الئنده اؤلچو ائپی اولان بئر آدام
اؤلچو ائپلی بئر آدام اورشلئمی اؤلچمه‌یه گدئر، آمّا اونا دئیئلئر کی زحمت چکمه‌سئن — شهر هر دووارا سیغمایاجاق قدر داشاجاق. آتامیز اؤزو اونون اطرافیندا اوددان بئر دووار، اونون ائچئنده ده جلال اولاجاق، و چوخلو مئلّت اونا قوشولوب اؤولادلاری اولاجاق.
2 1سونرا باشیمی قالدیریب باخدیم و الئنده اؤلچو ائپی اولان بئر آدام گؤردوم. 2سوروشدوم: «هارایا گدئرسن؟» او منه ددی: «اورشلئمی اؤلچمه‌یه گدئرم، گؤروم اونون اِنی و اوزونلوغو نه قدردئر.»
3منئمله دانیشان ملک گتدی و باشقا بئر ملک اونون پئشوازینا چیخدی، 4و اونا ددی: «قاچ، بو جاوانا دِه: ”اورشلئم، ائچئنده بو قدر چوخ ائنسان و مال-حیوانلا، آچیق بئر اؤلکه کئمی ساکئن اولاجاق.
5من اؤزوم اونون اطرافیندا اوددان بئر دووار اولاجاغام، آتامیز بویورور، و اونون ائچئنده جلال اولاجاغام.“»
6«گلئن! گلئن! شئمال تورپاغیندان قاچین، آتامیز بویورور، چونکی سئزی گؤیون دؤرد یلی کئمی داغیتدیم، آتامیز بویورور. 7ای صحیون، گل! ای بابئل قیزی ائله یاشایان، قاچیب قورتار.
8قوشونلار آتاسی بله دیئر - جلالی منی سئزی غارت ادن مئلّتلرئن ضئدّئنه گؤندَ‌رَندن سونرا: سئزه توخونان، اونون گؤزونون بَبه‌یئنه توخونور:
9چونکی باخین، من الئمی اونلارین اوستونه یِللَده‌جه‌یم و اونلار اؤزلرئنه قوللوق ادنلره تالان اولاجاقلار. اوندا بئله‌جکسئنئز کی، قوشونلار آتاسی منی گؤندَ‌رئب.
10ای صحیون قیزی، اوخو و سوئن! چونکی باخ، گلئرم کی، سنئن آراندا ساکئن اولام، آتامیز بویورور.
11«او گون چوخلو مئلّت آتامیزا قوشولاجاق و منئم اؤولادلاریم اولاجاقلار. من سنئن آراندا ساکئن اولاجاغام و بئله‌جکسن کی، قوشونلار آتاسی منی سنئن یانینا گؤندَ‌رئب. 12آتامیز موقدّس تورپاقدا یهودانی اؤز پایی اولاراق صاحئب اولاجاق و گئنه اورشلئمی سچه‌جک.
13ای بوتون بشر، آتامیزین حوضوروندا ساکئت اول، چونکی او اؤز موقدّس مسکنئندن قالخیر.»
