ኤርሚያስ 15 FHB Father's Heart Bible™

15 ¹ኣቦና ድማ ከምዙይ በለኒ፦ “ሙሴን ሳሙኤልን እኳ ኣብ ቅድመይ እንተ ደው በሉ፥ ልበይ ናብዝ ህዝቢ እዙይ ኣይምለስን። ካብ ቅድመይ ኣውፅኣዮም፤ ይኺዱ።” ²ንሳቶም ድማ “ናበይ ኢና እንኸይድ?” ኢሎም እንተ ጠየቑኻ፥ ከምዙይ በሎም፦ “ኣቦና ከምዙይ ይብል ኣሎ፦ እቶም ንሞት ዝኾኑ ናብ ሞት፥ እቶም ንሰይፊ ዝኾኑ ናብ ሰይፊ፥ እቶም ንጥሜት ዝኾኑ ናብ ጥሜት፥ እቶም ንምርኮ ዝኾኑ ድማ ናብ ምርኮ ይኺዱ።”

³“ኣብ ልዕሊኦም ኣርባዕተ ዓይነት መጥፍኢ ኽሾም እየ፥ ይብል ኣሎ ኣቦና፤ ንምቕታል ሰይፊ፥ ንምስሓብ ኣኽላባት፥ ኣዕዋፍ ሰማይን ኣራዊት ምድርን ድማ ክበልዑን ከጥፍኡን። ⁴ብሰንኪ እቲ ምናሴ ወዲ ሕዝቅያስ ንጉስ ይሁዳ ኣብ ኢየሩሳሌም ዝገበሮ፥ ንዅለን መንግስታት ምድሪ መገረሚ ኽገብሮም እየ።”

⁵“ኦ ኢየሩሳሌም፥ ዝራሕርሃልኪ መን እዩ? ዝበኽየልኪ መን እዩ? ጠጠው ኢሉ ደሃይኪ ዝሓትትከ መን እዩ? ⁶ነዓቕክኒ፥ ይብል ኣሎ ኣቦና፤ ንድሕሪት ትኸዲ ኣለኺ። ስለዙይ ኢደይ ኣብ ልዕሌኺ ዘርጊሐ ኣጥፊአኪ፤ ካብ ራህራሀ ደኺመ እየ። ⁷ኣብ ደጌታት እታ ምድሪ ብመስአ ፀረኽዎም። ሰኪለዮም፤ ንህዝበይ ኣጥፊአዮ፤ ካብ መንገድታቶም ኣይተመለሱን እዮም እሞ። ^a a v7 ምፅራይ እኽሊ፦ ሓረስታይ ነቲ ዝተወቕዐ እኽሊ ናብ ኣየር ይድርብዮ ነበረ፤ ስለዙይ እቲ ንፋስ ነቲ ዘይጠቅም ሓሰር ይነፍሶ፤ እቲ እኽሊ ጥራሕ ድማ ይተርፍ። ⁸መበለታቶም ካብ ሑፃ ባሕሪ በዝሓ። ኣብ ልዕሊ እኖታት መንእሰያት ፍርቂ መዓልቲ መጥፍኢ ኣምፃእኩ፤ ብድንገት ቅልውላው ድማ ድንጋፀ ኣብ ልዕሊኣ ኣውረድኩ። ⁹እታ ሸውዓተ ዝወለደት ደኸመት፤ ትንፋሳ ወፀት። ፀሓይ ገና መዓልቲ እንተሎ ዓረበትላ፤ ሓፈረትን ተዋረደትን። ነቶም ዝተረፉ ድማ ኣብ ቅድሚ ፀላእቶም ንሰይፊ ኽህቦም እየ፥ ይብል ኣሎ ኣቦና።”

ኤርሚያስ ብጭንቀት ይጠርዕ

¹⁰ኣደይ፥ ወይለይ! ንብዘላ ምድሪ ሰብኣይ ክርክር ድማ ባእሲ ኮይነ ስለ ዝወለድክኒ! ኣየለቓሕኹን፥ ኣይተለቃሕኹን፤ ኮይኑ ግና ኵሉ ይረግመኒ ኣሎ።

¹¹ኣቦና ከምዙይ በለ፦ “ብርግፅ ንሰናይ ከናግፈካ እየ፤ ኣብ ጊዜ መከራን ሽግርን ነቲ ፀላኢ ኣባኻ ከምዝልምን ክገብሮ እየ።” ¹²ሓፂን፥ ነቲ ኻብ ሰሜን ዝመፅእ ሓፂንን ነሓስን ክሰብር ዝኽእል ሰብ ኣሎዶ? ¹³“ሃብትኻን መዛግብትኻን ብዘይ ዋጋ ንዘመተ ክህቦም እየ፥ ብሰንኪ እቲ ኣብ ብዘሎ ዶብካ ዝገበርካዮ ኵሉ ሓጢኣትካ። ¹⁴ኣብ ዘይትፈልጥ ምድሪ ንፀላእትኻ ኸተገልግል ክገብረካ እየ፤ ኣብ ቍጥዓይ ሓዊ ነዲዱ እዩ እሞ፥ ኣብ ልዕሌኻ ኽነድድ እዩ።”

¹⁵ኦ ኣቦይ፥ ንስኻ ትፈልጥ ኢኻ፤ ዘክረኒ፥ ሓልየለይ፥ ካብቶም ዘሳጕጉኒ ድማ ተበቀለለይ። ብዓቕሊ ተፃወረኒ፥ ኣይትውሰደኒውን፤ ምእንታኻ ፀርፊ ከም ዝፅወር ፍለጥ። ¹⁶ቃላትካ ተረኽቡ፥ ኣነ ድማ በላዕክዎም፤ ቃላትካ ኸዓ ሓጐሰይ ድማ ተድላ ልበይ ኮነ፤ ብስምካ ተፀዊዐ እየ እሞ፥ ኦ ኣቦ ሰራዊት ሰማይ። ¹⁷ኣብ ጉባኤ ተፃወቲ ኣይተቐመጥኩን፤ ኣይተሓጐስኩን ድማ፤ ብሰንኪ ኢድካ በይነይ ተቐመጥኩ፤ ብዂራ መሊእካኒ ኢኻ እሞ። ¹⁸ቃንዛይ ዘይውዳእ፥ ቍስለይ ድማ ዘይሓዊ፥ ክሓዊ ዝኣበየ ስለምንታይ ኮነ? ከም ሓሳዊ ሩባ፥ ከም ዝነፅፍ ማይ ዲኻ እትኾነኒ?

¹⁹ስለዙይ ኣቦና ከምዙይ ይብል ኣሎ፦ እንተ ተመሊስካ፥ ኣብ ቅድመይ ደው ክትብል ክመልሰካ እየ። ነቲ ክቡር ካብቲ ንዑቕን ዘይጠቅምን ፈሊኻ እንተ ኣውፂእኻ፥ ከም ኣፈይ ክትከውን ኢኻ። ንሳቶም ናባኻ ክምለሱ እዮም፥ ንስኻ ግና ናባታቶም ኣይትመለስ። ²⁰ኣብ ቅድሚ እዝ ህዝቢ እዙይ፥ ናይ ነሃስ ፅኑዕ መካበብያ ክገብረካ እየ፤ ምሳኻ ይዋግኡ እዮም ግና ኣይክስዕሩኻን እዮም፤ ኣነ ከድሕነካን ከናግፈካን ምሳኻ እየ እሞ፥ ይብል ኣቦና። ²¹“ካብ ኢድ ሓጥኣን ከናግፈካ፥ ካብ ኢድ ጨካናት ድማ ክቤዝወካ እየ።”