ਯਿਰਮਿਯਾਹ 15

15 ¹ਫੇਰ ਸਾਡੇ ਪਿਤਾ ਨੇ ਮੈਨੂੰ ਆਖਿਆ: “ਭਾਵੇਂ ਮੂਸਾ ਅਤੇ ਸਮੂਏਲ ਮੇਰੇ ਸਾਹਮਣੇ ਖੜ੍ਹੇ ਹੋਣ, ਤਾਂ ਵੀ ਮੇਰਾ ਮਨ ਇਸ ਪਰਜਾ ਵੱਲ ਨਹੀਂ ਮੁੜੇਗਾ। ਉਨ੍ਹਾਂ ਨੂੰ ਮੇਰੇ ਸਾਹਮਣਿਓਂ ਭੇਜ ਦੇ; ਉਹ ਚਲੇ ਜਾਣ।” ²ਜਦੋਂ ਉਹ ਤੈਨੂੰ ਪੁੱਛਣ, “ਅਸੀਂ ਕਿੱਥੇ ਜਾਈਏ?” ਤਾਂ ਉਨ੍ਹਾਂ ਨੂੰ ਆਖ, “ਸਾਡਾ ਪਿਤਾ ਇਉਂ ਆਖਦਾ ਹੈ: ਜੋ ਮੌਤ ਲਈ ਹਨ, ਸੋ ਮੌਤ ਵੱਲ; ਜੋ ਤਲਵਾਰ ਲਈ ਹਨ, ਸੋ ਤਲਵਾਰ ਵੱਲ; ਜੋ ਕਾਲ ਲਈ ਹਨ, ਸੋ ਕਾਲ ਵੱਲ; ਜੋ ਗ਼ੁਲਾਮੀ ਲਈ ਹਨ, ਸੋ ਗ਼ੁਲਾਮੀ ਵੱਲ।”

³“ਮੈਂ ਉਨ੍ਹਾਂ ਦੇ ਵਿਰੁੱਧ ਚਾਰ ਪ੍ਰਕਾਰ ਦੇ ਨਾਸ਼ ਕਰਨ ਵਾਲੇ ਨਿਯੁਕਤ ਕਰਾਂਗਾ, ਸਾਡਾ ਪਿਤਾ ਫ਼ਰਮਾਉਂਦਾ ਹੈ: ਵੱਢਣ ਲਈ ਤਲਵਾਰ, ਘਸੀਟ ਕੇ ਲੈ ਜਾਣ ਲਈ ਕੁੱਤੇ, ਅਤੇ ਖਾ ਜਾਣ ਤੇ ਨਾਸ਼ ਕਰਨ ਲਈ ਅਕਾਸ਼ ਦੇ ਪੰਛੀ ਅਤੇ ਧਰਤੀ ਦੇ ਦਰਿੰਦੇ। ⁴ਮੈਂ ਉਨ੍ਹਾਂ ਨੂੰ ਧਰਤੀ ਦੀਆਂ ਸਾਰੀਆਂ ਪਾਤਸ਼ਾਹੀਆਂ ਲਈ ਭੈ ਦਾ ਕਾਰਨ ਬਣਾ ਦਿਆਂਗਾ, ਯਹੂਦਾਹ ਦੇ ਰਾਜੇ ਹਿਜ਼ਕੀਯਾਹ ਦੇ ਪੁੱਤਰ ਮਨੱਸ਼ਹ ਦੇ ਕਾਰਨ, ਉਸ ਦੇ ਉਸ ਕੰਮ ਦੇ ਕਾਰਨ ਜੋ ਉਸ ਨੇ ਯਰੂਸ਼ਲਮ ਵਿੱਚ ਕੀਤਾ।”

