Takan Chühbü Lüh Kibü Müt Che
Takbü müt che Jerusalem takla shanga louko ki, lausikei hao to teshitekoe dogo lenkei—sangnyu kho wan akibü kaonyek tegü yeitilabü. Seneibü Bou lolokei sao kaijembo la wan kümthang tegü kilabü hoba sao maangpona soneikangbü kilabü, hoba phang soushou maubü hao yoa chung che yeilabü hoba haoeibü shousi yeilabü.
2 1Hobaje ngei limchühan, haoeibü ika takan chühbü lüh kibü müt che hapbei. 2Ngei phekei, “No lato hauda?” Haoei kü to laukei, “Jerusalem takla shanga, hoba kho lalokche widei hoba lalokche longche yingkeije chühla shanga.”
3Hobaje kü yoa joyoko kibü khuthük hangangbü haukei, hoba lubü khuthük hangangbü che hao to haüyola longan kikei, 4hoba hao to laukei, “Laangashi, ho heshoubou to lenashi: ‘Jerusalem kho khünei kibü kaonyek tegü settilabü, aishanga kho yoa müt hoba samkeisamuk aeibou juong kilabü.’
5Ngei kho kaijembo la wan kümthang tegü kilabü, dogo seneibü Bouei lauda, hoba ngei kho maangpona soneikangbü kilabü.’”
6“Louashi! Louashi! Yungthang ae kaodak ka satashi, dogo seneibü Bouei lauda, aishanga ngei kan mühbü yei saoche tegü lintikei, dogo seneibü Bouei lauda. 7Louashi, O Zion! Babilon nouyangnyu yoa kibü no, satentiashi.
8Khuthük lakjaibü dan Bouei hai lauda—haoeibü soneikangbüei kan to soletbü shibü phangshuong khulimbo ngo hautibü phaia: aoei kan to meitilaje, haoeibü nyekei dühko chühbü shongbe to meitida:
9Aishanga chühashi, ngei haoen thüka kü ik jiplabü, hoba haoen kho haoen to khangenbü shuong shanga soletbü yeilabü. Kheijinei khuthük lakjaibü dan Bouei ngo hautikei dogo kanei ngelabü.
10Chia lauashi hoba olinashi, O Zion nouyangnyu! Aishanga chühashi, ngo kan yoa kila louada, dogo seneibü Bouei lauda.
11“Khünyet kho phangshuong juongei seneibü Bou to shenyolabü hoba kü shousi shuong yeilabü. Ngei kan yoa kilabü, hoba khuthük lakjaibü dan Bouei kan jungto ngo hautikei dogo kanei ngelabü. 12Hoba seneibü Bouei saopobü kaodak ka Jihuda to haoeibü phejan la lelabü, hoba Jerusalem toukei pienlabü.
13Khunakshousi pendou, seneibü Bou thedanga semele kiashi, aishanga haoei haoeibü saopobü lemshang ka hao lolo shouenan louakei.”
