സെഖര്യാ 2 FHB Father's Heart Bible™

2 ¹പിന്നെ ഞാൻ കണ്ണുയർത്തി നോക്കിയപ്പോൾ, കൈയിൽ അളവുനൂലേന്തിയ ഒരു പുരുഷനെ കണ്ടു. ²“നിങ്ങൾ എവിടേക്കു പോകുന്നു?” എന്നു ഞാൻ ചോദിച്ചു. “യെരൂശലേം എത്ര വീതിയും എത്ര നീളവുമുള്ളതെന്നു കാണേണ്ടതിന് അതിനെ അളക്കുവാൻ” എന്ന് അവൻ എന്നോടു പറഞ്ഞു.

³എന്നോടു സംസാരിച്ചുകൊണ്ടിരുന്ന ദൂതൻ പുറപ്പെട്ടുപോയി; മറ്റൊരു ദൂതൻ അവനെ എതിരേൽക്കുവാൻ പുറത്തുവന്നു, ⁴അവനോടു പറഞ്ഞു: “ഓടിച്ചെന്ന് ഈ യുവാവിനോടു പറയുക: ‘യെരൂശലേമിൽ അനേകം മനുഷ്യരും കന്നുകാലികളും നിറയുകയാൽ അതു മതിലില്ലാത്ത തുറന്ന നാടുപോലെ വസിക്കും.’

⁵ഞാൻതന്നെ അതിനു ചുറ്റും ഒരു അഗ്നിമതിലായിരിക്കും, എന്നു നമ്മുടെ പിതാവ് അരുളിച്ചെയ്യുന്നു; അതിനുള്ളിൽ ഞാൻ തേജസ്സായുമിരിക്കും.’”

⁶“വരുവിൻ! വരുവിൻ! വടക്കേ ദേശത്തുനിന്ന് ഓടിപ്പോകുവിൻ, എന്നു നമ്മുടെ പിതാവ് അരുളിച്ചെയ്യുന്നു; ആകാശത്തിലെ നാലു കാറ്റുപോലെ ഞാൻ നിങ്ങളെ ചിതറിച്ചിരിക്കുന്നു, എന്നു നമ്മുടെ പിതാവ് അരുളിച്ചെയ്യുന്നു. ⁷സീയോനേ, വരിക! ബാബേൽ പുത്രിയോടുകൂടെ വസിക്കുന്നവളേ, രക്ഷപ്പെടുക.

⁸നിങ്ങളെ കൊള്ളയടിച്ച ജാതികൾക്കെതിരേ അവിടുത്തെ തേജസ്സ് എന്നെ അയച്ചശേഷം, സ്വർഗസൈന്യങ്ങളുടെ പിതാവ് ഇപ്രകാരം അരുളിച്ചെയ്യുന്നു: നിങ്ങളെ തൊടുന്നവൻ അവിടുത്തെ കണ്മണിയെ തൊടുന്നു:

⁹ഇതാ, ഞാൻ അവരുടെമേൽ എന്റെ കൈ വീശും; അവർ തങ്ങളെ സേവിച്ചവർക്കു കൊള്ളയായിത്തീരും. സ്വർഗസൈന്യങ്ങളുടെ പിതാവ് എന്നെ അയച്ചിരിക്കുന്നു എന്ന് അപ്പോൾ നിങ്ങൾ അറിയും.

¹⁰സീയോൻപുത്രീ, പാടി ആനന്ദിക്കുക! ഇതാ, ഞാൻ നിന്റെ നടുവിൽ വസിക്കുവാൻ വരുന്നു, എന്നു നമ്മുടെ പിതാവ് അരുളിച്ചെയ്യുന്നു.

¹¹“അന്നാളിൽ അനേകം ജാതികൾ നമ്മുടെ പിതാവിനോടു ചേർന്ന് എന്റെ മക്കളായിത്തീരും. ഞാൻ നിന്റെ നടുവിൽ വസിക്കും; സ്വർഗസൈന്യങ്ങളുടെ പിതാവ് എന്നെ നിന്റെ അടുക്കലേക്ക് അയച്ചിരിക്കുന്നു എന്നു നീ അറിയും. ¹²നമ്മുടെ പിതാവ് വിശുദ്ധദേശത്തു യെഹൂദയെ തന്റെ ഓഹരിയായി അവകാശമാക്കും; യെരൂശലേമിനെ വീണ്ടും തിരഞ്ഞെടുക്കും.

¹³സകല ജഡവുമേ, നമ്മുടെ പിതാവിന്റെ മുമ്പിൽ മൗനമായിരിക്കുക; അവിടുന്ന് തന്റെ വിശുദ്ധനിവാസത്തിൽനിന്ന് ഉണർന്നെഴുന്നേറ്റിരിക്കുന്നു.”