Jeremiah 16

16 ¹Ithumwui Avāwui tui china ili rāhānga:

²"Nana preiva̱ mangakumpaimana, kala apam hili mayarnao lah naongalāva̱ maleipaimara."

³Kaja apam hili kapharā mayarnao kala naongalāva̱bing, athumli pharākhui ava̱va̱bing, kala ngalei hili athumli avāva̱ ngarāwui vang ithumwui Avāna hithāda hānga:

⁴Athum kazātkashina thira; machapngachāsangmara, machifamara, leimaili paih thāda ngasāra. Raighai kala chāmreina athumli sātangmira; athumwui kathingun khamasaili yongkazata vānaobing kala okathuili khalei sāyurbingwui kashakazā ngasāra.

⁵Ithumwui Avāna hithāda hānga: Chapngachā shimli mavāzangalu, athumwui vang sifada chapngachā lah machot khavai mavālu, kaja ina mibing hiwui eina iwui chingri kahai, iwui leikashi kala lukhamashan pemting ngalanthuihaira, da ithumwui Avāna hānga. ⁶Ngalei hili reikhamatai kala kateobing machifada thira: khipākha machapngachāmara, them khalatta mara̱mara, lah athumwui vang kui masimara. ^a a v6 Khalatta ra̱kashi kala kui sikashi hi achinangarā Israelli chapngachāwui matakhak kahaina. ⁷Kathibingwui vang chapngachābingli ringphā ngasak khavai khipākha athumli khamui ngasoda mashaimimara, lah avāva̱ lah ava̱va̱wui vang athumli ringkaphāwui tengkot makhamimara. ^b b v7 "Ringphāwui tengkot" hi chifa kupkahai thili chapkhangachā shimkhurbingli khami kahai mangkasa tuina; hili tang kaphā ringphā hidala katatmihaira.

⁸Kala athumli ngasoda pamda, shai kala mang khavai zātkhān shimlila mavāzangalu. ⁹Saikorawui Avā, Israelwui Avāna hithāda hānga: Nathumwui mangāli, nathumwui atamli, apam hili ringphā kala khamathānwui khon, mākakhāma kala khām kahaiva̱wui khon chi ina ngasām ngasakra.

¹⁰Nana mibing hili tui saikora hi hāng tharan, athumna ngahānra, 'Khisāda ithumwui Avāna ithumwui vang kalākashi kahakva hi kasohairakhala? Ithumna ithumwui Avāli sākahai khayonkhamāng kala morei chi khina?'

¹¹Chitharan athumli hānglu: Khikhalajila navā ngarāna ili horhaira, da ithumwui Avāna hānga, vare kateibing shurda, athumli otram ngatha̱da khorumda, ili horhaowa, kala iwui ainli maningtongmana.

¹²Nathumna navā ngarāli zakshimeikharda sāhaira, kachichāna khalattawui ngakaishi makaphā ning shurda ili manganāsangmana. ¹³Chiwui vang eina ina nathumli apam hiwui eina nathum kala navā ngarāna matheila ngalei akhali horshokra, kala chili nathumna ngashun ngayā vare kateibingli otram ngatha̱ra; kaja ina nathumli mayākhami makhamimara.

¹⁴"Zimiksho chi rārāli," da ithumwui Avāna hānga, "chitharan 'Israelli Egypt ngaleiwui eina thānkashoka ithumwui Avāwui ming singda kahāngna' da mahāngluimara,"

¹⁵kha, 'Israelwui mibingli atungshong ngaleiwui eina kala athumli kashamvā apam saikorawui eina thānkashoka ithumwui Avāwui ming singda kahāngna' da hāngra. Kaja ina athumli, athumwui avā ngarāli iwui khami kahai athumwui ngaleili chihorāungra. ^c c v15 Egyptwui eina kankahaili reikhamatai shimli chihorāwui tuingashit—ithumwui Avāna athumli chaimi kahai ngalei saikorawui eina awui naobingli chihorā kazipkhuina.

¹⁶"Yanglu, ina khai kaphā kachungkhali chihora, da ithumwui Avāna hānga; athumna athumli tukkhuira. Chitharan sā phā kachungkhali chihora, athumna phungrei saikora, kaphung saikora, kala lungharbingwui akhur-akhailungwui eina athumli phāra. ¹⁷Kaja iwui mikna athumwui shongfa saikora theichinga; athum iwui mai eina mangathummana, athumwui khayonkhamāngla iwui mikwui eina mangathummana. ¹⁸Athumna iwui ngaleili athumwui mayangkhangai meoma̱wui kathingun eina sākhamāng ngasakhaida, kala iwui shimluikat athumwui ningkakachai ot eina pemngasakhaiwui vang, khare ina athumwui khayon kala morei khani chungmeida runmira."

¹⁹Iwui Avā, iwui pangshapa kala iwui raipanna, kakhanang atamli iwui ngayin khavaina! Yurbingna okathui akatang eina nawuili rāhāngra, "Ithumwui avāva̱ ngarāna kakapik tui maningla khikha makhuikashokmana, arema ot, khikha makannā otbing. ²⁰Mi akhana khalattawui vang varebing sākhuishapla? Chithālala hibing varebing maningmana!"

²¹"Chiwui vang eina, yanglu, hitharan ina athumli theingasakra; iwui pāng kala iwui sāshap athumli theingasakra, kala athumna iwui ming chi Avāna da theira."