Bilie, Ìhè Gị Abịala

Ọchịchịrị ka kpuchiri ụwa, ma ìhè awaala n'otu obodo, ije ahụ wee tụgharịa: a na-ebute ụmụ nwoke n'ụlọ, kamel si Sheba, ndị mba ọzọ na-ewughachi mgbidi ha kwaturu. Ọnụ ụzọ ama anaghị emechi emechi. Anyanwụ adịghịzi mkpa, n'ihi na Nna anyị bụ ìhè nke na-adịghị ada ada.

Isi 60.

Bilie, nwuo ọkụ, nʼihi na ìhè gị abịala, ebube Nna anyị awakwasịkwala gị. Nʼihi na ọchịchịrị ga-ekpuchi ụwa, oke ọchịchịrị ga-ekpuchikwa ndị niile; ma Nna anyị ga-awakwasị gị, a ga-ahụkwa ebube ya nʼahụ gị. Mba dị iche iche ga-abịa nʼìhè gị, ndị eze ga-abịakwa nʼìhè nke chi ọbụbọ gị.

Welie anya gị lee gburugburu ma hụ: ha niile na-ezukọ ọnụ, ha na-abịakwute gị; ụmụ gị ndị ikom si nʼebe dị anya na-abịa, a na-ebukwa ụmụ gị ndị inyom nʼukwu. Mgbe ahụ ị ga-ahụ wee na-enwu enwu; obi gị ga-amapụ ma jupụta nʼọṅụ, nʼihi na ịba ụba nke oke osimiri ga-echigharịkwute gị, akụ na ụba nke mba niile ga-abịakwute gị. Igwe ịnyịnya kamel ga-ekpuchi gị, ụmụ ịnyịnya kamel nke Midian na Ifa; ndị niile si na Sheba ga-abịa, na-ebu ọlaedo na frankinsens, ha ga-ekwusakwa otuto Nna anyị.

A ga-achịkọta ìgwè anụ ụlọ niile nke Keda nye gị, ebule nke Nebaiọt ga-ejere gị ozi; a ga-achụ ha dịka àjà nʼelu ebe ịchụàjà m ma nabata ha, m ga-emekwa ka ụlọ ebube m dị ebube.

Ònye ka ndị a bụ, ndị na-efe dịka igwe ojii, na dịka nduru na-efebata na windo ha? Nʼezie, ala ndị dị nʼakụkụ oke osimiri na-echere m, ụgbọ mmiri nke Tashish ga-ebu ụzọ, iji si nʼebe dị anya kpọta ụmụ gị, ha na ọlaọcha na ọlaedo ha, nʼihi aha Nna gị, Onye Nsọ nke Izrel, nʼihi na o nyela gị otuto.

Ndị ọbịa ga-ewugharị mgbidi gị, ndị eze ha ga-ejekwara gị ozi; nʼihi na nʼoké iwe m, e tiri m gị ihe, ma site nʼamara m, obi m nwere ọmịiko nʼebe ị nọ. Ọnụ ụzọ ámá gị ga-eghe oghe mgbe niile; ehihie na abalị, a gaghị emechi ha, ka e wee bute akụ na ụba nke mba niile nye gị, na-edukwa ndị eze ha nʼusoro. Nʼihi na mba na alaeze nke na-agaghị ejere gị ozi ga-ala nʼiyi; a ga-ala mba ndị ahụ nʼiyi kpamkpam.

Ebube Lebanọn ga-abịa nʼebe ị nọ—osisi saịprẹsị, osisi plen, na osisi paịnị ọnụ—iji chọọ ebe nsọ m mma; m ga-emekwa ka ebe ụkwụ m dị ebube. Ụmụ ndị megburu gị ga-abịa na-akpọ isiala nʼihu gị; ndị niile ledara gị anya ga-akpọ isiala nʼụkwụ gị. Ha ga-akpọ gị Obodo Nna anyị, Zayọn nke Onye Nsọ nke Izrel.

Ọ bụ ezie na a gbahapụrụ gị ma kpọọ gị asị, onye ọ bụla na-adịghị esi na gị gafee, m ga-eme gị ihe ịnya isi ebighị ebi, ihe ọṅụ site nʼọgbọ ruo nʼọgbọ. Ị ga-aṅụ mmiri ara nke mba dị iche iche, ị ga-aṅụkwa ara nke ndị eze; ị ga-amatakwa na mụ onwe m, bụ Nna gị, bụ Onye Nzọpụta gị na Onye Mgbapụta gị, Onye Dị Ike nke Jekọb—bụ Nna gị. Nʼọnọdụ bronz, m ga-eweta ọlaedo, nʼọnọdụ igwe, m ga-eweta ọlaọcha, nʼọnọdụ osisi, bronz, nʼọnọdụ nkume, igwe. M ga-eme udo onye ọchịchị gị, meekwa ezi omume onye na-ahụ maka ọrụ gị. A gaghịkwa anụ ihe ike nʼala gị ọzọ, maọbụ mbibi na ịla nʼiyi nʼime oke ala gị; kama ị ga-akpọ mgbidi gị Nzọpụta, kpọọkwa ọnụ ụzọ ámá gị Otuto.

Anyanwụ agaghịkwa abụ ìhè gị nʼehihie ọzọ, ọnwa agaghịkwa enye gị ìhè ya; kama Nna anyị ga-abụ ìhè gị ebighị ebi, Nna gị ga-abụkwa ebube gị. ^a Anyanwụ gị agaghịkwa ada ọzọ, ọnwa gị agaghịkwa apụ apụ; nʼihi na Nna anyị ga-abụ ìhè gị ebighị ebi, ụbọchị iru uju gị ga-agwụkwa. Ndị gị niile ga-abụ ndị ezi omume; ha ga-enweta ala ahụ ruo mgbe ebighị ebi— alaka nke m kụrụ, ọrụ aka m, ka e wee nye m otuto. Onye dịkarịsịrị nta ga-aghọ otu puku, onye kachasị nta ga-aghọkwa mba dị ike. Mụ onwe m bụ Nna gị; mgbe oge ya ruru, m ga-eme ka o mezuo ngwa ngwa.