ኤርሚያስ 11 FHB Father's Heart Bible™

11 ¹እቲ ካብ ኣቦና ናብ ኤርሚያስ ዝመፀ ቃል እዙይ እዩ፦

²“ቃላት እዝ ኪዳን እዙይ ስምዑ፥ ንህዝቢ ይሁዳን ነቶም ኣብ ኢየሩሳሌም ዝነብሩን ከዓ ንገርዎም።” ³“ከምዙይ ኢልካ ንገሮም፦ ኣቦ እስራኤል ከምዙይ ይብል ኣሎ፦ ነዝ ኪዳን እዙይ ቃላት ዘይሰምዕ ኵሉ ሰብ ርጉም ይኹን፥ ⁴ነዝ ኪዳን እዙይ በታ ኻብ ምድሪ ግብፂ፥ ካብቲ እቶን ሓፂን ዘውፃእኩሎም መዓልቲ ንኣቦታትኩም ከምዙይ ኢለ ኣዘዝኩዎም፦ ቃለይ ስምዑ፥ ኵሉ ትእዛዛተይ ድማ ግበሩ፤ ስለዙይ ውሉደይ ክትኮኑ ኢኹም፥ ኣነ ኸዓ ኣቦኹም ክኸውን እየ። ^a a v4 እቲ እቶን ሓፂን ነቲ ኣብ ግብፂ ዝነበረ ዘድቅቕ ባርነት ዕዮ የመልክት፤ መውፅኢ ዘይብሉ፥ ዘቃፅልን ዘየዕርፍን ባርነት እዩ ነይሩ። ⁵ሽዑ ነቲ ንኣቦታትኩም ዝመሓልክዎ ማሕላ፥ ከምዝ ሎሚ ኾይኑ ዘሎ፥ ፀባን መዓርን እተውሕዝ ምድሪ ኽህቦም ክፍፅሞ እየ።” ኣነ ኸዓ “ኣሜን፥ ኣቦና” ኢለ መለስኩ።

⁶ኣቦና ድማ ከምዙይ በለኒ፦ “ነዝ ኵሉ ቃላት እዙይ ኣብ ከተማታት ይሁዳን ኣብ ኣደባባያት ኢየሩሳሌምን ኣውጅ፦ ቃላት እዝ ኪዳን እዙይ ስምዑ፥ ግበርዎም ድማ።”

⁷“ንኣቦታትኩም ካብ ግብፂ ኣብ ዘደየብኩሉ መዓልቲ፥ ክሳዕ ሎሚ መሊሰ መሊሰ እናተጠንቀቕኩ፥ ቃለይ ስምዑ ኢለ ብብርቱዕ ኣጠንቂቐዮም እየ። ⁸ንሳቶም ግና ኣይተኣዘዙን ኣይሰምዑን፤ ነፍሲ ወከፎም ብትሪ ክፉእ ልቡ ተመላለሰ። ስለዙይ ነዝ ክሕልዉ ዝኣዘዝክዎም ኵሉ ቃላት እዝ ኪዳን እዙይ ኣብ ልዕሊኦም ኣምፃእኩ፥ ንሳቶም ግና ኣይገበሩን።”

⁹ኣቦና ድማ ከምዙይ በለኒ፦ “ኣብ መንጎ ህዝቢ ይሁዳን ኣብ መንጎ እቶም ኣብ ኢየሩሳሌም ዝነብሩን ሻራ ተረኺቡ ኣሎ። ¹⁰ናብ ሓጢኣት ኣቦታቶም፥ ናብቶም ቃለይ ክሰምዑ ዝኣበዩ ተመሊሶም እዮም። ንኻልኦት ኣማልኽቲ ኸዓ ከገልግልዎም ሰዓብዎም። ቤት እስራኤልን ቤት ይሁዳን ነቲ ምስ ኣቦታቶም ዝኣተኽዎ ኪዳነይ ኣፍሪሶም እዮም።” ¹¹ስለዙይ ኣቦና ከምዙይ ይብል ኣሎ፦ እንሆ፥ ከየምልጥዎ ዘይኽእሉ መዓት ኣብ ልዕሊኦም ከምፅእ እየ። ናባይ እኳ እንተ ኣእወዩ፥ ኣይሰምዖምን እየ። ¹²ሽዑ ኸተማታት ይሁዳን ህዝቢ ኢየሩሳሌምን ከይዶም፥ ናብቶም ዕጣን ዘዕጥኑሎም ኣማልኽቲ ክእውዩ እዮም፤ እዚኣቶም ግና ብጊዜ መከራኦም ፈፂሞም ከድሕንዎም ኣይኽእሉን። ¹³ኦ ይሁዳ፥ ኣማልኽትኻ ኸም ብዝሒ ኸተማታትካ እዮም፤ ነቲ ኣፀያፊ ነገር ዝሰራሕካዮም መሰውኢታት፥ ማለት ንበዓል ዕጣን እተዕጥነሉ መሰውኢታት፥ ከም ብዝሒ ኣደባባያት ኢየሩሳሌም እዮም።

