ኤርሚያስ ብዛዕባ ፍትሒ ኣቦኡ ይሓትት

ኤርሚያስ ንኣቦኡ፥ እቶም ከዳዓት ስለ ምንታይ ብደሓን ከም ዝነብሩ፥ ብግልፂ ይሓቶ። እቲ መልሲ ዝኸፍአ ዝቕፅል እምበር ገለ መብርሂ ኣይህብን፦ እግረኛታት እንተ ኣድኸሙኻ፥ ምስ ኣፍራስ ከመይ ኢልካ ክትቀዳደም ኢኻ — ገዛእ ቤተ ሰብካ ድማ ጠሊሞምኻ እዮም። ኣቦና ነታ ኣሕሊፉ ዝሃባ ምድሪ ይሓዝነላ።

ምዕራፍ 12።

ኦ ኣቦይ፥ ነገረይ ናብ ቅድሜኻ ኣብ ዘቕርበሉ ጊዜ ፃድቕ ኢኻ፤ ኮይኑ ግና ብዛዕባ ፍርድኻ ምሳኻ ክዛረብ እደሊ ኣለኹ። መንገዲ ረሲኣን ስለ ምንታይ ይቐንዕ? እቶም ከዳዓት ኩሎም ስለ ምንታይ ብደሓን ይነብሩ? ተኸልካዮም፥ ሱር ድማ ሰደዱ፤ ይዓብዩ ፍረ ኸዓ ይፈርዩ። ኣብ ኣፎም ቅሩብ ኢኻ፥ ካብ ልቦም ግና ርሑቕ ኢኻ። ንስኻ ግና፥ ኦ ኣቦይ፥ ትፈልጠኒ ኢኻ፤ ትርእየኒ፥ ልበይ ናባኻ ኸመይ ከም ዘሎ ድማ ትፍትኖ። ከም ኣባጊዕ ንመሕረዲ ስሒብካ ውሰዶም፤ ንመዓልቲ ሕርዲ ድማ ፍለዮም ኣንብሮም። እታ ምድሪ ክሳዕ መኣዝ ክትሓዝን፥ ሳዕሪ ኩሉ ግራት ክሳዕ መኣዝ ክነቅፅ እዩ? ብሰንኪ እከይ እቶም ኣብኣ ዝነብሩ፥ እንስሳታትን ኣዕዋፍን ተፀራሪጎም እዮም፤ እቶም ህዝቢ፥ “መወዳእታና ኣይርእዮን እዩ” ይብሉ ስለ ዘለዉ እዩ።

እቲ ኣቦ ንኤርሚያስ ይምልሰሉ

ምስ እግረኛታት ተቐዳዲምካ ንሳቶም እንተ ኣድኸሙኻ፥ ምስ ኣፍራስ ከመይ ኢልካ ክትቀዳደም ኢኻ? ኣብ ሰላማዊት ምድሪ እንተ ተዓንቂፍካ፥ ኣብ ዱር ዮርዳኖስ ከመይ ኢልካ ክትገብር ኢኻ? ኣሕዋትካ እኳ ቤት ኣቦኻ እኳ ጠሊሞምኻ እዮም፤ ንሳቶም እኳ ዓው ኢሎም ፀዊዖምኻ እዮም፤ ፅቡቕ ነገር ናባኻ እኳ እንተ ተዛረቡ፥ ኣይትእመኖም። ንቤተይ ሓዲገ፥ ርስተይ ጎዲፈ፤ ነታ ፍትውቲ ነፍሰይ ድማ ናብ ኢድ ፀላእታ ኣሕሊፈ ሂበያ እየ። ^a ርስተይ ኣባይ ከም ኣንበሳ ዱር ኮይናትኒ፤ ናባይ ጓዚማትለይ፥ ስለዙይ ተፃሪረያ እየ። ርስተይ ዝንጉርጉር ኣሞራዶ ኮይናትኒ? ኣሞራታት ብኩሉ ወገን ከበዋዶ ኣለዉ? ኪድ፥ ኩሎም ኣራዊት መሮር ኣክብ፤ ክበልዑ ኣምፅኦም። ብዙሓት ጓሶት ኣታኽልቲ ወይነይ ኣበላሸዉ፤ ግደይ ብእግሮም ረጊፆም፤ ነቲ ባህ ዘብል ግደይ ድማ ናብ ዝባደመ በረኻ ለወጥዎ። ኣባዲሞማ፤ ባዲማ ኣብ ቅድመይ ትሓዝን። እታ ኩላ ምድሪ ባዲማ፥ ግና ኣብ ልቡ ዘእትዎ ሓደ እኳ የለን። ኣብ ኩሎም ጥራሖም እምባታት በረኻ ኣጥፋእቲ መፂኦም እዮም፤ ሰይፈይ ካብ ሓደ ወሰን ምድሪ ክሳዕ እቲ ካልእ ወሰን ይበልዕ ኣሎ እሞ፥ ዝድሕን ሓደ እኳ የለን። ስርናይ ዘሪኦም እሾዅ ዓፂዶም፤ ንኸንቱ ደኺሞም። ብፍርያትኩም ሕፈሩ፥ ብሰንኪ እቲ ዝነደደ ቍጥዓይ።

ኣቦና ከምዙይ ይብል ኣሎ፦ ብዛዕባ እቶም ነታ ንህዝበይ እስራኤል ዝሃብክዋ ርስቲ ዝሓዝዋ ኩሎም እኩያት ጎረባብተይ፥ ካብ ምድሮም ክነቅሎም እየ፤ ንቤት ይሁዳ ድማ ካብ ማእኸሎም ክነቅላ እየ። ምስ ነቀልክዎም ድማ፥ ተመሊሰ ክርህርሃሎም እየ፤ ንነፍሲ ወከፎም ናብ ርስቱ፥ ንነፍሲ ወከፎም ድማ ናብ ምድሩ ክመልሶም እየ።

ነቲ መንገዲ ህዝበይ ብሓቂ እንተ ተማሂሮም፥ ከምቲ ንህዝበይ ብበዓል ክምሕሉ ዝመሃርዎም፥ ‘ኣቦኹም ህያው ከም ዝኾነ’ ኢሎም ብስመይ እንተ መሓሉ፥ ኣብ ማእኸል ህዝበይ ክህነፁ እዮም። ነቲ ዘይሰምዕ ህዝቢ ኩሉ ግና ፈፂመ ክነቅሎን ከጥፍኦን እየ፥ ይብል ኣቦኹም።