⁵“ਹੇ ਯਰੂਸ਼ਲਮ, ਤੇਰੇ ਉੱਤੇ ਕੌਣ ਤਰਸ ਖਾਵੇਗਾ? ਤੇਰੇ ਲਈ ਕੌਣ ਸੋਗ ਕਰੇਗਾ? ਤੇਰੀ ਸੁੱਖ-ਸਾਂਦ ਪੁੱਛਣ ਲਈ ਕੌਣ ਠਹਿਰੇਗਾ ਵੀ? ⁶ਤੂੰ ਮੈਨੂੰ ਰੱਦ ਕਰ ਦਿੱਤਾ ਹੈ, ਸਾਡਾ ਪਿਤਾ ਫ਼ਰਮਾਉਂਦਾ ਹੈ; ਤੂੰ ਪਿੱਛੇ ਹਟਦਾ ਹੀ ਜਾਂਦਾ ਹੈਂ। ਇਸ ਲਈ ਮੈਂ ਆਪਣਾ ਹੱਥ ਤੇਰੇ ਵਿਰੁੱਧ ਵਧਾਇਆ ਹੈ ਅਤੇ ਤੈਨੂੰ ਨਾਸ਼ ਕੀਤਾ ਹੈ—ਮੈਂ ਤਰਸ ਕਰਦੇ-ਕਰਦੇ ਥੱਕ ਗਿਆ ਹਾਂ। ⁷ਮੈਂ ਉਨ੍ਹਾਂ ਨੂੰ ਦੇਸ ਦੇ ਫਾਟਕਾਂ ਉੱਤੇ ਛੱਜ ਨਾਲ ਉਡਾਇਆ ਹੈ। ਮੈਂ ਉਨ੍ਹਾਂ ਨੂੰ ਔਲਾਦੋਂ ਵਾਂਝੇ ਕੀਤਾ; ਮੈਂ ਆਪਣੀ ਪਰਜਾ ਨੂੰ ਨਾਸ਼ ਕੀਤਾ, ਕਿਉਂਕਿ ਉਹ ਆਪਣੇ ਰਾਹਾਂ ਤੋਂ ਨਾ ਮੁੜੇ। ^a a v7 ਉਡਾਉਣਾ: ਕਿਸਾਨ ਗਾਹੇ ਹੋਏ ਅਨਾਜ ਨੂੰ ਹਵਾ ਵਿੱਚ ਉਛਾਲਦਾ ਸੀ ਤਾਂ ਜੋ ਹਵਾ ਬੇਕਾਰ ਭੋਹ ਨੂੰ ਉਡਾ ਲੈ ਜਾਵੇ, ਅਤੇ ਕੇਵਲ ਅਨਾਜ ਹੀ ਬਾਕੀ ਰਹੇ। ⁸ਉਨ੍ਹਾਂ ਦੀਆਂ ਵਿਧਵਾਵਾਂ ਸਮੁੰਦਰਾਂ ਦੀ ਰੇਤ ਨਾਲੋਂ ਵੱਧ ਹੋ ਗਈਆਂ। ਗੱਭਰੂਆਂ ਦੀਆਂ ਮਾਵਾਂ ਦੇ ਵਿਰੁੱਧ ਮੈਂ ਦੁਪਹਿਰ ਵੇਲੇ ਇੱਕ ਨਾਸ਼ ਕਰਨ ਵਾਲਾ ਲਿਆਇਆ; ਅਚਾਨਕ ਮੈਂ ਉਸ ਉੱਤੇ ਦੁਖ ਅਤੇ ਭੈ ਪਾ ਦਿੱਤਾ। ⁹ਜਿਸ ਨੇ ਸੱਤ ਜਣੇ, ਉਹ ਨਿਤਾਣੀ ਹੋ ਜਾਂਦੀ ਹੈ; ਉਹ ਆਖ਼ਰੀ ਸਾਹ ਲੈਂਦੀ ਹੈ। ਦਿਨ ਹੁੰਦਿਆਂ ਹੀ ਉਸ ਦਾ ਸੂਰਜ ਡੁੱਬ ਗਿਆ; ਉਹ ਲੱਜਿਤ ਅਤੇ ਬੇਪਤ ਹੋਈ। ਅਤੇ ਉਨ੍ਹਾਂ ਵਿੱਚੋਂ ਬਾਕੀਆਂ ਨੂੰ ਮੈਂ ਉਨ੍ਹਾਂ ਦੇ ਵੈਰੀਆਂ ਦੇ ਸਾਹਮਣੇ ਤਲਵਾਰ ਦੇ ਹਵਾਲੇ ਕਰਾਂਗਾ, ਸਾਡਾ ਪਿਤਾ ਫ਼ਰਮਾਉਂਦਾ ਹੈ।”