¹⁴“ስለዙይ ንስኻ ምእንቲ እዝ ህዝቢ እዙይ ኣይትፀሊ፥ ኣውያት ኾነ ፀሎት ኣይተልዕለሎም፤ ብጊዜ መከራኦም ናባይ ምስ ዝፅውዑ ኣይሰምዖምን እየ እሞ። ¹⁵ፍቕርተይ ኣብ ቤተይ እንታይ መሰል ኣለዋ፥ እዙይ ኵሉ ክፉእ ተንኮል ፈፂማ እናሃለወት? እቲ ቅዱስ ስጋ ንጥፍኣት ኬርሕቐልኪ ይኽእልዶ? እቲ መዓት ምስ መፀ፥ ሽዑ ኽትሕጐሲዶ ኢኺ?” ^b b v15 ቅዱስ ስጋ፦ እቲ ንእግዚኣብሄር መስዋእቲ ኾይኑ ናብ መቕደስ ዝመፅእ ክፋል መስዋእቲ እንስሳ እዩ።

¹⁶ኣቦና ቐደም ንዓኺ መልክዐኛ፥ ፅብቕቲ ፍረ ዘለዋ ልምልምቲ ኦም ኣውሊዕ ኢሉ ፀውዐ። ብድምፂ ብርቱዕ ህቦብላ ግና ኣቦና ነታ ኦም ብሓዊ ኸንድዳ እዩ፥ ጨናፍራ ኸዓ ክስበራ እየን።

¹⁷እቲ ዝተኸለኪ ኣቦ ሰራዊት፥ ብሰንኪ እቲ ቤት እስራኤልን ቤት ይሁዳን ዝገበርዎ ክፉእ፥ ንበዓል ዕጣን ብምዕጣን ድማ ንኣይ ስለ ዘቘጥዑኒ፥ መዓት ኣብ ልዕሌኺ ወሰነ።

ኣብ ልዕሊ ኤርሚያስ ዝተኣልመ ተንኮል

¹⁸ኣቦና ኣፍለጠኒ፥ ኣነ ኸዓ ፈለጥኩ፤ ሽዑ ንስኻ ግብርታቶም ኣርኣኻኒ። ¹⁹ኣነ ግና ከም ናብ ማሕረዲ ዝውሰድ ህዱእ ዕየት ነበርኩ፤ ንኣይ ከም ዝተማኸሩለይ ኣይፈለጥኩን፤ ከምዙይ ድማ በሉ፦ “ነታ ኦም ምስ ፍሪኣ ነጥፍኣያ፤ ካብ ምድሪ ህያዋን ንቑረፆ፥ ስሙ ድማ ማንም ከይዝክር።” ²⁰ኦ ኣቦ ሰራዊት፥ ብፅድቂ እትፈርድ፥ ንልቢ እትምርምር፥ ንኵሊትውን እትፍትን፥ ፍርድኻ ኣብ ልዕሊኦም ክርኢ ሃበኒ፥ ጉዳየይ ናባኻ ኣረኪበ እየ እሞ።

²¹ስለዙይ ኣቦና ብዛዕባ እቶም ነፍስኻ ዝደልዩ፥ ብስም ኣቦና ኣይትተነበ፥ እንተ ዘይኮይኑ ክንቀትለካ ኢና፥ ዝብሉ ሰብ ኣናቶት ከምዙይ ይብል ኣሎ፦ ^c c v21 ኣናቶት ዓዲ ኤርሚያስ ባዕሉ ነበረት፤ ኣብ ሰሜን ኢየሩሳሌም እትርከብ ናይ ካህናት ከተማ እያ ነይራ፤ ስለዙይ እዝ ኣብ ልዕሊኡ ዝተኣልመ ተንኮል፥ ካብ ጎረባብቱን ኣዝማዱን ዝመፀ እዩ። ²²ስለዙይ ኣቦ ሰራዊት ከምዙይ ይብል ኣሎ፦ እንሆ፥ ክቐፅዖም እየ። መንእሰያቶም ብሰይፊ ክሞቱ፥ ኣወዳቶምን ኣዋልዶምን ከዓ ብጥሜት ክሞቱ እዮም። ²³ካብኣቶም ሓደኳ ኣይክተርፍን እዩ፤ ኣብ ዓመት መቕፃዕቶም ኣብ ሰብ ኣናቶት መዓት ከምፅእ እየ።