Mosesla Samuella
“Moses eina Samuelna iwui mangāli nganinglala hi mangareiungluimara,” da ithumwui Avāna hānga. Jeremiah chiwui azingli kaikaphā mangāda, ili pharāthang zimiksho chi khonkashi sāa, kala awui Avāli, nana ili thengkahai kongrā thārala? da ngahanga. Ngahānkhamang chiya shongsakhangai eina lei: latungakha, kasaka tui matuiakha, nana khangazip pithraiwui phākho ngasāra.
15 1Chitharan ithumwui Avāna ili hānga: "Moses eina Samuel iwui mangāli nganingkālala, iwui wuklung mibing hili makapeimara. Athumli iwui mangāwui eina chihovāhaolu; athum vāranu." 2Athumna nali "Ithum kali vāra?" da ngahānna tharan, athumli hānglu, "Ithumwui Avāna hithāda hānga: kathiwui vang kajibing kathili; raighaiwui vang kajibing raighaili; chāmreiwui vang kajibing chāmreili; tukthuiwui vang kajibing tukthuida."
3"Athumwuitungli sākakathān yur mati ina ngarānra, da ithumwui Avāna hānga: shaothat khavai raighai, khuithui khavai fa, tukshai kala sāshimān khavai khamasaiwui vānao kala ngaleiwui sāyurna. 4Judahwui awunga Hezekiahwui naomayara Manassehwui vang, ana Jerusalemli sākahaiwui vang, okathuiwui wungram saikorali ina athumli khuikhavā pam sāra."
5"O Jerusalem, khipāna nali lumashan sāmirakhala? Khipāna nawui vang chapngachāmirakhala? Khipāna na kathāda leikhala da ngahān khavai kapeihaorakhala?" 6Nana ili khalanhaira, da ithumwui Avāna hānga; na khanukshong sa̱na̱unga. Chiwui vang nawuitungli ina ipāng katingshokhaira kala nali sāshimānhaira; ngatang khavai ina ngachāng chathaira. 7Ina ngaleiwui ngaveibingli athumli yāmkok eina machiya. Ina athumli wukkhanangmihaira; ina iwui mibingli sāshimānhaira, khikhalajila athum athumwui shongfali makapeimana. a a v7 Machi kasā: luikasā mi akhana zāt chi khamasailungli horvāsang, chieina masina ahikbing khikha makhavaibing chi horngasakra, zāt mongmāng taira. 8Athumwui ra̱meiva̱ ngarā shamadruwui situili chungmeida ngasāhaira. Nganuilakha mibingwui ava̱va̱bingtungli ngashunung atamli ina sākakathān akha rāngasaka; kashuirak eina awuitungli kakhanang kala khangachee ina yuingasaka. 9Nao shini pharā kahaiva̱ thenghaowa; ana khanao khaksui suihaowa. Ngashun leichingda awui zimik tunghairasai; ana maishida pa̱ngapāmihaira. Kala athumwui kataibing chi athumwui yangkashebingwui mangāli ina raighaili sangmira, da ithumwui Avāna hānga."
Jeremiahna Angunda Ngahuipama
10Kakhanang iwui ngasāranu, ishava̱, ngalei peichaoda nganang kala khangazai kasā mi, ili nana pharāmi! Ina mili khikha mashuksangmimana, lah ina khikhala mashuksangmana, chithālala mi saikorana ili khonshiya."
11Ithumwui Avāna hānga: "Ina nali kaphāwui vang kanshokmira; kakhanang kala sipkasā atamli ina yangkashe chi nali po ngasakra." 12Khipānakha mari, atungshongwui mari, kala pithrai sātek ngasakra? 13"Nawui leiret peichaoda nawui morei saikorawui vang, nawui kashāng kala nawui kharei lanbing ina aman maleila ngaponkakhui sākhavai sangmira. 14Na matheikasa ngalei akhali nawui yangkashebingli ina nali otram ngatha̱ ngasakra, kaja mei akha iwui malungkhavātli chuiya; china nawuitungli chuitāhaora."
15Na thei, iwui Avā; ili phaningunglu kala ili ningsanglu, kala iwui rekakharekbingtungli iwui vang athut khuimilu. Iwui vang ningzinghāringmilu, kala ili makhuivāmilu; nawui vangna ina misui phunga chi theilu. 16Nawui tuibing samphanga, kala ina shaira, kala nawui tuibing iwui khamathān ngasāhaira kala iwui wuklungwui ringkaphāna, kaja ina nawui ming phunga, O saikorawui Avā. 17Ina ringkaphābingwui ngachaili mapammana, lah ina maringphāmana; nawui pāngwui vang eina ina kasaikha pama, kaja nana ili malungkhavāt eina chipemmihaira. 18Khisāda iwui khangashei mataimeikapta, kala iwui khamā maraikapai, raikhavai maningmala? Nana ili kakapik kongrā thāda, katheng tara̱ thāda leirala?
19Chiwui vang ithumwui Avāna hithāda hānga: Nana latungakha, ina nali khuiungmiluira iwui mangāli nganing ngasakra. Nana aman kasaka chi khuishokta, makānkhanā chi makhuishokakha, na iwui khamor ngasakra. Athumna nawui pāngli latungra, kha nana athumwui pāngli malatungluimana. 20Ina nali mibing hili ngasung khavai khangazipa pithrai phākho ngasa ngasakra; athumna nali ngararra, kha nali mayuimara, kaja nali huikhavai kala kanshok khavai ina nali ngasomira, da ithumwui Avāna hānga. 21"Makhayāwui pāng eina ina nali kanshokra, kala sākashewui pāng eina nali ngatangkhuira."
