Yelemiya 17 FHB Father's Heart Bible™

17 ¹Masumu ma Yuta másonama ni kisyati kya kisengu, básonika ni nsongi wa tadi dyangolu ha dibaya dya mbundu ya bawu yi ha mphoka za mesa ma bimenga ma bawu,

²«Bwosu bana ba bawu bisi bambuka mesa ma bimenga ma bawu yi makunzi ma Ashela ma bawu kuna lweka lwa miti wa tsi ha mongu mya mbuta. ^a a v2 Makunzi ma Ashela mákala bima bya nti bina bázenga amana bátelimisa mu kufukamina Ashela, nzambi wankhetu wa butuka wa bisi Kanana. ³Mongu wama wuna wenina mu mfinda, kimvwama kyaku yi bima byaku byosu bya thalu, yikuheka byawu hanga muluta, bihomani byaku bina bizangama phi, kikuma kya masumu mana menina mu mulambu waku wosu. ⁴Ni koku kyaku ngeyi mosi wukatótisa kyuka kina yákuheka ngeyi, amana yikakúkhitula musadi wa bambeni baku mu tsi yina wuzayiku, mukuma wákinda mbawu mu khabu yama yina yakayóka mu mvula yi mvula.

⁵Mana kazimbula Tata wetu: Wasingwa mutu wuna wisi kwikila mwena batu kwandi, wuna wisi dihana ha ngolu za mutu, amana mbundu yandi yisi katuka kwena meni. ⁶Yandi kakála hanga kivunza kya mu mfinda kina kisimonaku talala ata dyakwisa mboti, kisi zinga mu bihomani bya mfinda bina biyuma, mu tsi ya mungwa yina ka mutu ku kasi zinga. ⁷Kaasi wasambuka mutu wuna wisi kwikila mwena meni, wuna kivuvu kyandi kyenina mwena meni. ⁸Yandi kakála hanga miti wuna bákuna kuna lweka lwa mamba, wuna wisi fidisa misodi myawu kuna nzadi. Wusimonaku wonga tangwa mwini wisa; khaya yandi yikala ya tsi. Wusiyengalakanaku mu mvula ya khangu amana wusibikaku kuta bibundu. ⁹Mbundu yenina yi bukamvi kuhiti bima byosu amana yisibeluswaku—nani wulenda kubakisa? ¹⁰Meni, Tata wenu, yisi sanda mbundu amana yisi meka ngangu, ndangu yifuta kosu mutu mu kitesu kya nzila zandi, mu kitesu kya bisalu byandi. ¹¹Hanga nuni wuna wisi vwanda ha maki mana kabutaku, bwabuna kenina mutu wuna wisi vwa kimvwama mu nzila ya mbi. Muna kati dya luzingu lwandi, kimvwama kyandi kyakámusisa, amana ku tsuka kamónika hanga zoba.»

¹²Kiti kya kipfumu kya khembu, kyátombulwa tuka ku luyandiku, kyenina homa ha kikumbu kyetu. ¹³A Tata wetu, ngeyi kivuvu kya Kiseledi, boosu bana bisi kuyambula bamóna nsoni. Bana bisi katuka kwena ngeyi bakasónama mu mputulu, mukuma báyambula Tata wetu, tho ya mamba ma moya.

¹⁴Mbelula, A Tata wama, amana yikabéluka; mphulula, amana yikahúluka, mukuma ngeyi wuna yisi kumisa. ¹⁵Tala, bawu bisi kuzimbwala kwena meni: «Kweti kwenina ndinga ya Nzambi? Yakwisa buthwena!» ¹⁶Kaasi yísatinaku mu kukala muhungudi mu kisalu kyaku, yísazolaku phi kilumbu kya mphasi. Ngeyi wuzayi mana malubukidi ha malebu mama; mákala bwabu-bwabu ha ntwala waku. ¹⁷Kukalaku kima kya boma kwena meni; ngeyi wenina kiswaminu kyama mu kilumbu kya disa. ¹⁸Bana bisi kunsosila bamona nsoni, kaasi meni heku; bawu batóluka, kaasi meni heku. Tula ha bawu kilumbu kya disa; batolula bawu mu mbebolo za mbala zodi.

Tata Wubokila mu Kulunda Kilumbu kya Sabata

¹⁹Mana wázimbula Tata wetu kwena meni: Wenda telama ha mwelu wa batu, henina bakyamvu ba Yuta bisi kota yi kulubuka, yi ha myelu myosu mya Yelusalemi,

²⁰amana ubazimbwala: Yukenu ndinga ya Tata wetu, benu bakyamvu ba Yuta, benu Yuta yosu, yi benu boosu bana bisi zinga mu Yelusalemi bana bisi kota muna myelu meni. ²¹Tala mana kazimbudini Tata wetu: «Kengilenu moya myenu—lunataku kiyeka mu kilumbu kya sabata, keti lukotisa kyawu muna mwelu mya Yelusalemi. ²²Lunataku kiyeka mu nzu zenu mu kilumbu kya sabata, keti mu kusala kisalu kyosu, amana lukitula kilumbu kya sabata kyatoma, hanga buna yábasenda batata ba benu.» ²³Kaasi bázolaku kuyuka keti kuta matu; bázitika misinga mya bawu, bábwisa mu kuyuka keti mu kutambula malongi. ²⁴«Kaasi yuka ni lwangyukila kyedika,» kazimbudini Tata wetu, «amana lunataku kiyeka muna mwelu mya mbanza yayi mu kilumbu kya sabata, amana lukitula kilumbu kya sabata kyatoma, konda kusala kisalu kyosu mu kyawu, ²⁵buna bakyamvu yi bapfumu bana bavwandanga ha kiti kya kipfumu kya Tavidi bákota muna mwelu mya mbanza yayi, babandamana ha makalu yi bakawalu—bawu, basadi ba bawu, batu ba Yuta, yi bisi Yelusalemi—amana mbanza yayi yikála yi batu mu mvula yi mvula. ²⁶Batu bakwísa tuka mu mbanza za Yuta, mu mikinda mya Yelusalemi, mu tsi ya Benzyame, ku banda, muna mina mya khunda, yi ku Negevi, banata bimenga bya kuyoka, mikhayilu, milambu mya madya, pfwabidi, yi makabu ma matondu ku nzu ya Tata wetu. ²⁷Kaasi yuka ni lwangyukilaku—disongidila lukitula kilumbu kya sabata kyatoma, lunataku kiyeka muna mwelu mya Yelusalemi mu kilumbu kya sabata—yikakinda mbawu muna mwelu myandi yina yisiku zima, yina yikavukula nzu za bathotila za Yelusalemi.»