ਯਿਰਮਿਯਾਹ ਦੁਖ ਵਿੱਚ ਪੁਕਾਰਦਾ ਹੈ

¹⁰ਹਾਏ ਮੈਨੂੰ, ਹੇ ਮੇਰੀ ਮਾਤਾ, ਕਿ ਤੂੰ ਮੈਨੂੰ ਜਣਿਆ—ਸਾਰੇ ਦੇਸ ਲਈ ਝਗੜੇ ਅਤੇ ਵਿਵਾਦ ਦਾ ਮਨੁੱਖ! ਨਾ ਮੈਂ ਉਧਾਰ ਦਿੱਤਾ, ਨਾ ਮੈਂ ਉਧਾਰ ਲਿਆ, ਫੇਰ ਵੀ ਹਰ ਕੋਈ ਮੈਨੂੰ ਫਿਟਕਾਰਦਾ ਹੈ।

¹¹ਸਾਡੇ ਪਿਤਾ ਨੇ ਆਖਿਆ: “ਮੈਂ ਤੈਨੂੰ ਭਲਿਆਈ ਲਈ ਛੁਡਾਵਾਂਗਾ; ਮੈਂ ਬਿਪਤਾ ਅਤੇ ਦੁਖ ਦੇ ਵੇਲੇ ਵੈਰੀ ਤੋਂ ਤੇਰੀ ਮਿੰਨਤ ਕਰਵਾਵਾਂਗਾ।” ¹²ਕੀ ਕੋਈ ਲੋਹੇ ਨੂੰ ਤੋੜ ਸਕਦਾ ਹੈ—ਉੱਤਰ ਵੱਲੋਂ ਦਾ ਲੋਹਾ—ਅਤੇ ਪਿੱਤਲ ਨੂੰ? ¹³“ਤੇਰਾ ਧਨ ਅਤੇ ਤੇਰੇ ਖ਼ਜ਼ਾਨੇ ਮੈਂ ਬਿਨਾਂ ਮੁੱਲ ਲੁੱਟ ਵਜੋਂ ਦੇ ਦਿਆਂਗਾ, ਤੇਰੀਆਂ ਸਾਰੀਆਂ ਹੱਦਾਂ ਵਿੱਚ ਕੀਤੇ ਤੇਰੇ ਸਾਰੇ ਪਾਪਾਂ ਦੇ ਕਾਰਨ। ¹⁴ਮੈਂ ਤੈਨੂੰ ਤੇਰੇ ਵੈਰੀਆਂ ਦੀ ਸੇਵਾ ਵਿੱਚ ਇੱਕ ਅਜਿਹੇ ਦੇਸ ਵਿੱਚ ਲਾ ਦਿਆਂਗਾ ਜਿਸ ਨੂੰ ਤੂੰ ਨਹੀਂ ਜਾਣਦਾ, ਕਿਉਂਕਿ ਮੇਰੇ ਕ੍ਰੋਧ ਵਿੱਚ ਇੱਕ ਅੱਗ ਭੜਕ ਉੱਠੀ ਹੈ; ਉਹ ਤੇਰੇ ਵਿਰੁੱਧ ਬਲੇਗੀ।”

