Aịzaya 59 FHB Father's Heart Bible™

59 ¹Lee, aka Nna anyị adịghị mkpụmkpụ ịzọpụta, ntị ya adịghịkwa arọ ịnụ ihe. ²Ma njọ unu ekewapụla unu site nʼebe Nna unu nọ, mmehie unu ezokwala ihu ya pụọ nʼebe unu nọ, nke mere na ọ naghị anụ ihe. ³Nʼihi na ọbara emerụọla aka unu, mmehie emerụọkwala mkpịsị aka unu; egbugbere ọnụ unu ekwuola okwu ụgha, ire unu na-atamu ajọ omume. ⁴Ọ dịghị onye na-akpọku maka ikpe ziri ezi, ọ dịghịkwa onye na-arịọ arịrịọ nʼeziokwu. Ha na-atụkwasị obi nʼihe efu ma na-ekwu okwu ụgha; ha na-atụrụ ime nsogbu ma mụọ ihe ọjọọ. ⁵Ha na-amụpụta akwa ajụala ma na-akpa akwụ udide; onye ọbụla riri akwa ha na-anwụ, mgbe a pịara otu nʼime ha, ajụala na-esi na ya pụta. ⁶Akwụ ha apụghị ịghọ uwe, ha apụghịkwa iji ihe ha na-eme kpuchie onwe ha. Ọrụ ha bụ ọrụ ajọ omume, aka ha jupụtakwara nʼihe ike. ⁷Ụkwụ ha na-agba ọsọ ịga mee ihe ọjọọ, ha na-eme ngwangwa ịwụfu ọbara onye aka ya dị ọcha. Echiche ha bụ echiche ajọ omume; mbibi na ịla nʼiyi dị nʼụzọ ha niile. ⁸Ha amaghị ụzọ udo, ikpe ziri ezi adịghịkwa nʼụzọ ha. Ha emeela ka okporo ụzọ ha gbagọọ agbagọ; onye ọbụla na-aga nʼime ha amaghị udo. ⁹Ya mere ikpe ziri ezi dị anya site nʼebe anyị nọ, ezi omume erukwaghị anyị aka. Anyị na-eche ìhè, ma ọ bụ naanị ọchịchịrị dị; anyị na-eche ìhè na-enwu enwu, ma anyị na-aga nʼoke ọchịchịrị. ¹⁰Anyị na-asọ aka nʼahụ mgbidi dịka ndị ìsì; dịka ndị na-enweghị anya ka anyị na-asọ aka. Anyị na-asụ ngọngọ nʼehihie dịka a ga-asị na ọ bụ nʼoge anyasị; nʼetiti ndị dị ike anyị dị ka ndị nwụrụ anwụ. ¹¹Anyị niile na-agbọ ụja dịka anụ ọhịa bea, na-asụkwa ude nke mwute dịka nduru. Anyị na-eche ikpe ziri ezi, ma ọ dịghị; na-eche nzọpụta, ma ọ nọ anya site nʼebe anyị nọ. ¹²Nʼihi na nnupụisi anyị dị ọtụtụ nʼihu gị, mmehie anyị na-agbakwa ama megide anyị. Nnupụisi anyị nọnyeere anyị, anyị makwaara ajọ omume anyị: ¹³inupụ isi na ịgọnarị Nna anyị, ịgbakụta azụ nʼiso Nna anyị, ịkwu okwu mmegbu na nnupụisi, ịtụ ime ma na-atamu okwu ụgha site nʼobi.

¹⁴Ya mere a chụghachiri ikpe ziri ezi azụ, ezi omume na-eguzokwa ebe dị anya; nʼihi na eziokwu asụọla ngọngọ nʼama, izuoke apụghịkwa ịbata. ¹⁵Eziokwu efuola, onye ọbụla si nʼihe ọjọọ chepụ onwe ya ka a na-apụnara ihe. Nna anyị hụrụ ya, ọ dịghịkwa amasị ya na ikpe ziri ezi adịghị. ¹⁶Ọ hụrụ na ọ dịghị onye ọbụla, o juru ya anya na ọ dịghị onye ga-etinye aka; ya mere aka ya kpọtara nzọpụta, ezi omume ya kwagidere ya. ^a a v16 Nna anyị hụrụ na ọ dịghị onye pụrụ ịzọpụta, ya mere o zipụrụ aka nke ya — ike nke nzọpụta ya. Jọn kọwara aka Nna anyị dịka Jisọs (Jọn 12:38). ¹⁷O yiri ezi omume dịka ihe mgbochi obi, kpukwaa okpu igwe nke nzọpụta nʼisi ya; o yikwasịrị onwe ya uwe nke mgbapụta ma jiri ịnụ ọkụ nʼobi kee onwe ya dịka uwe mwụda.

¹⁸Dịka omume ha si dị, otú ahụ ka ọ ga-akwụghachi: ọnụma nye ndị iro ya, ụgwọ nye ndị kpọrọ ya asị; nye ala ndị dị nʼakụkụ osimiri dị anya ka ọ ga-enye ha ihe kwesịrị ha. ¹⁹Ya mere ha ga-atụ egwu aha Nna anyị site nʼọdịda anyanwụ, tụọkwa egwu ebube ya site nʼọwụwa anyanwụ; nʼihi na ọ ga-abịa dịka iyi na-asọ asọ, nke ikuku Nna anyị na-achụ. ²⁰Mgbe ahụ Onye Mgbapụta ahụ ga-abịa Zayọn, bịakwute ndị nọ na Jekọb ndị si na mmehie ha chegharịa, ka Nna anyị kwupụtara. ^b b v20 Pọl hotara amaokwu a banyere ọbịbịaghachi Jisọs — Ndị Rom 11:26. Onye Mgbapụta ahụ nke na-abịa Zayọn ịchịkọta ụmụ Nna anyị bụ Jisọs.

²¹“Ma banyere mụ onwe m, nke a bụ ọgbụgba ndụ m mụ na ha,” ka Nna anyị na-ekwu: “Mmụọ m nke dị gị nʼahụ, na okwu m nke m tinyere nʼọnụ gị, agaghị esi nʼọnụ gị pụọ, maọbụ nʼọnụ ụmụ gị, maọbụ nʼọnụ ụmụ ụmụ gị,” ka Nna anyị na-ekwu, “site ugbu a gaa nʼihu ruo mgbe ebighị ebi.”