ናይ ሕዚ ሱዳንን ኢትዮጵያን ዝርከብ ከባቢ እያ ነይራ።

²⁴ነቲ ንፋስ በረኻ ዝፀራርጎ ከም ብቝቡቝ ክብትነኪ እየ። ²⁵እዝ ዕጫኺ እዙይ እዩ፥ እቲ ዝዓቀንኩልኪ ግደ፥ ይብል ኣቦና፤ ንኣይ ረሲዕኺ ብሓሰት ስለ ዝኣመንኪ። ²⁶“ስለዙይ ኣነ ባዕለይ ቀሚሽኺ ናብ ገፅኪ ኽቕንጥጦ እየ፥ ሕፍረትኪ ኸዓ ክርአ እዩ። ²⁷ዝሙትኪ፥ ናይ ፍትወት ምህህታኺ፥ ዘይሓፍር ምንዝርናኺ፥ ኣብ ኵይናትን ኣብ መሮርን ዘፀይፍ ግብርኺ ረአኹ። ወይለኺ፥ ኦ ኢየሩሳሌም! ክሳዕ መኣዝ ኢኺ ንፅህቲ ዘይትኾንዪ?”