Yeremia 15

15 ¹Ndipo Baba yetu akaniambia: "Hata kama Musa na Samweli wangesimama mbele yangu, moyo wangu usingewaelekea watu hawa. Waondoe mbele za uso wangu; waache waende." ²Watakapokuuliza, "Twendako?" waambie, "Hivi ndivyo asemavyo Baba yetu: wale wa mauti, kwa mauti; wale wa upanga, kwa upanga; wale wa njaa, kwa njaa; wale wa utumwa, kwa utumwa."

³"Nitawaamuru waharibifu wa aina nne juu yao, asema Baba yetu: upanga wa kuua, mbwa wa kukokota, ndege wa angani na wanyama wa nchi kula na kuharibu. ⁴Nitawafanya kuwa kitu cha kutisha kwa falme zote za dunia, kwa sababu ya Manase mwana wa Hezekia, mfalme wa Yuda, kwa hayo aliyoyatenda katika Yerusalemu."

⁵"Maana ni nani atakayekuhurumia, Yerusalemu? Ni nani atakayekuombolezea? Ni nani hata atakayesimama kuuliza hali yako? ⁶Umenikataa, asema Baba yetu; unazidi kurudi nyuma. Kwa hiyo nimeunyoosha mkono wangu juu yako na kukuangamiza— nimechoka kughairi. ⁷Nimewapepeta kwa uma wa kupepetea katika malango ya nchi. Nimewafanya kufiwa; nimewaangamiza watu wangu, kwa maana hawakutaka kuziacha njia zao. ^a a v7 Kupepeta: mkulima alirusha nafaka iliyopurwa hewani ili upepo upeperushe makapi yasiyofaa, ukibaki nafaka tu. ⁸Wajane wao wakawa wengi kuliko mchanga wa bahari. Juu ya mama za vijana nikaleta mharibifu wakati wa adhuhuri; ghafula nikaufanya uchungu na hofu kuwaangukia. ⁹Yeye aliyezaa saba anadhoofika; anakata roho. Jua lake limezama wakati kungali mchana bado; ana aibu na fedheha. Na wale waliosalia nitawatoa kwa upanga mbele ya adui zao, asema Baba yetu."

Yeremia Analia kwa Uchungu

¹⁰Ole wangu, mama yangu, kwa kuwa umenizaa—mtu wa mashindano na wa magomvi kwa nchi yote! Sikukopesha, wala sikukopa, lakini kila mtu ananilaani.

¹¹Baba yetu akasema: "Hakika nitakuokoa kwa wema wako; nitamfanya adui akusihi wakati wa taabu na dhiki." ¹²Je, mtu yeyote aweza kuvunja chuma—chuma kitokacho kaskazini—na shaba? ¹³"Utajiri wako na hazina zako nitautoa uwe nyara, bila gharama, kwa sababu ya dhambi zako zote katika mipaka yako yote. ¹⁴Nitakufanya uwatumikie adui zako katika nchi usiyoijua, kwa maana moto umewaka katika hasira yangu; utakuunguza wewe."

¹⁵Wewe wajua, Baba yangu; nikumbuke na kunitunza, na unilipizie kisasi juu ya wanaonitesa. Uwe na uvumilivu nami, wala usiniondoe; ujue ya kuwa kwa ajili yako nachukua mashutumu. ¹⁶Maneno yako yalionekana, nami nikayala, na maneno yako yakawa furaha yangu na shangwe ya moyo wangu, kwa maana nimeitwa kwa jina lako, Ee Baba wa majeshi ya mbinguni. ¹⁷Sikuketi katika kusanyiko la wafanyao anasa, wala sikufurahi; kwa sababu ya mkono wako niliketi peke yangu, kwa maana ulinijaza ghadhabu. ¹⁸Mbona maumivu yangu hayana mwisho na jeraha langu haliponyeki, likikataa kupona? Je, utakuwa kwangu kama kijito cha udanganyifu, kama maji yaishayo?

¹⁹Kwa hiyo Baba yetu asema hivi: Ukirudi, nitakurudisha usimame mbele yangu. Ukitoa kilicho cha thamani, wala si kilicho duni, utakuwa kama kinywa changu. Wao watageukia kwako, lakini wewe usiwageukie wao. ²⁰Nitakufanya kuwa ukuta wa shaba wenye ngome juu ya watu hawa; watapigana nawe lakini hawatakushinda, kwa maana mimi ni pamoja nawe kukuokoa na kukuponya, asema Baba yetu. ²¹"Nitakuokoa na mkono wa waovu na kukukomboa kutoka katika makucha ya wakatili."