¹⁵ਤੂੰ ਜਾਣਦਾ ਹੈਂ, ਹੇ ਮੇਰੇ ਪਿਤਾ; ਮੈਨੂੰ ਚੇਤੇ ਕਰ ਅਤੇ ਮੇਰੀ ਸੁੱਧ ਲੈ, ਅਤੇ ਮੇਰੇ ਸਤਾਉਣ ਵਾਲਿਆਂ ਤੋਂ ਮੇਰਾ ਨਿਆਂ ਕਰ। ਮੇਰੇ ਨਾਲ ਧੀਰਜ ਰੱਖ, ਅਤੇ ਮੈਨੂੰ ਨਾ ਚੁੱਕ ਲੈ; ਜਾਣ ਕਿ ਤੇਰੇ ਨਮਿੱਤ ਮੈਂ ਨਿੰਦਿਆ ਸਹਿੰਦਾ ਹਾਂ। ¹⁶ਤੇਰੇ ਬਚਨ ਮਿਲੇ, ਅਤੇ ਮੈਂ ਉਨ੍ਹਾਂ ਨੂੰ ਖਾ ਲਿਆ, ਅਤੇ ਤੇਰੇ ਬਚਨ ਮੇਰੀ ਖੁਸ਼ੀ ਅਤੇ ਮੇਰੇ ਮਨ ਦਾ ਅਨੰਦ ਬਣ ਗਏ, ਕਿਉਂਕਿ ਮੈਂ ਤੇਰੇ ਨਾਮ ਦਾ ਧਾਰਨੀ ਹਾਂ, ਹੇ ਸੁਰਗੀ ਸੈਨਾਂ ਦੇ ਪਿਤਾ। ¹⁷ਮੈਂ ਰੰਗਰਲੀਆਂ ਮਨਾਉਣ ਵਾਲਿਆਂ ਦੀ ਸੰਗਤ ਵਿੱਚ ਨਾ ਬੈਠਾ, ਨਾ ਹੀ ਮੈਂ ਅਨੰਦ ਕੀਤਾ; ਤੇਰੇ ਹੱਥ ਦੇ ਕਾਰਨ ਮੈਂ ਇਕੱਲਾ ਬੈਠਾ, ਕਿਉਂਕਿ ਤੂੰ ਮੈਨੂੰ ਗੁੱਸੇ ਨਾਲ ਭਰ ਦਿੱਤਾ ਸੀ। ¹⁸ਮੇਰੀ ਪੀੜ ਕਿਉਂ ਲਗਾਤਾਰ ਹੈ ਅਤੇ ਮੇਰਾ ਜ਼ਖ਼ਮ ਲਾਇਲਾਜ, ਜੋ ਚੰਗਾ ਹੋਣੋਂ ਇਨਕਾਰ ਕਰਦਾ ਹੈ? ਕੀ ਤੂੰ ਮੇਰੇ ਲਈ ਧੋਖੇਬਾਜ਼ ਨਾਲੇ ਵਾਂਗ ਹੋਵੇਂਗਾ, ਉਨ੍ਹਾਂ ਪਾਣੀਆਂ ਵਾਂਗ ਜੋ ਸੁੱਕ ਜਾਂਦੇ ਹਨ?

¹⁹ਇਸ ਲਈ ਸਾਡਾ ਪਿਤਾ ਇਉਂ ਆਖਦਾ ਹੈ: ਜੇ ਤੂੰ ਮੁੜ ਆਵੇਂ, ਤਾਂ ਮੈਂ ਤੈਨੂੰ ਬਹਾਲ ਕਰਾਂਗਾ ਕਿ ਤੂੰ ਮੇਰੇ ਸਾਹਮਣੇ ਖੜ੍ਹਾ ਰਹੇਂ। ਜੇ ਤੂੰ ਨਿਕੰਮੀ ਗੱਲ ਨਹੀਂ, ਸਗੋਂ ਬਹੁਮੁੱਲੀ ਗੱਲ ਕੱਢੇਂ, ਤਾਂ ਤੂੰ ਮੇਰਾ ਮੂੰਹ ਹੋਵੇਂਗਾ। ਉਹ ਤੇਰੇ ਵੱਲ ਮੁੜਨਗੇ, ਪਰ ਤੂੰ ਉਨ੍ਹਾਂ ਵੱਲ ਨਾ ਮੁੜੀਂ। ²⁰ਮੈਂ ਤੈਨੂੰ ਇਸ ਪਰਜਾ ਦੇ ਵਿਰੁੱਧ ਪਿੱਤਲ ਦੀ ਪੱਕੀ ਕੰਧ ਬਣਾ ਦਿਆਂਗਾ; ਉਹ ਤੇਰੇ ਵਿਰੁੱਧ ਲੜਨਗੇ ਪਰ ਤੇਰੇ ਉੱਤੇ ਪਰਬਲ ਨਹੀਂ ਹੋਣਗੇ, ਕਿਉਂਕਿ ਤੈਨੂੰ ਬਚਾਉਣ ਅਤੇ ਛੁਡਾਉਣ ਲਈ ਮੈਂ ਤੇਰੇ ਨਾਲ ਹਾਂ, ਸਾਡਾ ਪਿਤਾ ਫ਼ਰਮਾਉਂਦਾ ਹੈ। ²¹“ਮੈਂ ਤੈਨੂੰ ਦੁਸ਼ਟਾਂ ਦੇ ਹੱਥੋਂ ਛੁਡਾਵਾਂਗਾ ਅਤੇ ਜ਼ਾਲਮਾਂ ਦੀ ਪਕੜ ਤੋਂ ਤੇਰਾ ਨਿਸਤਾਰਾ ਕਰਾਂਗਾ।”