Zacarias 2

2 ¹Unya mihangad ako ug nakita ko ang usa ka tawo nga nagkupot ug pisi nga igsusukod. ²Nangutana ako, “Asa ka paingon?” Mitubag siya kanako, “Aron sukdon ang Jerusalem, aron makita kon unsa kini kalapad ug unsa kataas.”

³Milakaw ang anghel nga nakigsulti kanako, ug may laing anghel nga migula aron sa pagtagbo kaniya, ⁴ug miingon kaniya, “Dagan, sultihi kining batan-ong lalaki: ‘Ang Jerusalem mahimutang nga daw usa ka bukas nga kaumahan, nga may hilabihang kadaghan sa mga tawo ug kahayopan sa sulod niini.’

⁵Ako mismo mahimong paril nga kalayo libot kaniya, nag-ingon ang atong Amahan, ug ako ang mahimong himaya diha sa iyang sulod.’”

⁶“Dali! Dali! Kalagiw gikan sa yuta sa amihanan, nag-ingon ang atong Amahan, kay gipatibulaag ko kamo sama sa upat ka hangin sa langit, nag-ingon ang atong Amahan. ⁷Dali, Zion! Kalagiw, kamo nga nagpuyo uban sa anak nga babaye sa Babilonia.

⁸Mao kini ang giingon sa Amahan sa kasundalohan sa langit—human nga nagpadala kanako ang iyang himaya batok sa mga nasod nga nangilog kaninyo: si bisan kinsa nga mohikap kaninyo mohikap sa kalimutaw sa iyang mata:

⁹Kay tan-awa, ibayaw ko ang akong kamot batok kanila, ug mahimo silang inagaw alang sa mga nag-alagad kanila. Unya mahibaloan ninyo nga ang Amahan sa kasundalohan sa langit nagpadala kanako.

¹⁰Pag-awit ug paglipay, anak nga babaye sa Zion! Kay tan-awa, moanha ako aron mopuyo uban kaninyo, nag-ingon ang atong Amahan.

¹¹“Daghang mga nasod ang moduyog sa atong Amahan niadtong adlawa ug mahimong akong mga anak. Mopuyo ako uban kaninyo, ug mahibaloan ninyo nga ang Amahan sa kasundalohan sa langit nagpadala kanako nganha kaninyo. ¹²Ug ang atong Amahan mag-angkon sa Juda ingon nga iyang bahin diha sa balaang yuta, ug pilion niya pag-usab ang Jerusalem.

¹³Paghilom, tanang unod, sa atubangan sa atong Amahan, kay mibangon siya gikan sa iyang balaang puloy-anan.”