Judahwui Ningli Yeksang Kahai Morei
Judahwui morei athumwui wuklungli lungwui ruksang thāda kapihaida lei. Mirin khani ngasoda lei: mikumowui asā eina ngarokkhangai chiya siwukwui arongnao thāda thengsera, kala awui Avāli kachihāna chiya kazing kakāng atamlila ngayung-ngayang sāra. Jeremiahna aikhavai seihāla sāa, chiwui thili sabbaththangwui vang ngachonmi.
17 1Judahwui morei chi athum aningli kala athumwui hanphutwui angajibingli mariwui kolom eina yeksang kahaina, diamond amuk eina namsang kahaina,
2"kaphung kajuiabingtonli matekchim kahai thingpheibing kānda khalei athumwui hanphutbing kala Asherim chi athumwui naongarābingna phaningunga. a a v2 Asherim chiya Asherah da kaho, Canaannaobingwui apharatwui sha̱nao varebi akha khorumwui vang sākānganing kahai thing karuk otbingna. 3Nawui leiret peichaoda khalei morei chiwui vang, ngalemli khalei iwui kaphung, nawui kashāng, nawui lan saikora, kala nawui kajuia khorumpambing chila ina ngaponkakhui khavai chihora. 4Nawui khalattawui pāng eina, ina mikahai shimlui chi na mavātra, kala nana matheia ngaleili ina nali nawui yangkashebingwui otram ngatha̱ ngasakra; kaja nathumna iwui malungkhavātli mei tāshung kahaina, chi katang makhavai chuichingra.
5Ithumwui Avāna hithāda hānga: Mikumoli shitkasanga mi, miwui yāngla ning tongchaoda mi, kala awui wuklung iwui eina ngareithui mi chi khonkashi ngasāra. 6Ana siwukli khalei thingpom kathā ngasāra; kaphā rāranglakhala vikasang masamphang, kala lamhāngwui ngalei kathengbingli, mi khipākha mapampam machi ngaleili pamra. 7Kha ili shitkasanga, awui ning khanganung iwuili khalei mi chi sokhamina. 8Ana tara̱ kānda phurshom kahai thingrong, kongrā kānda awui angayung ngayaovā kathāna. Kasā rā tharan ana khangachee maleimana; awui aphāngbing matekchim china. Kazing kakāng kumli ana malung maringmana kala athei chitheida katang matheng ngasakmana. 9Ning hi ot saikora vāshungda mithitkha̱na kala kharaimikhavai maleimana. Chili khipāna bhap tārarkhala? 10Mi kachiva̱li kachichāwui shongfa athishurda, athumwui otsakwui samphangkhangayi athishurda sāman mikhavai, ina, nathumwui Avāna, wuklung kapeoyanga kala leichui chāng tamyanga. 11Kakap vānaona khalatta mapum ara̱bing nganaokhui thāda, mamashungla kashāng tongkhui mi chila chithāra. Awui kharing tampākli kashāng china ali horhaora, kala khanao eina ana mangkhama̱ akha da kachitheina."
12Haokaphokwui eina masot chikata tekhamatei wungpamkhong akha, ithumwui kathara shimwui pamkhavaina. 13Ithumwui Avā, Israelwui kachihāna, nali horchao mi saikora mai shira. Nawui eina ngareithui mibing chi chifali kapisangra, kaja athumna kharing tara̱wui ura̱, ithumwui Avā chi horhai kahaina.
14Ili raimilu, O iwui Avā, kala I raihaora; ili huimilu, kala I kahui samphangra, kaja na iwui masot khame china. 15Yanglu, athumna ili hāngshonda lei, "Varewui Tui kali leikhala? Ara rāranu!" 16Kha yaokahoma ngasakwui eina ina mangakhuimana, nawui vang otram ngatha̱ki, lah kalāshātwui zimiksho ina malongngaimana. Iwui morchai eina vengsang kahai chi nana thei; chi nawui mangāli phong eina leisai. 17Iwui vang khangachee ngasakalu; kalāshātwui zimiksholi na iwui ngayin khavaina. 18Iwui rekakharekbing maishi ngasakranu, kha ili mai mashi ngasaklakalu; athum akha̱ sāhaoranu, kha ili akha̱ masālakalu. Athumwuitungli kalākashiwui zimiksho tāngasakmilu; sākashimān khani eina athumli akha̱ sāmilu.
Avāna Sabbath Ningtongwui vang Hokhui
19Ithumwui Avāna ili hānga: Vāda mibingwui ngaveili rānganinglu, Judahwui awungabingna kazang kashok sāwui ngaveili, kala Jerusalemwui ngavei saikorali,
20kala athumli hānglu: Ithumwui Avāwui tui nganālu, O Judahwui awungabing, Judah saikora, kala ngavei hili kānkazanga Jerusalemwui mi saikora. 21Ithumwui Avāna hithāda hānga: Nathumwui manglāwui vang ningshailu; Sabbaththang otphun makhuiphungalu, kala Jerusalemwui ngavei eina otphun makhuizangalu. 22Sabbaththang nathumwui shim eina otphun makhuishokalu, kala ot akhala masāpaimara, kala ina navā ngarāli kakaso athishurda, Sabbath zimiksho kathar eina mayonlu. 23Athumna manganāsangmana kala nganātitkhui masāmana; athumna ngakaishitingting, nganā masangda hāngkhamachinli makhuisangthuwa. 24Kha nathumna kachangkhat eina ili nganāsangakha, da Ithumwui Avāna hānga, kala Sabbaththang keinung hiwui ngavei eina otphun makhuizangakha, kala Sabbath zimiksho kathar eina mayonda, chithang ot akhala masāla, 25chieina Davidwui wungpamkhongli kapama awungabing kala wungnaobingla, athumwui otva̱bingla, Judahwui mibingla, kala Jerusalemwui mibingla sigui kala siguigari tonglaga keinung hiwui ngaveili zangra; kala keinung hi mashimānda pānra. 26Judahwui keinungbing eina, Jerusalemwui kuimarei eina, Benjaminwui lam eina, angakoram eina, kaphungram eina, kala Negeb eina mibingna Ithumwui Avāwui shimli rikkatā kachigat, pha̱kaphayā, tharāzat kachigat, nganamkaphā, kala ningkashi kachigat khuirāra. 27Kha nathumna Sabbath zimiksho kathar eina mayon khavai, kala Sabbaththang Jerusalemwui ngavei eina otphun makhuizang khavai, ili manganāsangakha, ina chiwui ngaveili mei sa̱tāra, chi mamit ngasakrarmara, kala Jerusalemwui konungbing chuiserra.
