ኢዱ ኣይሓፀረትን

ናይ ኣቦና ምስማዕ ዝኾነ ጉድለት የብሉን፤ እቲ ኣብ መንጎ ዝፈሊ ሓጢኣት እዩ። እቲ ህዝቢ ባዕሉ ይገልፆ፥ ፍርቂ መዓልቲ ንመንደቕ ሃሰስ እናበሉ፥ ዘይመፅእ ፍትሒ እናተፀበዩ። ዝኣቱ ስለ ዘይነበረ ድማ፥ ንሱ ተዓጢቑ ነቶም ዝምለሱ ቤዛ ኾይኑ ይመፅእ።

ምዕራፍ 59።

እንሆ፥ ኢድ ኣቦና ንምድሓን ኣይሓፀረትን፤ እዝኑ ኸዓ ንምስማዕ ኣይከበደን። በደላትኩም ግና ኣብ መንጎኹምን ኣብ መንጎ ኣቦኹምን ፈለዩ፤ ሓጢኣትኩም ድማ ገፁ ኻባኻትኩም ሰወሮ፤ ስለዙይ ኣይሰምዐን። ኣእዳውኩም ብደም፥ ኣፃብዕትኹም ድማ ብሓጢኣት ረኺሰን እየን እሞ፤ ከናፍርኩም ሓሶት ተዛረባ፤ ልሳንኩም ክፍኣት ተዛረበ። ንፍትሒ ዝፅውዕ የለን፤ ብቕንዕና ዝማጐት ከዓ የለን። ብኸንቱ ይውከሉ፥ ሓሶት ይዛረቡ፤ መከራ ጠኒሶም ክፍኣት ይወልዱ። እንቍላሊሕ ኣትማን ይፍልፍሉ፥ ድር ሳሬት ከዓ ይኣልሙ፤ ካብ እንቍላሖም ዝበልዐ ይመውት፤ ሓደ እንተ ተሰብረ ኸዓ መንደላይ ተመን ይወፅእ። ድሮም ክዳን ክኸውን ኣይኽእልን፤ በቲ ዝሰርሕዎ ድማ ነብሶም ክኽደኑ ኣይኽእሉን። ግብርታቶም ግብሪ ዓመፅ እዩ፤ ኣእዳዎም ከዓ ግፍዒ መሊአን። ኣእጋሮም ናብ ክፉእ ይጐዩ፤ ንፁህ ደም ንምፍሳስ ከዓ ይቕልጥፉ። ሓሳባቶም ሓሳብ ዓመፅ እዩ፤ ጥፍኣትን ብርሰትን ኣብ ኵሉ መንገዶም ኣሎ። መንገዲ ሰላም ኣይፈልጡን፤ ኣብ መገዶም ከዓ ፍትሒ የለን። ንመገዶም ኣጣዊዮምዎ፤ ብእኡ ዝኸይድ ሰላም ኣይፈልጥን። ስለዙይ ፍትሒ ካባና ረሓቐ፤ ፅድቂ ኸዓ ኣይበፅሐናን። ብርሃን ተፀቢና፥ እንሆ ግና ፀልማት፤ ነፀብራቕ ተፀቢና፥ ኣብ ጣቓ ግና ንኸይድ። ንመንደቕ ከም ዕዉራት ሃሰስ ንብል፤ ከም ዓይኒ ዘይብሎም ሃሰስ ንብል። ፍርቂ መዓልቲ ኸም ድንግዝግዝ ንዕንቀፍ፤ ኣብ ማእኸል ሓያላት ከም ምዉታት ኢና። ኵላትና ኸም ድብታት ነጓዝም፥ ከም ርግቢ ኸዓ ብዙሕ ነስቆርቁር። ፍትሒ ተፀቢና፥ የለን ግና፤ ምድሓን ተፀቢና፥ ካባና ግና ረሓቐ። ምትሕልላፍና ኣብ ቅድሜኻ በዚሑ እዩ እሞ፤ ሓጢኣትና ድማ ኣባና ይምስክር። ምትሕልላፍና ምሳና ኣሎ፥ ዓመፅናውን ንፈልጥ ኢና፦ ኣንፃር ኣቦና ዓሊና ክሒድናዮ፥ ንኣቦና ኻብ ምስዓብ ንድሕሪት ተመሊስና፥ ግፍዕን ምዕፃይን ተዛሪብና፥ ካብ ልቢ ናይ ሓሶት ቃላት ፀኒስና ኣውዚምና።

ስለዙይ ፍትሒ ንድሕሪት ተመለሰ፤ ፅድቂ ኸዓ ርሑቕ ደው ኢሉ፤ ሓቂ ኣብ ኣደባባይ ተዓንቂፉ እዩ እሞ፥ ቅንዕና ክኣቱ ኣይኽእልን። ሓቂ ተሳኢኑ፥ ካብ ክፉእ ዝርሕቕ ድማ ይዝመት። ኣቦና ኸዓ ረአዮ፤ ፍትሒ ብዘይምህላዉ ድማ ኣጕሃዮ። ሓደ እኳ ከም ዘይነበረ ረአየ፤ ዝማለድ ሰብ ብዘይምህላዉ ኸዓ ተገረመ፤ ስለዙይ ቅልፅሙ ምድሓን ኣምፅአ፤ ፅድቁ ኸዓ ደገፎ። ^a ፅድቂ ኸም ድርዒ ተኸድነ፤ ቝራዕ ርእሲ ምድሓን ከዓ ኣብ ርእሱ ደፍአ፤ ክዳን ሕነ ተኸድነ፥ ቅንኣት ከዓ ኸም ኩታ ተጐልበበ።

ከም ግብሮም፥ ከምኡ ኽፈዲ እዩ፤ ንተፃረርቱ ቍጥዓ፥ ንፀላእቱ ኸዓ ፍዳ፤ ነተን ርሑቓት ደሴታት ዝግብአን ክህበን እዩ። ስለዙይ ካብ ምዕራብ ንስም ኣቦና፥ ካብ ምብራቕ ፀሓይ ከዓ ንኽብሩ ክፈርሑ እዮም፤ ብንፋስ ኣቦና ዝድፋእ ብርቱዕ ውሒዝ ኮይኑ ክመፅእ እዩ እሞ። ሽዑ ተበጃዊ ናብ ፅዮን፥ ናብቶም ኣብ ያእቆብ ካብ ሓጢኣቶም ዝምለሱ ክመፅእ እዩ፥ ይብል ኣቦና። ^b

ኣነ ኸዓ፥ “እዙይ ምስኣቶም ዝገብሮ ኪዳነይ እዩ” ይብል ኣቦና፦ “እቲ ኣባኻ ዘሎ መንፈሰይ፥ ኣብ ኣፍካ ዘንበርክዎ ቃላተይ ድማ፥ ካብ ኣፍካ፥ ካብ ኣፍ ደቅኻ፥ ካብ ኣፍ ደቂ ደቅኻ እውን ኣይፍለን እዩ” ይብል ኣቦና፥ “ካብ ሕዚ ጀሚሩ ንዘለኣለም።”