Telama, Nsemo ya Nge Me Kwiza
Kitombe ke fuka ntoto ntete, kasi nsemo me basika na zulu ya mbanza mosi, mpe mambu ke baluka: bana ya bakala ba ke nata bawu na yinzo, bakamela katuka na Seba, banzenza ke tunga dyaka bibaka yina bawu bebisaka. Bamwelo ke kanga ata ntangu mosi ve. Ntangu ke kuma dyaka ya mfunu ve, samu ti Tata ya beto kele nsemo yina ke dindaka ve.
Tata ya beto ke zonza na bavese 7–22
60 1Telama, lezima, samu nsemo ya nge me kwiza, mpe nkembo ya Tata ya beto me basika na zulu ya nge. 2Samu kitombe ke fuka ntoto, mpe kitombe ya ngolo ke fuka bantu; kasi Tata ya beto ke basika na zulu ya nge, mpe nkembo ya yandi ke monikina na zulu ya nge. 3Makanda ke kwiza na nsemo ya nge, mpe bantinu ke kwiza na nsemo ya suka ya nge.
4Nanguna meso ya nge na balweka nyonso mpe tala: bawu nyonso ke vukana, bawu ke kwiza na sika ya nge; bana ya bakala ya nge ke katuka ntama, mpe ba ke nata bana ya bakento ya nge na dibunda. 5Na yina, nge ke tala mpe nge ke lezima; ntima ya nge ke tekita mpe ke vimba, samu ti bimvwama ya mubu ke baluka na sika ya nge, bimvwama ya makanda ke kwiza na sika ya nge. 6Nkonga ya bakamela ke fuka nge, bana ya bakamela ya Midyane mpe ya Eyifa; bawu nyonso ya Seba ke kwiza, ba ke nata wolo mpe maaka ya nsunga ya mbote, mpe bawu ke samuna lukumu ya Tata ya beto.
7Bibulu nyonso ya Kedale ba ke kutika na sika ya nge, bameme ya bakala ya Nebayote ke sadila nge; ba ke pesa yawu na Kiyokolo ya munu mpe mu ke ndima yawu, mpe mu ke kembisa Yinzo ya munu ya nkembo.
8Bantu yayi kele banani, bayina ke pumbuka mutindu dituti, mpe mutindu mabembe ya ke kwiza na banela ya bawu? 9Ya tsyelika, bayinsi ya kumu ya mubu ke vingila munu, babwatu ya Talesise ke kwiza ntete, samu na kunata bana ya bakala ya nge katuka ntama, ti palata mpe wolo ya bawu, samu na Nkumbu ya Tata ya nge, Muntu ya Longo ya Isayeli, samu ti yandi me kembisa nge.
10Banzenza ke tunga bibaka ya nge, mpe bantinu ya bawu ke sadila nge; samu na nkele ya munu mu bulaka nge, kasi na bumbote ya munu mu talaka nge kyadi. 11Myelo ya nge ke vwanda ya kukangula ntangu nyonso; kilumbu na mpimpa ba ke kanga yawu ve, samu ti ba kunata bimvwama ya makanda na sika ya nge, ti bantinu ya bawu yina ba ke twadisa. 12Samu dikanda mpe kimfumu yina ke sadila nge ve ke fwa; makanda yina ke mwangana mpenza.
13Nkembo ya Libane ke kwiza na sika ya nge—yinti ya sipelese, yinti ya pelatane, mpe yinti ya pini kintwadi— samu na kupesa kitoko na kisika ya longo ya munu; mpe mu ke kembisa kisika ya makulu ya munu. 14Bana ya bayina vwandaka nyokola nge ke kwiza fukama na ntwala ya nge; bantu nyonso yina safulaka nge ke fukama na makulu ya nge. Bawu ke bokila nge Mbanza ya Tata ya beto, Siyone ya Muntu ya Longo ya Isayeli.
15Ata ba me yambula nge mpe ba me menga nge, ata muntu mosi ve vwandaka luta na kati ya nge, mu ke kumisa nge lunangu ya seko, kyese ya mbandu na mbandu. 16Nge ke nwa mabele ya makanda, mpe nge ke nwa mabene na ntulu ya bantinu; mpe nge ke zaba ti munu, Tata ya nge, mu kele Muvuukisi ya nge mpe Mukudi ya nge, Muntu ya Ngolo ya Yakobi—Tata ya nge. 17Na kisika ya mbengi, mu ke nata wolo, na kisika ya kibende, mu ke nata palata, na kisika ya nti, mbengi, mpe na kisika ya matadi, kibende. Mu ke kumisa ngemba mfumu ya nge mpe mambu ya kudedama kapita ya nge. 18Ba ke wa dyaka ve mambu ya ngolo na yinsi ya nge, mpe mbebolo ti kufwa na kati ya bandilu ya nge; kasi nge ke bokila bibaka ya nge Mpulusu mpe bamwelo ya nge Lukumu.
19Ntangu ke vwanda dyaka ve nsemo ya nge na mwini, mpe ngonda ke pesa nge dyaka ve nsemo ya yawu; kasi Tata ya beto ke vwanda nsemo ya nge ya seko, mpe Tata ya nge ke vwanda nkembo ya nge. a a v19 Mukanda ya Kusonga ke tubila dyaka nsilulu yayi: Yelusalemi ya mpa kele ve na nsatu ya ntangu to ngonda, samu ti nkembo ya Tata ya beto kele nsemo ya yawu, mpe Yesu Dimeme kele mwinda ya yawu (Kus 21:23). 20Ntangu ya nge ke dinda dyaka ve, mpe ngonda ya nge ke katuka ve; samu ti Tata ya beto ke vwanda nsemo ya nge ya seko, mpe bilumbu ya kudila ya nge ke suka. 21Bantu ya nge nyonso ke vwanda bantu ya kudedama; bawu ke baka yinsi samu na seko— mutwikila yina mu kunaka, kisalu ya maboko ya munu, samu ti mu kuzwa nkembo. 22Muntu yina me lutila fyoti ke kuma bantu 1000, mpe muntu ya fyoti kuluta ke kuma dikanda ya ngolo. Mu kele Tata ya nge; ntangu me lunga, mu ke sala yawu nswalu.