Isaiah 60

60 ¹Ngakarthuilu, horlu, kaja nawui kahor rāhaira, kala ithumwui Avāwui tekhamatei nawuitungli shokhaira. ²Kaja tangkhamangna okathuili khaluiphinra, kala tangkhamang kashāna mibingli khaluiphinra; kha ithumwui Avāna nawuitungli shokra, kala awui tekhamatei nawuitungli theira. ³Yurbingna nawui kahorli rāra, kala awungabingna nawui kazing shokwui horchamri chili rāra.

⁴Nawui mik kuimareida ngashānkāda yanglu: athum saikora rākazipserda, nawuili rāra; nawui naomayarabing katāva̱wui eina rāra, kala nawui naongalāva̱bing shaksha̱ chili khuikhavā ngasakra. ⁵Chiwui thili nana theida horngasakra; nawui ning nganuka kala worra, kaja yireiwui mavāt nawuishong rāra, yurbingwui shāng nawuili rāra. ⁶Midianwui kala Ephahwui utnaobing, ut kachungkhana nawuili khaluiphinra; Shebawui eina saikorana rāra, sinā kala frankincense phungruma, kala athumna ithumwui Avāwui masot hāngmira.

⁷Kedarwui yao saikora nawuili rākazipsera, Nebaiothwui ramsābingna nawuili otram ngatha̱ra; athum iwui hanphuttungli chigatra kala khuisangra, kala ina iwui tekhamatei shimli tekmatei ngasakra.

⁸Muiyā thāda, kala nāsha̱ athumwui charfali rārā thāda, yongkasābing hi khipālongkhala? ⁹Kachangkhat shamadrupheibingna ili ngahonra, Tarshishwui marikhongbing rida, nawui naomayarabing katāva̱wui eina thānrā khavai, athumwui lupā kala sinā zangda, nawui Avāwui ming vang, Israelwui Kathara, kaja ana nali tekmatei ngasakhaira.

¹⁰Yur kateibingna nawui phākho sākāra, kala athumwui awungabingna nawuili otram ngatha̱ra; kaja iwui malungvāt eina ina nali sāthaira, kha iwui mayākhami eina ina nawui vang lukhamashan pemtinghaira. ¹¹Nawui ngaveibing sho kahai leichingra; athumwui awungabingli mangāshong thānvāda yurbingwui shāng nawuili thānrā khavai, ngashun ngayā chi shungkahai mavaimara. ¹²Kaja nawuili otram matha̱mi yur kala wungram chi shimānra; yur chibing katonga sākathānhaora.

¹³Iwui katharapam tekmatei khavai Lebanonwui tekhamatei, cypressthing, thingsanthing, kala matangthing phorrum, nawuili rāra; kala ina iwui phei pamli tekmatei ngasakra. ¹⁴Nali rekhareklakhaibingwui naomayarabingna nawui mangāli ngakhumshāmda rāra; nali yangkharingkahaibing saikora nawui pheizingli khorumra. Athumna nali ithumwui Avāwui keinung, Israelwui Katharawui Zion da hora.

¹⁵Thot-thot kachida mai khavai, na horhaida kala ningkachaikapai, mi akhala makānkhavā ngasālala, ina nali katang makhavai maikhayā sāngasakra. ¹⁶Nana yurbingwui seina̱ mangra, kala awungabingwui na̱ mangra; kala Ina, nawui Avā, nawui Huikhame kala nawui Ngatangkhame, Jacobwui Kapangpanga, nawui Avā ngasāra da nana theira. ¹⁷Pithraiwui mahutle ina sinā thānrāra, mariwui mahutle ina lupā thānrāra, thingwui mahutle pithrai, kala lungguiwui mahutle mari thānrāra. Ina chingri chi nawui governor ngasakra, kala khamashung khangarong chi nawui kathāna ngasakra. ¹⁸Nathumwui ngaleili khangashao mashāluimara, nathumwui tharilungli ngachakyāng kala sākashimān maleiluimara; kha nathumna nathumwui phākholi Huikhami da hora, kala nathumwui ngaveili Masot da hora.

¹⁹Ngashun zimikna nathumwui kahor maleiluimara, kala kachāngna nathumli awui kahor mamimara; kha ithumwui Avā nathumwui katang makhavai kahor ngasāra, kala nathumwui Avā nathumwui tekhamatei ngasāra. ^a a v19 Revelation-na hi ngashit chi latluida hānga: keinung sākahai Jerusalem chili hormi khavai zimikla kachāngla khikha masāvaimana, kaja ithumwui Avāwui tekhamateina chiwui kahorna, kala Jishu Yaonaona chiwui thaomeina (Rev 21:23). ²⁰Nathumwui zimik matunluimara, kala nathumwui kachāng makhuithuilakmara; kaja ithumwui Avā nathumwui katang makhavai kahor ngasāra, kala nathumwui sifawui zimiksho tanghaora. ²¹Nathumwui mibing saikora khamashunga ngasāra; athumna ngalei chi katang mavaila samphangra. Iwui tekhamatei theingasak khavai, athum iwui lingsang kahai aphāng, ipāngwui otsakna. ²²Teomeikap kaje chi thing akha ngasāra, kala teomeithui kaje kapanga yur akha ngasāra. I nathumwui Avāna; khuisangmikapai atamli, ina chi thākta shok ngasakra.